Milimo 8 - UPANGANO UPYA

Machulo ya aklisto

¹ Ngu wanda uo kwene, ikongani lino lyali um-Yelusalemu lisunyika; yoshi yasambala un-nsi ya Yudea ni Samalia, kusyala imitume.

² Antu yano yachindika Leesa, yashika Stefano, yamchitila indosya inkulu.

³ Nga Saulo aonona ikongani, angi aluya chila ng'anda nu kuyaakwekwesa ayonsi na yanachi nu kuyayalila un-ng'anda-ya-minyololo.

Filipo wapita uku Samalia. Simoni unnoshi

⁴ Leelo yaya yano yasambashile, yaya ku na ku angi alusunda iswi-sipe.

⁵ Filipo apita ukuya un-nsi wa yaSamalia, ayasunda Klisto.

⁶ Na maumba uku mweso onga yap ulikisya amaswi yalye yano Filipo wavwanzile, pano yapulika nu kulola ifilangisho fino wachisile.

⁷ Kuno ingulu shafuma antu tupu yano yalemilwe nazyo, silila uku maswi makulu; na antu tupu yano yikala itenda, na yano yakulusinta, ayaposha.

⁸ Ukuchimba kuvulisya nkani umunzi ulye.

⁹ Nu ntu wenga ishina lyaakwe i Simoni, wino wapendosyanga umunzi uo kwene inkolelo, nawe wazungusya antu ya Samalia, ati fino wene untu unkulu.

¹⁰ Yoshi yampulikanga ukufuma umwanche nu wikolo kwene, yaati: ‘Untu wi, amaka yi Leesa yalye amakulu.’

¹¹ Nga yampulika kuno uku manda tupu wayazungusya uku kupendosya kwakwe.

¹² Leelo pano yazumila Filipo, pano alusunda iswi-zipe ilya wene-wi-Leesa, nizina li Yesu Klisto, yabatiziwa ayonsi na yanachi.

¹³ Na Simoni unkola kwene wasumile nu kubatishiwa, alemana na Filipo, azunguka pano walola ifilangisho ni fisunguko ifikulu fino filuombeka.

¹⁴ Ni mitume yano yali uku Yelusalemu, pano yapulika fino a ku Samalia iyazumila iswi li Leesa, yatuma Petlo na Yoane.

¹⁵ Nayo pano yafika, yayalombela kuti yapokelele uMweeso Nswefu.

¹⁶ Kuno walile uchili wikile umwi pali yeneyo, leelo yabatiziwa sile kwizina lya Mwene Yesu.

¹⁷ Apano yayawikila makasa pa mitwe yao, nayo yapokelela uMweeso Nswefu.

¹⁸ Nga pano Simoni walola antu yalupiwa uMweso Nswefu uku kuwikilwa amakasa ya mitume, wasita ukuyapa impia, waati:

¹⁹ “Mpini nene amaka ya, ukuti wensi wino nawikila amakasa yane, apokele uMweeso Nswefu.”

²⁰ Leelo Petlo wannena, waati: “Impia shako zilowelele ukutali ponga newe, kuno ulwelengula ukuti uwila wi Leesa ukupiwa uku mpia.

²¹ Utakwite uwankanyo nanti akayi uku chintu chi, kuno mweso wako utololwike kuli Leesa.

²² Ichino vipele uku uipe wako u, upepe uMwene, ukuti ngi chawela uwelelwe amelenguzi ya ayamweeso wako.

²³ Kuno ndukulola wakalipa wa nyengo na kaili wanyepwa ni viipe.”

²⁴ Leelo Simoni wavwanga, waati: “Mpepelini mwemwe uku Mwene, fitise finsane nanti chonga apa ifintu vi fino mwalanda.”

²⁵ Nayo pano yimikila nu kusunda iswi lya Mwene, yawela uku Yelusalemu, yasunda iswi-zipe um-mizi tupu iya aSamalia.

Filipo na untungwi wa ku Etiopia

²⁶ Malaika wa Mwene fvwanga na Filipo, ati: “Katuka, uye insansa lya ku katutu, ufike uku nzila ino ipisile ukufuma uku Yelusalemu, ukuya uku Gaza; nayo luselesenga.”

²⁷ Nawe akatuka nu kupita. Liyo kwene alola untu wa ku Etiopia, ntungwi, uwa maka apililinsi li Kandake, umwene mwananchi wa ku Etiopia, wawikwa apa vyuma vyaakwe vyonsi, waile uku Yelusalemu ukuyupepa.

²⁸ Nga lino aluwela angi atesi umwi gali lyaakwe, alusoma ichitabu chi kalauzya Isaya.

²⁹ uMweeso anena Filipo, ati: “Palamila apipi ni gali liyo, ulisyesyetele.”

³⁰ Nga Filipo awituka ulwilo, ampulika alusoma ichitabu chi kalauzya Isaya, nga ati: “Wayamanyikisya yao yano ulusoma?”

³¹ Nawe ati: “Ngamanya uli kusi wino alundondola?” Asita Filipo akwele nu kwikala pali ponga nawe.

³² Napantu pano wasomanga, Ilyandiko liyo apakuti: “Wasenzilwe ukuyufyulwa wa nfwele. Ndi fino umwana nfwele akutuzya pali wino alumchentola mavumbu, ifino nawe kwene ataluvwanga chimwi.

³³ Uku kunyatwa kwakwe uputuzi wa milandu yaakwe waatinile. Uwini wino alulandila ayaluko lwakwe? Kuno upuma waakwe waatisiwa kuno ukunzi.”

³⁴ Nga ntungwi wiyo anena Filipo, ati: “Ndukulomba, kalauzya wi aluvwanga amaswi ya pali wini, amaswi ya pa lwakwe unkola, nanti apa unji?”

³⁵ Nga Filipo nawe avwanga, atangwila uku lyandiko liyo kwene, amsunda iswi-zipe ili Yesu.

³⁶ Yawa yalupita un-nzila, yafika apa manzi, ntungwi wiyo waati: “Lola, amasi ya; ichani chino chilundesya ntabatiziwa?” [

³⁷ Filipo annena, ati: “Ngi wazumila uku mweso wako onsi, chingawa.” Nawe ati: “Nazumila fino Yesu Klisto umwana wi Leesa.”]

³⁸ Anena kuti igali limilile, yika yoshi yaili um-masi, Filipo na ntungwi wiyo, nga ambatisha.

³⁹ Nga pano yalufuma ummanzi, uMweeso wa Mwene amtisya Filipo, ntungwi wiyo atasya nnole kaili, nga wapisile aluchimba.

⁴⁰ Leelo Filipo aloleka uku Azote; nga pano wapitanga asunda iswi-zipe um-mizi yoshi, afika uku Kaisalia.