Uswelulo 11 - UPANGANO UPYA

Yasyuta yaili

¹ Apano napiwa ilonje, wa ntuwa, na wenga wanena, waati: “Katuka, ulinge ng'anda-nkulu-iyi-Leesa, ni altale na yao yano yalusukamila mwenemo.

² Nu nsolo uno uli ukunzi ya ng'anda-nkulu-iyi-Leesa, uusye nanti kuulinga; kuno antu yakulukuwa yapiwa-wo; nayo yalulyata unzi nswefu imyezi amakumi yani na yiili.

³ Nene ndutuma yasyuta yane yaili, nayo yalulauzya manda ielfu yonga ni myanda ili na makumi sita, nakuno angi yazwite amasaka.

⁴ Yao ali mizeituni iili ilye ni vimikilo viili vilye, fino vikulwimilila apa maaso ya Mwene wansi.

⁵ Nuntu ngi wasita ukuyachisa, umoto ulufuma um-milomo yao nukuyocha aembu yao. Nuntu wensi uwacha wasita ukuyachisa, ifino alufwa.

⁶ Wene yao yali na maka ya kunyepa iyulu, kuti isemba itachitonya um-manda ya kulauzya kwao. Na kaili yali na maka ya kusenula amasi ukuwa uwazi; nu kuleta ivilumbelo tupu tupu un-nsi, lino yakunda.

⁷ Pano yacha yamala usyuta wao, palutumbuka ichinyama cha nkango ukufuma uku azimu, chiluchita isumo nayo nu kuyapota nu kuyumola.

⁸ Ni vyala vyao viluwa un-nzila ya nzi ulye nkulu, uno ku mweso yakuluti: Sodoma na Misili, apano Mwene wao kwene wumozilwe.

⁹ Nu kufuma ku antu yoshi, ninko zyonsi, ni mivwango na antu tupu tupu yalulola ivyala vyao amanda yatatu nu wanda pakasi; leelo yataluleka ivyala vyao vizikwe um-malindi.

¹⁰ Nga yano yatenzi kuno kunzi yaluchimbila nu kuuma kapundu pano yali, nayo yalutwalilana mawila, kuno yakalauzya yao yaili yachuzyanga antu yao, yano yatenzi kuno ukunzi.

¹¹ Leelo apa chisila cha manda yatatu nu wanda apakasi, umweso wa upuma wafumile kidi Leesa, uya muli yeneyo, yakatiika yimilila akola; yoshi yano yayawine ingofi zyayalema leka.

¹² Apano yapulika iswi ikulu ukufuma umwiyulu, liluyanena ukuti: “Kwelini, mwize ku!” Nga yaakwela umwiyulu umwipufi; na yasiluembu yao yayalolanga.

¹³ Nga liyo kwene kuwa ichitentema ichikulu cha nsi; nu lusansa lwi kumi ulwa nzi lwapona, antu ielfu saba yafwa ni chitentema chiyo. Na antu yano yasyalila yopa nkani, yatensya Leesa wa mwiyulu.

¹⁴ Akalanda ka uwili kapita, lola, aka utatu kalwiza zuwa.

Ipenga lya saba

¹⁵ Apano malaika wa saba uma ipenga. Kwawa maswi makulu umwiyulu, angi yaluti: “Uwene wansi iuwa uwene wa Mwene witu na Klisto wakwe, uwino wannâsa manda ti na ti.”

¹⁶ Apano akombe yalye amakumi yaili na yani, yano yatenzi pali Leesa um-visumbi vyao ivya ukulu, yapona angi yafupime, wasukamila Leesa.

¹⁷ Angi yaluti: “Tulukusamalizya Mwene Leesa uWa-maka, we wino uliko na waliko, kuno watola uposi wako ukulu nu kulâsa.

¹⁸ Nantu yakulukuwa yalakalika, nu ukali wako wiza, na pa kuputwila afwi imilandu, na pa kulambwila aomvi yako, yakalauzya, na aswepe na yoshi yano yali ni chopo kwizina lyako, anono na akulu; nu kunona yano yalonona insi.”

¹⁹ Apano ng'anda-nkulu-iyi-Leesa ino ili umwiyulu, iyulika. Isandiko lya upangano waakwe lyaloleka un-ng'anda-yaakwe-inkulu. Apano nkozyo zyamyalula na maswi nu nnunkumo, ni chitentema chansi, ni semba iya chitalawe.