Milimo 20 - UPANGANO UPYA

Paulo wapita kaili uku Masedonia

¹ Walangi mpanshela yasila, Paulo awita alondeshi ayateka imyenzo. Alambalikana nayo, apita uku Masedonia.

² Nga pano wapita mwenemo ayateka imyenzo uku maswi tupu, nga aya uku uGliki.

³ Nga pano wikala kweneko imyesi itatu, aYudea yamwamba, pano wakasime ukuya uku Silia, ukupitila muli yemba, nga chanzipila ukuwela nu kupita uku nzila ya ku Masedonia.

⁴ Antu yano yalondekine nawe, Sopatelo wa ku Beleya, umwana wi Pilo, na Alistako na Sekundo, antu ya ku Tesalonike, na Gayo wa ku Delebe, na Timoteo, na Tikiko, na Tlofimo aya uku Asia.

⁵ Leelo antu yao yakolesile yaya yatupemba uku Tloa.

⁶ Pano amanda ya mikate-isi-ninsasyo yasila, tukatuka tupita kuli yemba, tufuma uku Filipi, uku manda yasano tuyazana uku Tloa, twikala kweneko amanda saba.

⁷ Uwanda wa ntangulo uwa kutampa ijuma, pano twalile itukongana, kuti tukunyole unkate, Paulo ayasunda, kuno wakasime ukupita uku wiyulu, nga walundulula fika nusiku apakasi.

⁸ Pano twakonganike umwi golofa kwali yatala tupu.

⁹ Unnumendo wenga, izina lyaakwe i Eutiko, walile atikala apa nswefya, utulo twannema nkani, nga pano Paulo walundulula nkani ukusunda, utulo twamkuta, wapona pansi ukufuma igolofa lya utatu, yalumkatusya atafwa.

¹⁰ Leelo Paulo awika pansi, apona panali, amkumbatila, ati: “Mutachipoma, kuno upuma waakwe uchili ulimo.”

¹¹ Akwela ukwiyulu kaili, akunyola unkate, alya, nga avwanga nayo kazimbo kakulu, fika na pano kwacha, apano apita.

¹² Nga yaleta unnumendo wiyo, angi umpuma, nga yatekana ningo.

Paulo wapita uku Mileto, wakomengana nayikolo ya ku Efeso

¹³ Leelo swemwi tukolela ukuya uku meli, tupita ukuya uku Aso, tusita ukutola Paulo kweneko, ndi fino wakasime, kuno wene wakasime apite uku mulu.

¹⁴ Nga pano watuzana uku Aso, twamwingizya, nga tufika uku Mitilene.

¹⁵ Nga tupita ukufuma kweneko, nu wanda wa uwili tupalamila apa Kio, uwanda wa utatu tufika uku Samo, uwanda wa unni tuya uku Mileto.

¹⁶ Kuno Paulo wakasime ukupitilila uku Efeso um-meli, kuti atazimba umw-Asia. Kuno wapitisya, wakasime ukukolelela uwanda wa Pentekoste uku Yelusalemu fino chingaweleka.

¹⁷ Leelo ukufuma uku Mileto Paulo watuma untu ukuya uku Efeso, ukwita akombe yi kanisa.

¹⁸ Walangi pano yafika kunali, ayanena, ati: “Mwe yakola mumanyile ukufuma uwanda uno nizile uku Asia, fino nali kuno muli lyonsi.

¹⁹ Angi nduombela uMwene uku utonte wonsi nu ku monsozi, na mazosyo yano yanzanile uku uipe wa aYudea.

²⁰ Vino ntafisile ukumulandila chimwi chino chimuzipile, leelo namusambilizya nga apatiswe num-mang'anda.

²¹ Angi ndwimikila aYudea na aGliki yavipele kuli Leesa, nu kuzumila uMwene witu Yesu.

²² Ichino leelo, lolini, nalema inzila ukuya uku Yelusalemu, ntipambwa uku Mweso, ntamanyile chino chikunzana kweneko.

²³ Leelo uMweso Nswefu alungimikila chila nzi fino ukunyepwa na machulo vilundolela.

²⁴ Leelo ntalulanga um-mweso uwikalo wane, kuno chisi chimwi, ndi fino ngamalila insila yane, leelo icha ningo ukumalila ulwendo lwane nuomfi wane, uno napokelile uku Mwene Yesu, ukwimikila iswi-sipe ilya nkumbu shi Leesa.

²⁵ Nga leelo nemwi manyile fino mwemwi mwensi, yano namusundile uwene wi Leesa, angi nduya kuo na ku, mutalundola usyu wane kaili.

²⁶ Ichino ndumunena mwensi apatiswe ilelo li, fino nsi nimpa ya wazi wa ntu umwi.

²⁷ Kuno ntaafisile ukumusunda amaswi ya kukasama konsi ukwi Leesa.

²⁸ Muyisunge imyenzo yino mwe yakola, nufyo onsi, uno Mweso Nswefu wamuchita muwe yangalizi, kuti mulyisye ikongani li Leesa, lino wakazile uku wazi waakwe unkola.

²⁹ Manyile nemwi, fino alula natina imiinzi mikangu ilwingila kuno muli, italuleka ufyo.

³⁰ Na kaili pali mwemwe yalukatuka antu yaluvwanga ifintu vya kulovyanya, ukuti yapulusizye alondeshi kuno yali.

³¹ Ichino mutachilala, welengulini fino imyaka itatu usiku nu nsanya, ntatile ukusokezya chila ntu uku monsozi.

³² Leelo apa kasalaka, namuwika um-makasa yi Leesa nu kwiswi lya nkumbu zyaakwe, lino lingamukuzya nu kumupa upyani ponga na yoshi aswefiwa.

³³ Ntakumbukanga impia nanti zaabu nanti imyenda ya antu.

³⁴ Mwe yakola mumanyile fino amakasa yane ya yaomba uku ifintu fino nasitanga, na yano yali ponga nene.

³⁵ Uku ifintu vi namulangizya, ukuti, apa kulema unnimo vi, chimulungime ukwazwa yano yatawezizye, nu kuntalatila amaswi ya Mwene Yesu, fino unkola wavwanzile, ati: ‘Ukufima kuli ni nkata, kulusile ukupokelela.’ ”

³⁶ Pano wavwanga amaswi ya, afukama, apepa ponga nayo yoshi.

³⁷ Yoshi yalila nkani, yakumbatila Paulo ungalo, yamtunga-tunga.

³⁸ Yawaika um-mweso nkani ukwiswi liyo, lino walanda, fino yatalusya yalolane kaili. Yamsindikila uku meli.