Milimo 28 - UPANGANO UPYA

Paulo uku Melita

¹ Walangi pano twafyuka, apano tumanya fino imânda yiyo yakuluti: Melita.

² Nga akola-nsi iyo yatulanga ulukundo nkani, yapemba umoto yatupokelela swensi, kuno isemba yalile ititonya nga kwali ni nsusi.

³ Pano Paulo walile atakonganika umwansi wa nkwi nu kuuwika apa moto, isoka yafuma kuno mwawa ichilungula cha moto, yamfyongelesha ukwikasa.

⁴ Akola-nsi, pano yalola isoka itining'ina ukwikasa, yanenana, yaati: “Siku ntu wi umumosi, nawe nanti fino wafyuka muli yemba, ‘Chumi’ chitamtile alalu mpuma.”

⁵ Leelo wene aikampwila um-moto nanti kuchisika.

⁶ Wene yatangi wamvimba, nanti ukupona apansi nu kufwa zuwa. Leelo pano yannolekesya nkani, nanti kulola chimwi chino wachita, yasenuka, wene yavwanga, yaati: i lesa.

⁷ Pipi na penepo kwali ulutala lwa wikolo wa mânda, isina lyaakwe i Publio. Atupokelela uku mweso wa nsânsa, tuwa yeni yaakwe uku manda yatatu.

⁸ Nga chali isi wi Publio alwala inzusi nu kupweka uwazi. Paulo apa kunali, aya mpepela, amwikila makasa yaakwe aya ntwe, ampozya.

⁹ Walangi chaombeka fiyo, alwale ainji um-mânda iyo yiza yapoziwa.

¹⁰ Nayo yatuchindika uku nchinzi nkani. Pano tulupita, yatulongelela ifintu fino tuulilwe.

Paulo waatina uku Melita

¹¹ Ichisila cha myesi itatu tupita um-meli ya ku Aleksandlia, ino yali na kamanyililo ki ya mpundu, imeli iyo yali apa chilewa um-makati ya nzusi.

¹² Pano twafika uku Silakusa, tulinda amanda yatatu.

¹³ Apa kufuma kweneko tulîla, tufika uku Legio. Ichisila cha wanda onga unza wa ku katutu ukatuka, uwanda wa uwili tufika uku Puteoli.

¹⁴ Tuzana achitu kweneko, yasita kuti twikale nayo kweneko amanda saba; palinji tufika uku Loma.

¹⁵ Apa kufika kweneko achitu pano yatupulika, yiza ukutuulila, yatukomenganya ukwi soko lya Apiyo, na pa Migahawa Yitatu. Pano Paulo wayalola, asamalizya kuli Leesa, nga ateku mweso.

Paulo ali ku Loma

¹⁶ Pano twaya uku Loma, Paulo atiwa kuti awikale kuno akasime umwisikulu, angi ali nu nsalifi wa kunnolelela.

¹⁷ Ichisila cha manda yatatu awita ikolo ya aYudea yakongane. Na pano yakongana, ayanena, ati: “Yachane, nanti fino ntachili nchite chimwi ichiipe uku yantu ya kumwitu nanti uku ntambi zyi yatataitu, leelo nafimwa um-makasa ya aLoma na kuno nyefilwe, fuma uku Yelusalemu.

¹⁸ Nga wene pano yantondokesya, yakasime ukunsapula, kuno kutali chimwi kunondi chino ngafwila.

¹⁹ Leelo pano aYudea yakana, nasunkiliziwa kuti nje kuli Kaisali, asikuti nali niswi lya kuyatakila antu ya kumwitu.

²⁰ Ichino mwisile tulolane nemwe nu kuvwanga nene. Kuno nyefilwe nu nyololo u uku nnandu wa utailo wa Islaeli.”

²¹ Nga yannena, yaati: “Tutapasile imbaluwa sha maswi yako ukufuma uku Yudea, kusi uwachitu nanti wenga, wino wisa ku nu kutulandila amaswi nanti ukufwanga chimwi ichiipe kunuli.

²² Leelo tulusita ukupulika kunuli fino uwine. Kuno uku maswi ya dini iyo chimanyike kuno tuli, fino yavwangilwa iviipe konsi konsi.”

²³ Walangi yansolwela uwanda, ainji yiza kunali kuno atenzi, alolola fino chili, angi alwimikila uwene-wi-Leesa, nu kuyasunda uku maswi yi Yesu nu ku maswi ya Ntambi yi Mose ni ya malau ukufuma untondo fika na mangusi.

²⁴ Yamwi yasumile amaswi yaakwe, yamwi yatasumile.

²⁵ Pano yaula ukusumilishanya atupu, yampita, nga pano Paulo wafwanga iswi lyonga li, fino: “uMweso Nswefu wafwansile ningo na yaso ino uku nnomo wi kalausha Isaya,

²⁶ ati: ‘Yanga uku yantu ya, ukayanene: Ukupulika, mulupulika, leelo mutalumanyikisha; ukulola, mululola, leelo mutalumanya.

²⁷ Kuno imyeso ya yantu ya yakoma, na matwi yao yapulama, na maaso yao yasiyata: kuti yatisa yalole na maaso yao, nanti ukupulika na makutwi yao, nanti ukumanya ni myeso yao, nu kusenuka, njaposhe.’

²⁸ Ichino chimanyike kuno muli, fino ufyusi u uwi Leesa, watwalwa uku antu yakulukuwa. Nayo yaluupulika.” [

²⁹ Walangi pano wafwanga fiyo, aYudea yapita yalupa shana ifintu tupu akola na akola.]

³⁰ Awikala imyaka iili un-ng'anda ino wapangile, apokelela antu yoshi yano yayanga kunali.

³¹ Angalusunda amaswi ya wene-wi-Leesa nu kusambilisha ifintu fya Mwene Yesu Klisto uku chiposhe nkani, nanti kulesiwa na umwi.