Milimo 18 - UPANGANO UPYA

Paulo uku Kolinto

¹ Ichisila cha ifintu vi Paulo atina uku Atene aya uku Kolinto.

² Alola mYudea umwi, izina lyaakwe i Akila, ukumwao uku Ponto, nawe wizile ukufuma uku Italia amanda mache, ponga nu nchi Pilisila, kuno Kalaudio watanena aYudea yoshi yaatine um-Loma; nga afika kuno yali.

³ Nga fino unnimo wao uwa ufundi wali uli onga, awikala kuno yali yaomba unnimo apali ponga, kuno yalile yamanya kusuma ihema.

⁴ Avwanga nayo nu kutondosyana un-ng'anda yi Leesa manda yoshi aya Sabato, asita ukuyatonsya aYudea na aGliki.

⁵ Leelo Silasi na Timoteo, pano yizile ukufuma uku Masedonia, Paulo aingilwa nkani niswi liyo, aimikila nkani aYudea, fino Yesu i Klisto.

⁶ Walangi pano yapotana nawe nu kumtuka, akung'unta nkungu uku myenda yaakwe, ayanena, ati: “Uwazi wino uwe apa mitwe yino; nemwi nswefile, kufuma kasalaka nanja uku yantu yakulukuwa.”

⁷ Atina kweneko, aya un-ng'anda ya ntu umwi, izina lyaakwe i Titio Yusto, wachindika Leesa, wino ing'anda yaakwe yali lwato wenga ni ng'anda yi Leesa.

⁸ Nga Klispo unkulu wa ng'anda yi Leesa azumila uMwene ponga na yoshi aya ng'anda umwakwe. Akolinto ainji pano yapulika, yazumila, yabatiziwa.

⁹ uMwene anena Paulo usiku um-malele, ati: “Utachopa, leelo vwanga, utachituzya.

¹⁰ Kuno inene ndi ponga newe, kuno kusi umwi wino akukukatukila nu kukuchisa, kuno inene ndi na antu tupu umunzi u.”

¹¹ Awikala kweneko umwaka onga ni myezi sita, angalu sambilizya pano yali iswi lyi Leesa.

¹² Leelo pano Galio wali unnâsi wa Akaya, aYudea yakatukila Paulo uku mweso onga, yanneta umwi tengo.

¹³ Angi yaluti: “Untu wi alukwesa antu ukupepa Leesa uku nzila ino itaine nisunde.”

¹⁴ Paulo nawe pano wakasi avwange, Galio wanena aYudea, waati: “Ngi untu wi watachita chimwi chaipa, nanti uipe umwi, mwe a Yudea, twali tupulikane nemwe.

¹⁵ Leelo ndi milandu ya maswi na mazina na masunde ino putulangi mwenga, ntakasi ukuwa mputuzi wa milandu ndi yi.”

¹⁶ Ayawinga umwitengo.

¹⁷ Nga yoshi yalema Sostino unkulu wa ng'anda yi Leesa, yamuma umwitengo. Leelo Galio atalangile nanti umweso.

Paulo wasuwila uku Antiokia

¹⁸ Nga ichisila cha ifintu vi Paulo watenzi amanda tupu kweneko, nga alambalikana nachakwe, apita ukuya uku Silia. Pilisila na Akila yapita ponga nawe, watangula wapela inyele uku Kenklea, kuno walafila ichilapo.

¹⁹ Nga yafika uku Efeso, ayasya kweneko. Wene aya un-nganda yi Leesa angi alutondosyana na aYudea.

²⁰ Nga pano yannena kuti awikale nayo amanda yamwi, akana.

²¹ Leelo alambalikana nayo, ati: “Nduwela kaili ndi Leesa wanjulila.” Apano apita muli yemba, atina uku Efeso.

²² Nga pano waya uku Kaisalia, aya ukuyulaulana ni kanisa, nga aya uku Antiokia.

²³ Walangi wamala amanda yamwi kweneko, atina, asalala un-nsi ya Galatia ni Filigia, angaluyapa amaka alondeshi.

Apolo uku Efeso

²⁴ Kwali umYudea umwi, izina lyaakwe i Apolo, untu wa ku Aleksandlia, untu wa mano, ayu ku Efeso. Nawe wamanyikisha aMaandiko.

²⁵ Untu wi wasambilishiwa insila ya Mwene, na fino umweso waakwe wakanga, atampa ukulanda nu kusambilisha ningo ifintu fya pali Yesu, wamanile ulubatisho lwi Yoane sile.

²⁶ Atampa ukufwanga uku chiposhe un-ng'anda yi Leesa. Pilisila na Akila, pano yampulika, yamsenda ukumwao, yannondola inshila yi Leesa ningo.

²⁷ Nga pano wakasi ukulamba yemba, aye uku Akaya, achitu yamkomelesha, yaandikila alondeshi yao ukumpokelela. Nawe pano wafika, ayazwa nkani yano yazumila, uku nkumbu shi Leesa.

²⁸ Kuno waposile nkani aYudea apa maaso ya antu yoshi, angi aluyalanga umMaandiko fino Yesu uli Klisto.