Tito 1 - UPANGANO UPYA

¹ Paulo umuofi wi Leesa nu ntume wi Yesu Klisto, uku nnandu wa usumilo wa yasololwa yi Leesa, nu kumanya kwa chumi, kuno kuine ichopo-kuli-Leesa.

² Um-utailo wa upuma wa manda ti, uno Leesa, wino atangi avwange ufi, walainye ukufuma kali kali.

³ Waswelula iswi lyaakwe uku makati yaakwe, um-mbila iyo, yino napilwe ukuma ukwiswi lyi Katula witu Leesa,

⁴ kuli Tito, umwanane um-usumilo uli onga. Inkumbu siwe newe nuwelezyo fino vifumile kuli Leesa Tata, na kuli Klisto Yesu Katula witu.

Unndimo wi Tito uku Klete

⁵ Ichino nakusile uku Klete, kuti uyanye ifintu fino fyashalila, nu kuwika ayikolo yi kanisa chila unzi, ndi fino natasile kuti uombe.

⁶ Nduu ntu wasundika nawe untu wa nchi wenga, nga anakwe yasumila, yatalufwangilwa ifiipe uku fvya upundu nanti kanyaati.

⁷ Kuno chiile Askofu awe untu wino wasundika, kuno aluchema antu yi Leesa, atawa untu wa kuikunda apalwakwe, atawa nu mweso wa pipi, atawa unkolesi nanti uwa kulemanila, atawa untu wa kukunda ukupata insao mbi.

⁸ Leelo awe ni lya uuntu, akunde ifisipe, atekine, uwa chumi, unswefu wa mweso, waikola.

⁹ Angi alemile iswi lya kutailwa ndi fino wasambilisiwe, kuti asunde antu uku masambilisho ya upuma, nu kupota alupashanya newe.

¹⁰ Kuno kuli ayinji atachindike, aya maswi ya uwele-wele, yakasosha, nkani ayalye aya chibalu, yano chilingine yatushe.

¹¹ Antu yao ayano yalonona aya ng'anda yoshi, angi yalusambilisha isitaile, kuti yapate insao mbi.

¹² Untu wa kumwao, kalausha wao akola, atati: “Aklete aufi manda yoshi; inyama njipe, yalaka akosu.”

¹³ Usyuta uo uwa chumi. Ichino fiyo uyasundishe, kuti yawe apuma um-usumilo.

¹⁴ Yatachipulika ifilai fya chiYudea, nanti amasunde ya yantu yano yaluupalula ni fya chumi.

¹⁵ Ifintu fyonshi fili ningo kuli yano yali ningo; leelo kusi chino chili ningo kuli yano yalyikila yano yatasumile, amano yao yafitokela ponga ni myenso yao kwene.

¹⁶ Yalusumila fino Leesa yammanyile, leelo uku U-nnimo yao yalumkana, ali ya chinyai, asi nu nchinshi, yatasipile nanti uche unnimo umwi unsipe.