Milimo 3 - UPANGANO UPYA

Katenda wenga waposhiwa

¹ Walangi Petlo na Yoane, lino yaluya ponga un-ng'anda-nkulu-iyi-Leesa, ukuyupepa, pano lyatemba,

² nguntu wino wikali tenda ukufuma unda yi nyina, wasendwanga na antu, wino yamwikanga manda yoshi apa nnyango wa ng'anda-nkulu-iyi-Leesa, uno yatangi Wazipa, kuti alombe uwila uku antu yano yalwingila un-ng'anda-nkulu-iyi-Leesa.

³ Untu wiyo pano walola Petlo na Yoane yalwingila un-ng'anda-nkulu-iyi-Leesa, walomba kuti yampe uwila.

⁴ Nga Petlo amkundwila amaso ponga na Yoane, ati: “Tulolekesye.”

⁵ Nga ayalolekesya, ati palumwi akupiwa chimwi nayo.

⁶ Leelo Petlo avwanga, ati: “Nene ntakwite impia nanti zaabu, leelo chino ndi nacho ichino nankupa: Ukwizina li Yesu wa ku Nazaleti, katuka upite!”

⁷ Annema ikasa lya kwilunji, amkatusya; liyo kwene ivilyaatilo vyaakwe na twanankulungo twa mulu yaakwe tuwa na maka.

⁸ Nga avulunka awimilila, atampa ukupita, awingila un-ng'anda-nkulu-iyi-Leesa ponga nayo, apita alutumpoka nu kutensya Leesa.

⁹ Na antu yoshi yannola alupita nu kutensya Leesa.

¹⁰ Nga yammanya fino uwino wikalanga nu kulomba uwila apa nnyango Wazipa uwa ng'anda-nkulu-iyi-Leesa; nga yazunguka nu kukukuma nkani uku chintu chino chachitwa kunali.

Petlo wasunda

¹¹ Nga pano achili alemile Petlo na Yoane, antu yoshi yakongana ulwilo undukungu luno yatangi Ulukungu lwi Salomoni, yazunguka leka.

¹² Na pano Petlo walola fiyo, anena antu yao, ati: “Mwe yaIslaeli, muluzunguka chani uku chintu chi, nanti uku chani mulutukundwila sweswe amanso, ungati twamchita apite uku maka itu swe yakola, nanti uku nchinzi witu kuli Leesa?

¹³ Leesa wi Ablahamu nu wi Isaka nu wi Yakobo, Leesa wi yatata itu, watakusha umuofi waakwe Yesu, wino mwamfimile mwemwe nu kumtaluka apa maaso yi Pilato, pano waputwile unnandu waakwe asapulwe.

¹⁴ Leelo mwemwi mwamtaluka uNswefu wiyo uwa chumi, mwasita ukupiwa umumozi.

¹⁵ Mumola Katungulula wa Upuma, uwino Leesa wamtutulwile ukiu yafwi, neswe tuli yasyuta yaakwe.

¹⁶ Nu ku kuzumila umwozina lyaakwe, izina lyaakwe lyampa amaka untu wi wino mululola na mmanyile; nusumilo uno uli kunali, wampa wi upuma u uwa ningo apa maaso ino mwensi.

¹⁷ “Ichino leelo yachane, manyile fino mwachisile fiyo ukuntamanya kwino, ndi fino nayikolo ino yachisile.

¹⁸ Leelo ifintu fino Leesa wasunzile fuma kali uku milomo ya malau yaakwe yoshi, fino Klisto waakwe aluchula, watavifikilizya.

¹⁹ Vipelini leelo, muwele, kuti amaifyo ino yavulunganyiwe, kuti ize amanda ya kupuza apa Mwene.

²⁰ Kuti atume Klisto Yesu wino mwawikilwe fuma kali;

²¹ fino chalungime ukupokelelwa umwiyulu, fika na lino amanda yalwiza aya ifintu vyonsi ukuchitwa ivipya kaili, yano yatasilwe na Leesa uku milomo ya malau yaakwe aswepe, fuma lino insi yalenzilwe.

²² Umwenemo kuno Mose wafwashile, fino: uMwene Leesa wino alumukatusisha kalauzya, apa achino, ndi fino nene kwene; mpulikini uku ifintu vyonsi fino alumunena.

²³ Nga chiluwa fino untu wensi, wino atalumpulika Kalauzya wiyo, alutalulwa nu kufuma ku antu yanji nu kuononwa.

²⁴ Endi, na malau yoshi ukufuma Samweli na yaya yano yizile ichisila chakwe, yoshi yano yalanzile, yasundaa amaswi ya pa manda ya.

²⁵ Mwemwi mwawa yana ya malau na kaili aya Upangano ulye, uno Leesa walaine na yaso, anena Ablaamu fino um-mpanda waakwe antu yoshi aya kuno ukunzi yalupepelelwa.

²⁶ Leesa pano watutulula uMuofi waakwe watangwile ukumtuma kuno muli, kuti amupepelele nu kumuleusya chila wenga na maifyo yaakwe.”