Uswelulo 13 - UPANGANO UPYA

Inkala yafuma muli yemba

¹ Apano nalola inkala ilufuma muli yemba, ili ni mpembe ikumi ni mitwe saba; na pa mpembe zyaakwe ili ni nkata ikumi na pa mitwe yaakwe amazina ya misuli kuli Leesa.

² Ni nkala iyo ino nawine yakozile ingwi, na mulu yaakwe yakozile kunti mulu yi dubu, nu nnomo waakwe kunti unnomo wi kalangu. Ichizoka champa amaka yaakwe ni chisumbi chakwe icha ukulu nu uposi tupu.

³ Nalola untwe waakwe onga, kunti uli nu luma lwa kufwa; nu luma lwa kufwa lwapola. Insi yoshi yazunguka apa chinyama chiyo nu kuchilondela.

⁴ Yasukamila chizoka chiyo, kuno chapa inkala iyo uposi wakwe, nayo yasukamila inkala iyo, angi yaluti: “Uwini wino akoline ni nkala yi?” Na kaili: “Uwini wino angalwa nayo?”

⁵ Nayo yapiwa unnomo wa kuvwanga amaswi makulu, aya misuli kuli Leesa. Yapiwa maka ya kuomba imilimo yaakwe imyezi amakumi yani na ili.

⁶ Yaasama unnomo wakwe, kuti ituke Leesa nu kutuka Izina lyaakwe na mikalo yaakwe, na yano yatenzi umwiyulu.

⁷ Yapiwa kaili ukulwa isumo na aswepe nu kuyapota; yapiwa uposi pa nko zyonsi ni mipanda ni mivwango na antu yoshi.

⁸ Na antu yoshi akuno kunzi yalumfukamila, untu wensi wino izina lyaakwe litaandikwe un-chitabu icha upuma icha Mwana-nfwele, wino wafyuzilwe, fuma ukuwikwa chiimbili cha nsi.

⁹ Untu ngali na makutwi, apulike.

¹⁰ Untu ngalusenda azya, alusendwa unzya; untu ngi umola uku mpanga, alufwila uku mpanga. Alapa ali pa kutekela nusumilo wa yaswefiwa.

Inkala yafuma un-nsi

¹¹ Apano nalola inkala inji, ilufuma un-nsi; nayo yali ni mpembe ziili wa Mwana-nfwele, yavwanga wa chizoka.

¹² Nayo iluombela amaka yoshi aya nkala iyo iya ntangulo pa maaso yaakwe. Nayo ilufyengelezya insi na yano yali mwenemo, yafukamile inkala ya ntangulo, yino uluma lwakwe lwa kufwa lwapozile.

¹³ Nayo iluchita ivilangizyo vikulu, nu kwisya umoto kufuma mwiyulu, wize un-nsi apa yantu.

¹⁴ Nayo iluzosya yano yatenzi umunsi uku vilangizyo vilye fino yapiwa ukuchita apa nkala iyo. Yanena yano yatenzi umunsi yachite ichilui ku nkala iyo, yino yali nuluma lwa mpanga, leelo lwapola,

¹⁵ Ipiwa ukutela umpu wa upuma un-chilui cha nkala iyo, apalinji chilui cha nkala iyo chivwange, nu kumola yoshi yano yatafukamile ichilui cha nkala iyo.

¹⁶ Nayo ilufyengelezya yoshi anche na ikolo, asavi na apina, yakauwele na azya, yatelwe akamanyililo ukwikasa lyao ilya kwilunji, nanti apa mpuma zyao.

¹⁷ Na kaili kutachiwa untu umwi wino angakala nanti ukukazya, siku wino ali na kamanyililo kalye, izina lya nkala iyo, ali kusolozya kwizina lyaakwe.

¹⁸ Alapa ali pa mano: wino ali na mano, asiule kusolozya kwa nkala iyo, kuno kusolozya kwa chiuntu, nu kusolozya kuo imyanda sita na makumi sita na sita.