Uswelulo 17 - UPANGANO UPYA

Uputuzi wa nchende Babeloni

¹ Awiza wenga pali yamalaika yalye saba aya ngeso zilye saba, avwanga nene, ati: “Nguna ku. Nankulanga uputuzi wa nchende wilye unkulu, wino akulwikala apa manzi yinji.

² Wino aene ya nsi yachita upundu nawe, na yano yatenzi un-nsi yakoleka isute lya upundu wakwe.”

³ Apano wansenda um-Mweso uku lusanga. Nalola umwanachi awikazile apa nkala inkasuke nkani, ino yazyula mazina ya misuli, nayo yali ni mitwe saba ni mpembe ikumi.

⁴ Nu mwanachi wilye wazwite imyenda ya mala ya zambalau, ni mikasuke, wayemvile zaabu na mafinga ya mpia tupu ni lulu, nawe wali na komachi wa zaabu umwikasa lyaakwe, muno mwazyuzile uononi nu takati wa upundu wakwe.

⁵ Na pa mpuma yaakwe wali nizina lyandikwe, isiike: “Babeloni nkulu, nyina wa yapundu na yononi ya nsi.”

⁶ Nalola umwanachi wilye wakoleka uwazi wa aswefiwa, nu wazi wi yasyuta yi Yesu. Nene pano nannola, nazunguka lekasi.

⁷ Apano malaika wilye wanena, waati: “Ukuchani wazunguka? Nankunena inkama ya mwanachi wi, ni nkala yi yino imsenzile, ino ili ni mitwe saba ni mpembe zilye ikumi.

⁸ Inkala iyo yino uwine yaliko, leelo apa kasalaka itachilipo, leelo ilufuma kaili ukwazimu, iye uku ononi; na yano yatenzi ukunzi, yano yataandikwe amazina yao un-chitabu cha upuma fuma ukulengwa kwa nsi, yaluzunguka pano yalola inkala iyo ino kali yalipo nga itachilipo, nga yasya yaloleka kaili.

⁹ Epa pasita amano nu kumanya: imitwe saba ilye imyamba saba, yino umwanachi wilye awikalile.

¹⁰ Nayo aene saba kwene. Yasano yaapona, wenga alipo, nunnina achili awize. Nawe pano wacha wiza, chinnungime ukwikala manda mache.

¹¹ Inkala iyo ino yalipo kali leelo kasalaka itachilipo, iyo kwene ali ya nnane, nayo ili ya pali zilye saba, nayo iile ukuononeke.

¹² Ni mpembe zilye ikumi zino wali uwine, aene ikumi yano yachili yalâse, leelo yalupiwa amaka ya ulâsi akazimbo ponga ni nkala ilye.

¹³ Yao yali numweeso onga; nayo yalupa inkala iyo amaka yao nulâsi wao onsi.

¹⁴ Ayano yalulwa nu Mwana-nfwele; leelo uMwana-nfwele aluyapota, kuno wene uMwene wa aene, na kaili Nnâsi wa alâsi, na yao yano yali ponga nawe, ayano yisilwe nu kusololwa, ayakutailwa.”

¹⁵ Nga wanena, waati: “Amanzi yalye yano uwine, apano atenzi umpundu wilye, ni nko na maumba na antu ni mivwango.

¹⁶ Ni mpembe ikumi zilye zino wali uwine, ni nkala iyo, ifino vilutuwa umpundu wiyo. Yalutola chonsi chino akwite yalunsya tupu. Ayano yalulya inyama yaakwe nu kumsikisya um-moto.

¹⁷ Kuno Leesa watela um-myenzo yao ukuchita fino alusita unkola, yapulikana ukuwa mweso onga nu kupa inkala iyo wene wao, fika na lino amaswi yi Leesa yafikilila.

¹⁸ Nu mwanachi wilye wino wali uwine, uli unzi ulye nkulu uno ulâsile aene ya nsi.