Tito 2 - UPANGANO UPYA

Amaswi aya chumi

¹ Leelo wemwi, fwanga ifintu fino viile uku masambilizyo ya upuma.

² Fino akombe yatekane, yawe nu nchinshi, yau-kôle, aya mano yano yaloloka um-usumilo nu ndukundo nu nte.

³ Ifino na akolechi kwene yawe achindamu um-miele yao, ndi fino chiile uku yantu yaswepe, yatawa nu lwambo, yatawa aya kanwa yisute, leelo alusambilisha ifisipe.

⁴ Ukuti yape amano anachi yano yachili yakomile, yakunde ya iya yao na ana yao,

⁵ yatekane, yawe ningo, nukuomba imilimo un-ng'anda zyao, yatonte uku kuchindika yaiya yao akola; kuti iswi li Leesa litasulwa.

⁶ Ifino na alumendo kwene, yasunde yatekane.

⁷ Umifintu fyonsi uwe nkolela we nkola, ukuyalanga imilimo mizipe, na masambilisho yako ukuyalanga ichumi nu kuikola,

⁸ na maswi yako ya upuma yano yatangi yavwangilwe ifiipe, ukuti wino alupingula akulwe untwe, kuno asi niswi liipe ilya kututakilila.

⁹ Asha yachindike aene yao nu kuyasipila um-fintu fyonsi, yatapazyana nayo.

¹⁰ Yatawa aifi, leelo yalange kutailwa kwao ukusipe, ukuti yaemvye amasambilizyo yi Katula witu Leesa um-fintu vyonsi.

¹¹ Kuno inkumbu shi Leesa, Sino sikutula antu yoshi, shaloleka.

¹² Nasho zilutusambilisha ukukana ifiipe nu kuntakumbuka ifintu fya kuno ukushi; kuti twikale tutekine, ni chumi ni chopo-kuli-Leesa, ukushi i iya pa kasalaka.

¹³ Angi tululolela utailo wa upepelelo nu kuloleka kwa utensho wi Klisto Yesu, Leesa witu unkulu na Katula witu.

¹⁴ Wino waufimile upuma waakwe uku nnandu witu, kuti atukulule um-viipe vyonsi nu kuswefya antu yawe ayaakwe unkola, yano yali nunte ukuomba imilimo misipe.

¹⁵ Fwanga amaswi ya, kusunda nukukalipila uku maka yonshi; atachikusula untu nanti umwi.