Uswelulo 19 - UPANGANO UPYA

Mwimbo wa kutensya

¹ Ichisila cha ifintu vi napulika iswi kulu wiswi kulu ilya maumba tupu aya antu, mwiyulu, liluti: “Aleluya! Ufyusi nukulu na maka vili uku Mwene Leesa witu.

² Kuno uputuzi waakwe uwa chumi nu wa mpomvu; kuno wataputula unnandu wa nchende nkulu wino wononile insi uku upundu wakwe, nga watalandula uwazi wa aomvi yaakwe umwikasa lyaakwe.”

³ Ni lya uwili yaati: “Aleluya! Ni lyunsi lyaakwe lilusûka manda ti na ti.”

⁴ Nga akombe yalye amakumi yaili na yani, na yalye aya upuma yani, yafukamila nu kupepa Leesa, wino atenzi apa chisumbi-cha-ukulu, yaati: “Amina, Aleluya!”

⁵ Iswi lifuma un-chisumbi chilye icha ukulu, liti: “Mtensye Leesa witu, mwe aomvi yaakwe yoshi, mwe yano muli ni chopo, anono nakulu.”

Winga wa Mwana-nfwele

⁶ Nga napulika iswi, wiswi kulu ilya maumba makulu, na wiswi lya manzi tupu, na wiswi lya nunkumo wa maka, angi liluti; “Aleluya! Kuno Mwene, Leesa witu, uwa Maka-yonsi watalâsa.

⁷ Katuchimbe nu kuchimbila, tumpe ukulu wakwe, kuno uwinga wa Mwana-nfwele uwiza; nunchi watauteyanya.

⁸ Nawe watapiwa ukuyemba umwenda untiswe ntelepwe uno wazipa nkani. Kuno umwenda ntelepwe uo, imilimo iya chumi iya aswefiwa.”

⁹ Nga wannena, waati: “Wandika: inkatao yano yalalikwa ku chimulo cha winga wa Mwana-nfwele.” Annena, ati: Amaswi ya aya kutailwa ayi Leesa.”

¹⁰ Nene napona apa mulu yaakwe, ukuti nsukamile. Wannena, waati: “Lola, utachichita fiyo! Nene umuofi nnyonko nu wu chako muli yano yali nusyuta wi Yesu. Sukamila Leesa! Kuno usyuta wi Yesu ali umweso wa malau.”

¹¹ Apano nalola umwiyulu muyuzilwe, nga lolini, falasi ntiswe, na wino aikowile, yatangi uWakutailwa nu Wachumi. Wene uku chumi aluputula imilandu nu kulwa isumo uku chumi.

¹² Amanso yaakwe yakolana ichenje cha moto, na pa ntwe waakwe pali inkata tupu. Ali nizina lino lyandikwa, lino pasi umwi wino alimanyile, siku umwisikulu kwene.

¹³ Nawe azwite umwenda untivye um-wazi, nizina lyaakwe yakuluti: “Iswi li Leesa.”

¹⁴ Na maumba yano yali umwiyulu yannondela, yaikowile ifalasi intiswe, yazwite imyenda yi ntelepwe, mitiswe, miswepe.

¹⁵ Ni mpanga inkali ilufuma un-nnomo wakwe, ukuti akome akulukuwa kuli yeneyo. Nawe unkola aluyachema uku ntuwa ya chela Nawe alyaatilile ichilina cha kukamila mizabibu ya chilakali cha ukali wi Leesa Wa-maka.

¹⁶ Nawe ali nizina lyandikwe uku mwenda waakwe na pa lupamba lwakwe: Unnâsi wa yalâsi, Mwene wa ene.

Inkala na kalauzya wa ufi yapotwa

¹⁷ Apano nalola malaika wenga awimilila apilanzi; alaizya ukwiswi kulu, angi alwita ivyuni vyonsi fino vikulelemba umwiyulu, ati: “Nguni, mukongane apa chimulo chikulu ichi Leesa.

¹⁸ Kuti mulye ivyala vya ene na ayikolo ya asalifi, ni vyala vya antu ya maka, ni vyala vya falasi ni vyi yakakowela, ni vyala vi yakauwele na azya, anono na akulu.”

¹⁹ Nasya nalola inkala ilye na ene ya nsi, na maumba ya asalifi yao, iyakongana, kuti yalwe na wino akowile apa falasi iyo na maumba ya asalifi yaakwe.

²⁰ Inkala iyo yalemwa ponga na kalauzya wilye uwa ufi, wilye wino wachisile ivilangizyo vilye apa maaso yaakwe, fino kuli wenewe wazosya antu yalye, yano kuli wenewe yapokelile akamanyililo ka nkala iyo, na yano yafukamile ichilui chakwe. Yao yaili yasumbwa yachili apuma muli yemba wa moto, wino alwaka uku sanku.

²¹ Na yalye yano yasile yumozilwe uku mpanga ino ilufuma un-nnomo waakwe wiwi wino wakowile apa falasi ilye, Ni vyuni vyonsi vikuta ivyala vyao.