Uswelulo 1 - UPANGANO UPYA

¹ Uswelulo wi Yesu Klisto, uno wapilwe na Leesa, alange aomfi yaakwe ifintu fino fitaluula ukwisa suwa. Nawe watuma ukwikasa lyi malaika wakwe, kunnandila umuofi waakwe Yoane,

² wino wimikile iswi li Leesa nushuta wi Yesu Klisto, uli ifintu fyoshi fino wawine.

³ Inkata kwe wino alusoma na yano yalupulika amaswi ya ulau uu, nu kulema fino fyandikwe mwenemo, kuno amanda iyapalamila.

Maswi yi Yoane ku makongani

⁴ Yoane uku makongani saba yano yali uku Asia: Inkumbu siwe nemwe nu welesho, fino fifumile kuli wino alipo na wino walipo na wino alwisa: na fino vifumile uku myeso saba ino ili apa nkolelo ya chisumbi-cha-ukulu.

⁵ Na fino fifumile kuli Yesu Klisto, shuta wa kutailwa, wiyele kuli yano yafwa, unnâsi wa yene ya kuno kusi. Wino watukunda nu kutukulula ku maifyo uku wasi waakwe

⁶ Nu kutuchita tuwe uwene na yakapela kuli Leesa, Isi: utensho na maka yali kunali manda ti na ti! Chiwe fiyo kwene.

⁷ Lola alwiza na mapufi na maaso yoshi yalunnola, na yao kwene yano yamtosile; ninko zyonsi izya kuno kusi silulosha pa nnandu wakwe. Ifino chili, chiwe fiyo kwene;

⁸ “Nene Alfa na Omega, intangulo nu kumalila,” afwasile Mwene Leesa, wino alipo na wino walipo na wino alwisa, uWa-maka-yonsi.

Malele yi Yesu

⁹ Nene Yoane, uwachino nu muminkani ponga nemwe um-machulo nu Wene nu nte muli Yesu. Nali um-manda yino yakuluti Patmo, uku nnandu wiswi lyi Leesa nu shuta wi Yesu.

¹⁰ Nali um-Mweso uwanda wa Mwene, napulika iswi ikulu ukuchisila chane wiswi li penga.

¹¹ Angi liluti: Ifintu fino ululola, fyandike un-chitabu, uchitume uku makongani saba; uku Efeso, uku Similna, nu ku Pelgamo nu ku Tiatila nu ku Saldi nu ku Filadelfia nu ku Laodikea.

¹² Nga napepela kuti ndole iswi lino liluvwanga nene. Na pano napepela, nalola ifimikilo vya nkosho saba ya saabu,

¹³ na pakasi ya fimikilo nalola umwi akoline nu ntu. Azwite mwenda ufisile umulu, anyefile unkowa wa saabu pa chifuwa.

¹⁴ Untwe waakwe ni nyele shaakwe shali ntiswe wa mafumbu ya nfwele ntiswe. intiswe wi susuwe, na maaso yaakwe wa chenje cha moto,

¹⁵ na mulu yaakwe wa mbisi ino yakumbwa nkani, ungati yatelwa umwilungu, niswi lyaakwe uti iswi lya masi minji.

¹⁶ Nawe wali ni ntanda saba ukwikasa lyaakwe ilya kwilunji, ni mpanga inkalipe konsi-konsi ilufuma un-nnomo wakwe; nusyu waakwe wali witasi, lino lilochelesa uku maka yaakwe.

¹⁷ Nene pano nannola, naponile pa mulu yaakwe wa ntu wino atafwa; wawika ikasa lyaakwe itya kwilunji pali nene, ati: “Utachopa; nene wa ntangulo nu kumalila.

¹⁸ nu wa Upuma, nene nalile nafwa, nga lola, ne mpuma manda ti na ti. Nene ndi nu luchinji lwa nfwa nu lwa kusimu.

¹⁹ Ichino wandika fino walola, fino filipo na filye fino vilwiza apa chisila chi fiyo.

²⁰ Amelengwe ya ntanda saba, sino wawine umwikasa lyane lya kwilunji, na filye fimikilo fya nkosho saba ivya saabu: silye intanda saba ali ayamalaikaya makongani saba. Ni fimikilo saba, amakongani saba.