Milimo 9 - UPANGANO UPYA

Saulo wafyushiwa

¹ Leelo Saulo alusya ukofya nu kusita ukumola alondeshi ya Mwene, aya kuli Kapela-nkulu.

² Asita ampe imbaluwa sha kuila uku Damaski zino shandikilwe ukuya ku mang'anda yao iyi Leesa, ukuti ndi walola antu ya nzila iyo, ayonsi nanti ayanachi, ayanyepe nu kuyaleta uku Yelusalemu.

³ Nga pano wapitanga, lino wapalamila uku Damaski, zuwa umwengelela ukufuma umwiyulu wamochelesha.

⁴ Apona apansi, apulika iswi lilunnena, liluti: “Saulo, Saulo, ifino wasunya?”

⁵ Ati: “We weni, Mwene?” Nawe ati: “Nene Yesu wino wanzunya wewe.

⁶ Leelo katuka uye umunzi, newe wannenwa icha kuomba.”

⁷ Na antu yano yapisile nawe, imilila chele, yalupulikisya iswi, leelo yatalola umwi.

⁸ Saulo akatuka apansi, na maaso yaakwe pano yakupuka, atalola chimwi. Yannema ikasa, yanneta uku Damaski.

⁹ Walinda amanda yatatu atalulola; atalulya nanti ukunwa.

¹⁰ Ngu uku Damaski kwali unnondeshi wenga ishina lyaakwe Anania. uMwene annena uku malele, ati: “Anania!” Nawe ati: “Ndipo Mwene.”

¹¹ uMwene wannena, waati: “Wimilila, pita kunsila ino yakuluti: yololoka; ukatondosye ung'anda i Yuda, untu wino yakuluti Saulo uwa ku Talso, kuno, lola, alupepa.

¹² Nawe watalola untu izina lyaakwe i Anania, aluya ukumwikila amakasa pa ntwe wakwe, kuti annola kaili.”

¹³ Leelo Anania ati: “Mwene, napulika ifyafula uku ntu wi uku yantu tupu, ifiipe tupu fino wachitila aswefiwa yako uku Yelusalemu.

¹⁴ Na pa kwene ali na maka kufuma uku ayikolo iyakapela, ukuti anyepe yoshi yano yazumile izina lyako.”

¹⁵ Leelo uMwene annena, ati: “Pitanga, kuno wiyo ichivya chizipe kunondi, asende izina lyane apa maaso ya akulukuwa na ene na ana ya Islaeli.

¹⁶ Kuno namnanga ifyafula fino vinnungime ukuchula ukwisina lyane.”

¹⁷ Anania apita, aya awingila un-ng'anda iyo, amwikila amakasa pa ntwe wakwe, ati: “Saulo, wachane, uMwene Yesu wantuma, wino wauswelwile kuno uli un-nsila ino wizile, kuti unnola kaili, ushule uMweso Nswefu.”

¹⁸ Liyo kwene fipona fimwi um-manso yaakwe fikozile amamba, nga alola, awimilila, abatishiwa.

¹⁹ Alya ichulya, awa na maka. Awikala kweneko amanda yamwi ponga na alondeshi yano yali uku Damaski.

Saulo alusunda uku Damaski

²⁰ Atampa liyo kwene ukusunda amaswi yi Yesu un-ng'anda shao ishi Leesa, fino Yesu uMwana wi Leesa.

²¹ Na yoshi yano yapulika, yasunguka, yaati: “Asuli wi wino wazunyanga yano yatakanga izina li uku Yelusalemu? Na pa kwene ichino wizile, ayanyepe nu kuyatwala uku ikolo iyakapela?”

²² Saulo wawa na maka, wasakamika aYudea yano yatenzi uku Damaski, alanga fino ala wiyo uli Klisto.

²³ Nga pano amanda tupu yasila, aYudea yamba ukuti yamumole.

²⁴ Leelo Saulo amanya ichintu chiyo. Angi yalulolela um-milyango yilinga usiku nu nsanya, kuti yamumole.

²⁵ Leelo usiku alondeshi yaakwe yamtola yamwisya uku usimbi, yamwisya um-mpânda.

Saulo wawela uku Yelusalemu

²⁶ Nga Saulo lino wafika uku Yelusalemu, awesha ukuuminkanya na alondeshi. Nayo yamopanga yoshi, nanti kusumila fino nawe kwene unnondeshi.

²⁷ Leelo Balanaba amkumbukila, amtwala uku mitume, ayalandila fino wawine uMwene un-nzila, nukuti wavwanzile nawe, na fino wasunzile uku chiposye um-Damaski ukwizina li Yesu.

²⁸ Nga awa ponga nayo um-Yelusalemu, awingila nu kufuma.

²⁹ Asunda ukwizina lya Mwene uku chiposye, afwanga nu kupashana na aYudea ya chiGliki; leelo yasita ukumumola.

³⁰ Leelo pano achakwe yachimanya, yamsenda uku Kaisalia, yamtuma aye uku Talso.

³¹ Apano ikongani lyatekana um-Yudea yoshi ni Galilea ni Samalia; lyawa liluwa nu kukula un-chopo cha Mwene nu utekano wa Mweso Nswefu.

Ainea na Dolkasi

³² Nga pano Petlo wapitananga monsi, aya uku aswefiwa yano yatenzi uku Luda.

³³ Alola untu umwi kweneko isina lyaakwe i Ainea, untu wiyo walala apa chitala imyaka nnane, kuno walile wikala itenda.

³⁴ Nga Petlo annena, ati: “Ainea, Yesu Klisto wakuposha; katuka ukonze chitala chako.” Liyo kwene ankatuka.

³⁵ Na antu yoshi yano yatesi uku Luda ni Saloni yannola, yasenukila uku Mwene.

³⁶ Nu nndondeshi umwi wali uku Yafa, ishina lyaakwe i Tabita—ukusenula i Dolkasi, alikuti: Nswela—umwanachi wi waombanga imilimo misipe na mawila yano wafimanga.

³⁷ Nga chali um-manda yalye alwala afwa, na pano yamfula yamwika un-chumba cha piyulu.

³⁸ Na kuno unzi wa Luda wapalamine ni Yafa, na alondeshi yapulika fino Petlo ukuno ali, yatuma antu yaili kunali, ukunnomba ukuti: “Utachisimba ukwisa kuno tuli.”

³⁹ Petlo afuma alondekana nayo. Pano wafika, yantwala un-chumba cha piyulu; afwilwa yoshi yimilila pipi nawe, angi yalulila nu kunnanga inkanjo ni myenda ino Dolkasi wasumile amanda yano walipo ponga nayo.

⁴⁰ Petlo wayafumya yoshi apanzi, wafukama, walomba; nga alungama uku chala chiyo, avwanga ati: “Tabita, katuka!” Nawe pano wakupula amaso yaakwe nga walola Petlo, wakatuka, wikala.

⁴¹ Ampi kasa, ankatusya; nga pano wita aswefiwa nafwilwa, amwika pano yali angi umpuma.

⁴² Chimanyika umunsi onsi wa Yafa, na antu tupu yasumila um-Mwene.

⁴³ Nga Petlo awikala manda tupu kweneko uku Yafa, un-ng'anda ya ntu umwi, izina lyaakwe Simoni, kanyuka wa mikwela.