Milimo 27 - UPANGANO UPYA

Paulo wapita uku Loma

¹ Walangi pano chasoloka, kuti tuye uku Italia, yatwala Paulo nayepwa yanina um-makasa ya nsalifiunkulu, izina lyaakwe i Yulio, amwiumba li Kaisali.

² Tukwela um-meli ya ku Adlamitio, ino yayanga ku misi ya ku Asia; tukatuka na Alistako, umMasedonia wa ku Tesalonike, wali ponga neswe.

³ Uwanda wa uwili tufika uku Sidoni; Yulio ateka Paulo ningo, amwela ukuyulola yakatakwe, kuti yamsunge.

⁴ Ukufuma kweneko, tukatuka tupita ku kaeya apa Kiplo, kuti tupingule unsa kuno uile, kuno unza wali unkomu.

⁵ Pano twachila yemba wa ku Kilikia nu ku Pamfilia, tuya uku Mila, unsi wa ku Likia.

⁶ Nga kweneko unsalifi-unkulu azana imeli ya ku Aleksandlia, iyile uku Italia, nga yatukwezya mwenemo

⁷ Tuwa tulupita uche uche uku manda tupu tufika uku Nido uku uchuzi, kuno unza watulesizye, twapitila imbali ya ku Klete, lwa ku Salmoni.

⁸ Tupitilila ku uchuzi, tufika pi lambwa lino yakuluti: “Ilambwa lizipe,” papalamine nunzi uno yakuluti: Lasea.

⁹ Nga pano manda yavula, ulwendo lutala kaili, kuno amanda ya kuizilizya vyakulya yalile iyasila; nga Paulo ayasokezya, ati:

¹⁰ “Yatata, nalola fino ulwendo lwamwa na machulo, ni ifintu tupu vikulowa, asi nchili ni meli sile, leelo nupuma witu kwene.”

¹¹ Leelo unsalifi-nkulu apulikisya Kapisya nu nkola meli, ukuluta fino Paulo wavwanzile.

¹² Na fino ilambwa liyo litazifile ukwikala penepo amanda ya nzusi, ainji pali yeneyo yakunda kuti yaatine kweneko, kuti ngi chawela, yaye uku Foiniki, nalyo ilambwa lya ku Klete, lino liile uku kaeya kaku kafumandaka, uku katutu kaku kafumandaka, nu kwikala kweneko amanda ya nzusi.

¹³ Walangi unza wa ku katutu wapunga uche, kuno yelengwile fino yanzana chino yasitanga, yaakwesa inanga, yapita pipi pipi umbali yi Klete.

Chipupu muli yemba

¹⁴ Leelo pano inzimbo ichili ikule, ichipupu ichikulu chifuma kweneko, chino yatangi: Eulakilo.

¹⁵ Pano imeli yapumwa, chakanika ukupota unza, tuita kuti isendwe.

¹⁶ Nga pano twapita ulwilo pipi ni mânda ino yatangi Klauda, chitutalila ukukwesha unsuwa, leelo uku maka chawela.

¹⁷ Pano yaakwesha, yaswilisha meli yasumba ifyose ukwisika ya meli; na kuno yopanga ukufyama apantu pano yakuluti: Siliti, isya matanga, nga yasendwa fiyo kwene.

¹⁸ Pano ichipupu chatuwinga, untondo tutangula ukusumbila inchili muli yemba.

¹⁹ Uwanda wa utatu yasumba iviombelo vya meli, uku makasa yao akola.

²⁰ Ilanzi nanti intanda vitalolike uku manda tupu, ni chipupu ichikulu chituuma, wene ichakufyuka tusula.

²¹ Nga pano ikala manda tupu nanti kulya, Paulo awimilila pali yeneyo, ati: “Yatata, mwaali mumpulikisye nene mutachipa inanga uku Klete, nu kupata machulo ya ni vyakulowa.

²² Leelo kasalaka mupulikisye, tekini myenzo, kuno pasi umwi pali mwemwe wino akulowa, siku imeli sile.

²³ Kuno usiku wi leelo malaika wi Leesa, wino nene wakwe, uli wino nkupepa, alile wimilila pipi nene.

²⁴ Anena, ati: ‘Utachopa Paulo, ulungime ukwimilila apa maaso yi Kaisali; na kaili, lola, Leesa watakupa antu yoshi, yano yalupita ponga newe.’

²⁵ Ichino yatata, tekini myenzo, kuno nataila Leesa, nga fino chamwa ifino nali nenilwe.

²⁶ Leelo twansumbwa apa chilewa chimwi.”

²⁷ Walangi usiku wi kumi na uni wafika, pano twasendwa ku na ku muli yemba wi Adlia, usiku apakasi muli yemba yatangi itupalamila ukunzi.

²⁸ Pano yisya ichipimilo, yalola kuli meta makumi yani yakuzika; pano yaya inkolelo yisya ichipimilo kaili, yalola kuli meta makumi yatatu.

²⁹ Yopa kuti tutasumbwa apa mafinga, yasumba inanga zini uku chisila, yasita kuche.

³⁰ Nga yakaomba ya meli, pano yakasi ituke yasye imeli, isya unsuwa muli yemba, ungati yalusita yasumbe inanga zya ku nkolelo.

³¹ Apano Paulo wanena unsalifi-unkulu na salifi, waati: “Eya ngi yatatenzi um-meli, musufyuka.”

³² Nga asalifi yaputula ivyoze vya nsuwa, yaleka upite.

³³ Nga pano ikucha, Paulo apapatila yoshi, kuti yalye ichakulya, ati: “Ilelo uwanda wi kumi na uni, mululolela nu kulalila, mutachili mulye nanti chimwi.

³⁴ Ndumupapata mulye, kuno chingamwazwa uku ufyusi wino. Kuno kusi nanti ulunyele lwa ntwe wa ntu nanti longa luno lukulowa.”

³⁵ Walangi wavwangwa amaswi ya, atola unkate, asamalizya Leesa apa maaso yao yoshi, akunyola atampa ukulya.

³⁶ Apano yoshi yateki myenzo, yalya ichakulya akola.

³⁷ Neswe yano twali um-meli, twali imyanda ili na makumi saba na sita.

³⁸ Walangi pano yikuta, yapunguzya inchili vya m-meli, yasumbi ngano muli yemba.

Meli yafunika

³⁹ Pano kwacha yatamanyile insi iyo, leelo yalola ilambwa, lili ni misenga ukunsi, yakunda ukupisya imeli kweneko ngi chingawela.

⁴⁰ Yaputula ifyose fya nanga, inanga shasyala muli yemba, nu kutontolola ichoze cha usukani, nga yakatusya itanga inono ilya nkolelo uku nsa, yalungama uku luselesenga.

⁴¹ Leelo yafika pano manzi yi yemba yalukomengana, imeli yafyama, ichakunkolelo chasimpa apansi, chalemya kweneko nanti kutelengana, leelo uku chisila chafunika uku maka ya mawimbi.

⁴² Asalifi yelengwile ukumola anyepwa, kuti umwi atowa nu kwituka.

⁴³ Leelo unsalifi-unkulu wakasi ukufyusya Paulo, ayalesha, yatachichita fino yelengwile. Ayanena yano yawesishe ukowa, yatane yausumbile muli yemba, yafumile ukunsi.

⁴⁴ Na yano yasyala, yamwi apa mbao, na yamwi apa ifintu vinina ivya um-meli. Ifino yoshi yafyuka, yafika lumi ukunsi.