Uswelulo 2 - UPANGANO UPYA

Amaswi ku Efeso

¹ “Kuli malaika wikongani lya ku Efeso, wandika, uti: Wino alemile intanda saba siyo umwikasa lyaakwe lya kwilunji, wino akulupitana apakasi apa fimikilo fya nkosho saba ifya saabu, wafwanga ifintu fi, waati:

² Manyile milimo yako na machulo yako, nu kushasha kwako, na fino utangutekelele antu yaipe, na kaili wesishe yalye yano yaluti: swe mitume leelo yasiyo; wasana fino aufi:

³ Na kaili wali nunte nu kutekela uku nnandu wisina lyane, nanti utatana utonte.

⁴ Leelo ndi niswi newe, fino wata ulukundo lwako lwa ntangulo.

⁵ Ichino welengula api pano waponile, ufipele, uchite ndi fino milimo ya ntangulo. Leelo ndi utachisile fiyo, ndwisa kunuli, nene ndutisha chimikilo chako pa fwasi yaakwe, ngu tafipesile.

⁶ Leelo iswi li wene ukwite, fino watuwa imilimo ya aNikolai, yino nene kwene natuwa.

⁷ “Wino ali na makutwi, apulike iswili lino Mweso alunena amakongani. Wino wacha wapota, ndumpa ukulya ivisêke vya chiti cha upuma, chino chili apakasi ya Chialochi-Leesa.”

Amaswi ku Similna

⁸ “Na kuli malaika wikongani ilya ku Similna andika, uti: Alaviifino afwansile, wino ali wa ntangulo nu kumalila, wino wafwile washa wawa mpuma.

⁹ Manyile amachulo nupina wako—lelo we nsavi—imanyile intusi shao, yano yaluti: Swe aYudea; nayo yasi yeneyo, leelo ikongani li Shetani.

¹⁰ Utachopa machulo yano yankusana. Lolini, chiwa wiyo alumutela yamwi um-minyololo, kuti mwesiwe; nemwe mulusunyiwa amanda ikumi. Uwe nfumi wa chumi fika nu kufwa, nene ndukupa Inkata ya Upuma.

¹¹ “Wino ali na makutwi, apulike iswi li lino Mweso alunena makongani. Wino wacha wapota, atalusanwa ninfwa ya uwili.”

Amaswi ku Pelgamo

¹² “Na kuli malaika wikongani lya ku Pelgamo andika uti: Ala fi ifino afwansile wino ali ni mpanga ya wembe kuwili.

¹³ Manyile pano utesi ali pa chisumbi-cha-ukulu ichi Shetani; newe walemasha nkani isina lyane; utachili ukane usumilo wane, nanti pa manda yi Antipa, shuta wane wa kutailwa, wino wumosilwe pali mwemwe, pano Shetani atesi.

¹⁴ Leelo ndi na maswi mache kuli wewe, kuno uli na antu yano yalemile amasambilisho yi Balaamu, wino wasambilisha Balaka, achite ifya kukowesha aIslaeli, ukuti yalye ifintu fino vyafimwa uwila uku filui, nu kuchita upundu.

¹⁵ Ifino newe kwene uli na antu yano yalemile amasambilizyo ya aNikolai.

¹⁶ Ichino fipele; ngu tafipesile, namwisa kunuli suwa, nu kuchita isumo kuli yeneyo uku mpanga ya n-nnomo wane.

¹⁷ “Wino ali na makutwi, apulike iswi li lino Mweso alunena makongani. Wino wacha wapota, ndumwankanya imana iyo, ino yafiswa, nene ndumpa ifinga itiswe, na pifinga liyo pandikwe izina ipya lino umwi atalimanyile, siku wino alulipokelela.

Amaswi ku Tiatila

¹⁸ “Na kuli malaika wi kanisa lya ku Tiatila andika, uti: Umwana wi Leesa, wino ali na maaso ungati fyenje vya moto, na mulu yaakwe wa mbisi ino yakumbwa nkani, wavwanga ifintu fi, waati:

¹⁹ Manyile imilimo yako, nu lukundo, nusumilo, nuomvi, nunte wako, na fino imilimo yako iya chisila yaluta iya ntangulo.

²⁰ Leelo ndi niswi newe, kuno utamkanile mwanachi Isabeli, wino akuluwita apa lwakwe fino ikalausha, nu kusambilisa aomfi yane nu kuyalofya, kuti yachite upundu nu kulya ifintu fino fyafimwa uwila uku filui.

²¹ Nene nampa uwasa kuti afipele, leelo atakasi ukufipela uku upundu wakwe.

²² Lola, ndunsumba apa chitala ponga na yoshi yano yachita upundu nawe, yalulola amachulo nkani, ngi yatafipesile uku milimo yaakwe.

²³ Nene ndumola anakwe uku nfwa. Na makongani yoshi yalumanya fino Nene ndi Kalondola wa melengusi ni myeso. Nene ndumpa chila ntu kuyana ni milimo yaakwe.

²⁴ “Lelo ndumunena yamwi yano muli uku Tiatila, yoshi yano mutalemile masambilisho yao, yano yatamanyile inkama yi Shetani, ndi fino yakufwanga, ntalumutwika ichisendo chinina.

²⁵ Leelo chino muli nacho, chilemashini nkani, fika na lino nacha nisa.

²⁶ “Wino wacha wapota, nu kuisunga imilimo yane fika ni chisila, ndumpa amaka apa akulukuwa.

²⁷ Nawe aluyachema ku ntuwa ya chela, aluyafinyongola wa chivya chifu li nakamata; ndi fino Nene kwene napokelile kuli Tata.

²⁸ Nene ndumpa nankokola-uwa-katondo.

²⁹ “Wino ali na makutwi, apulike iswi li lino Mweso alunena makongani.