Uswelulo 20 - UPANGANO UPYA

Shetani wanyepwa myaka ielfu yonga

¹ Nga nalola malaika alwika ukufuma umwiyulu, ali nu lufungulo lwa ku azimu nu nyololo unkulu umwikasa lyaakwe.

² Walema ichizoka chilye, inzoka ya kali, uli Chiwa na Shetani, amnyepa imyaka imyanda ikumi.

³ Wamsumba ukwazimu wanjalila, watela akamanyililo penepo, kuti atayazosye antu kaili, fika na lino imyaka imyanda ikumi yasila; nga pano yasila, chinjile ayulilwe uku manda mache.

⁴ Apano nalola ivisumbi-vya-ukulu, kwali na antu yano yavikalile, nayo yapiwe amaka ya kuputula imilandu. Nene nalola imyenzo yi yano yaputwilwe imitwe uku nnandu wa usyuta wi Yesu, nu ku nnandu wiswi li Leesa, na yano yatafukamile inkala nanti ichilui chakwe, yano yatatana yapokelela akamanyililo kalye apa mpuma zyao, nanti uku makasa yao; nayo yawa apuma, yalâsa ponga na Klisto imyaka imyanda ikumi.

⁵ Afwi yao yano yasyalile yatali nu upuma fika na lino imyaka imyanda ikumi yafikilila. Uo ali ututuluko wa ntangulo.

⁶ Uwa nkata na wino waswefiwa uwino ali na kai apa ututuluko wa ntangulo. Kuli yao infwa ya uwili isi na maka, leelo yaluwa yakapela yi Leesa na Klisto. Nayo yalulâsa ponga nawe imyaka imyanda ikumi iyo.

Shetani wasapulwa; isumo lya chisila

⁷ Na pano imyaka imyanda ikumi iyo yasila, Shetani aluyulilwa, afume muno wayalilwe.

⁸ Nawe alufuma kuti azosye antu yano yali un-nsansa zino izya nsi, Gogu na Magogu, ayakonganike ukulwa isumo; ukuvula kwao yaluwa wa misenga ya pali yemba.

⁹ Yaakwela yafuma konsi konsi un-nsi nu kulizya insaka ya aswefiwa, nunzi uo uno wakundikwa. Apano umoto wika ukufuma umwiyulu wayasikisya.

¹⁰ Na wiwi Chiwa wino wayazosizye, wasumbilwa muli yemba wa mto ni sanku, muno muli nkala ilye na kalauzya wilye uwa ufi, nayo yaluchula unsanya nusiku, manda ti na ti.

Uputuzi wa kumalila

¹¹ Apano nalola ichisumbi-cha-ukulu ichikulu chitiswe, na wino awikalile penepo, wino insi niyulu vilumwituka, nu wikalo waakwe vyo utalolike.

¹² Nalola afwi, ayikolo nanono, iyimilila pa nkolelo ya chisumbi chiyo icha ukulu; ni vitabu vyakupulwa. Ni chitabu ichinina chakupulwa, nacho uli icha upuma. Nafwi yao yaputwilwa imilandu um-ifintu fino vyandikwa um-vitabu vilye, ukuyana na fino yachitanga.

¹³ Yemba afumya afwi yano yali mwenemo, ni nfwa nu kwazimu vifumya afwi yano yali mwenemo. Yaputwilwa imilandu chila ntu ukuyana na fino wachitanga.

¹⁴ Infwa nu kwazimu visumbilwa muli yemba wilye uwa moto; iyo uli infwa ya uwili: yemba wiyo uwa moto.

¹⁵ Nuntu wensi wino walolike ataandikwe un-chitabu cha upuma, wasumbilwe muli yemba wa moto.