Milimo 4 - UPANGANO UPYA

Petlo na Yoane yatwalwa mwitengo

¹ Nga pano yavwangaa na antu yao, yakapela nu wikolo wa asalifi wa ng'anda-nkulu-iyi-Leesa na aSadukeo, iza kuno yali.

² Yalakalika nkani kuno yalusambilizya antu, nu kusunda muli Yesu ukututuluka kwa yafwi.

³ Yayalema yayawika un-njela fika ni iyulu, kuno yala manguzi.

⁴ Leelo ali tupu pali yao, yano yapulika iswi liyo, yazumila, apali ponga antu ayonsi yawa ungati imyanda amakumi yasano.

⁵ Walangi kulucha ikolo na akombe na yakaandika yakongana um-Yelusalemu,

⁶ na Anasi, Kapela-nkulu, na Kayafa kwene na Yoane na Aleksanda, na yoshi aluko lwi Kapela nkulu.

⁷ Pano yayawika apakasi, yayatondosya, yaati: “Uku maka chi nu kwizina lini, mwemwe muluchita ifintu vi?”

⁸ Apano Petlo azyula uMweeso Nswefu, ayanena, ati: “Mwe ikolo ya antu na kombe,

⁹ ngi twatondosiwa ilelo uku nnimo nzipe uno wachitilwa untu walemala, ngi wapoziwe uli.

¹⁰ Mumanye mwensi na antu yoshi aya mwIslaeli, fino ukwizina li Yesu Klisto wa ku Nazaleti, wino mwemwe mwankonkomile apa nsalaba nu kumumola, na Leesa wantutulula uku yafwi, ukwizina liyo kwene untu wi awimilila umpuma apa maaso ino.

¹¹ Wiyo ali finga lino lyasulwa nemwe yakakula, nalyo lyawikwa ukuwa ifinga ikulu ilya ku mbali.

¹² Nga kusi ufyusi muli umwi wensi, kuno kusi izina ilinji kuno ukunzi, lino yapiwa antu ukufyukila-ko.”

¹³ Nga pano yalola ukuposya kwi Petlo na Yoane, nu kumanya fino antu yao yatasambilile chimwi, nga yatamanyile chimwi, yazunguka, yamanya fino yali ponga na Yesu.

¹⁴ Na lino yalola untu wiyo wino wapoziwa awimilile ponga nayo, yatakwite chimwi cha kuvwanga.

¹⁵ Yayanena ukufuma umwitengo, pano yavwanzyanya yonga.

¹⁶ Yaati: “Tuyachite uli antu ya? Kuno chimanyike apatiswe na antu yoshi aya mu Yelusalemu, fino antu ya yachita ichipezya-mano ichikulu, tutangi tuchikane.

¹⁷ Leelo iswi litiza lilimbe unjantu, katuyofye yatachilanda kaili uku ntu umwi ukwizina li.”

¹⁸ Nga yaita yayasunda, kuti yatavwanga nu ntu umwi nanti ukusambilizya ukwizina li Yesu.

¹⁹ Leelo Petlo na Yoane yayanena, yaati: “Putulini mwe yakola ngi chili ningo apa maaso yi Leesa, ukumupulika mwemwe kuluta Leesa.

²⁰ Kuno swemwi tutangi tute ukulanda ifintu fino twavilola nu kupulika.”

²¹ Nga nayo pano yayofya kaili, yayasapula, yatawine inzila ya kuyumila, kuno yofile antu; kuno antu yoshi yatensyanga Leesa uku chintu chino chaombike.

²² Kuno imyaka ya ntu wiyo wino wachitilwe ichipezya-mano chi icha kupoziwa, yalusile imyaka amakumi yani.

²³ “Nga pano yasapulwa yaya uku antu yao, yayalandila ifintu vyonsi fino yanenilwe naikolo iyakapela nakombe.

²⁴ Nayo pano yapulika yafumya ndi amaswi yao kuli Leesa uku mweso onga, yaati: “Mwene, wewe walengile iyulu ninsi na yemba ni ifintu vyonsi fino vili mwenemo.

²⁵ Newe wavwanzile uku Mweso Nswefu uku nnomo wi tata Daudi, umuofi wako ukuti: ‘Nga fino akulukuwa yalutavya; na antu yelengula ivya uwele-wele?

²⁶ Aene ya nsi yakatukila, na ikolo yamba apali ponga, uku Mwene na Klisto wakwe.’

²⁷ “Kuno umwenemo, Yelodi na Ponsio Pilato ponga na akulukuwa na antu ya mwIslaeli yakonganile umunzi uu, apa uMuofi wako Unswefu, Yesu, wino wampaka amafuta.

²⁸ Ukuti yachite chonsi chino ikasa lyako nu kukunda kwako vyasolwile fuma kali, kuti viombeke.

²⁹ Ichino kasalaka Mwene, lola ukofya kwao, upe aomvi yako ukuvwanga uku chiposye chonsi iswi lyako.

³⁰ Tambalika ikasa lyako upozye, ivipezya-mano ni vizunguko viombeke ukwizina lya uMuofi wako Nswepe Yesu.”

³¹ Nga walangi yapepa Leesa, apantu pano yakonganile patentema; yoshi yazyula uMweso Nswefu, yavwanga iswi li Leesa uku chiposye.

Yatesi wa ya luko longa

³² Niumba lya antu yano yasumile, yali nu mweso onga, kutali umwi wino waatile ichintu chino ali nacho ichakwe wenga, leelo yuminkinye ifintu vyao vyonsi.

³³ Ni mitume ilanda usyuta wa kututuluka kwi Yesu uku maka tupu, ni nkumbu tupu zyawa pano yali yoshi.

³⁴ Nga kutali umwi pali yeneyo wino waulilwe; kuno antu yoshi yano yakwite ivyalo nanti mang'anda, yavikazizye, yaleta impia zya ifintu fino yakasha,

³⁵ yawika apa mulu ya mitume; yankana chila wenga ndi fino waulilwe.

³⁶ Nga Yosefu wino imitume yamtemile i Balanaba (alikuti: mwana wa utekano) um-Levi, akafumo kakwe untu wa ku Kiplo.

³⁷ Wali ni chalo, wakasha, waleta impia apa mulu ya mitume.