Milimo 16 - UPANGANO UPYA

Timoteo ponga na Paulo na Shilasi

¹ Nga afika uku Delbe nu ku Listela. Na po pali unndondeshi umwi isina lyaakwe i Timoteo, umwana wa mwanachi mYudea, wino wazumila, leelo isi wali mGliki.

² Untu wiyo wavwangilwaa ivizipe nanina yano yali um-Listela nu mwIkonio.

³ Paulo asita ukuti apite ponga nawe, amsenda aya amchita ichibalu, uku nnandu wa aYudea yano yikalanga kweneko. Kuno yoshi yamanyile fino isi wali mGliki.

Paulo walola malele uku Tloa

⁴ Nga pano yapitanga um-mizs iyo, yayapa amasunde, yano yanenilwe ni mitume nakombe, yano yali um-Yelusalemu, ukuti yayaleme.

⁵ Un-kusumila makongani yatelwa amaka, yawa yalungilisika chila wanda.

⁶ Nga yapita un-nsi ya Filigia ni Galatia, uMweeso Nswefu wayalesya ukusunda iswi um-Asia.

⁷ Walangi pano yafika uku Misia, yezya ukuya uku Bitinia, leelo uMweso wi Yesu atayazumile ukuya.

⁸ Nga yapitilila Misia, yaya uku Tloa.

⁹ Usiku Paulo amalele yamwisila; alola untu wa ku Masedonia awimilile ampapatila, ati: “Lamba uwize utwazwe uku Masedonia.”

¹⁰ Nga pano walangi walola amalele yao, liyo kwene tusita ivyakuti tulambe ukuya uku Masedonia, kuno mwenemo twawine fino Leesa alutwita tukayasunde iswi-zipe.

Kufyusiwa kwi Lidia

¹¹ Nga twakwezya inanga, twafuma uku Tloa, tufika uku Samotlase ukwi tanga lyonga, nu wanda wa uwili tufika uku Neapoli.

¹² Nu kufuma pao tuya uku Filipi, unzi wa ntangulo wa wilaya iyo ya Masedonia, uno ikoloni lya aLoma. Nga twikala umunzi uo amanda yamwi.

¹³ Ngu wanda wa Sabato tufuma umunzi, tuya ukumbali ya luzi, kuno twatangi palumwi pali ukwa kusalikila; twikala tukomengana na anachi yano yakonganile penepo.

¹⁴ Umwanachi wenga izina lyaakwe i Lidia, kakazya wa myenda ya zambalau, uwa umunzi wa Tiatila, wene fino wachindika Leesa, atupulikisya. Nawe uwino uMwene wayuzile umweso wakwe, akôzya amaswi yano Paulo wavwanzile.

¹⁵ Nga pano wabatiziwa na ya ng'anda umwakwe, atupapatila, ati: “Ngi mundola nene wa kutailwa um-Mwene, tuyini mukikale uku ng'anda ukwane.” Nga atuchitila amaka.

¹⁶ Walangi pano tuluya apa kusalikila, tukomengana nu nsungu umwi ali ni ngulu, wino akuletela aene yaakwe usavi tupu uku kusapola.

¹⁷ Alondela Paulo neswe angalwangula, ati: “Antu ya aomvi yi Leesa wa kwiyulu, yano yalumusunda inzila ya ufyusi.”

¹⁸ Angaluchita fiyo kwene amanda tupu. Leelo Paulo chimwaya, aseleuka, anena ichiwa chiyo, ati: “Ndukunena ukwizina li Yesu Klisto, ufume um-ntu wi.” Liyo kwene chimfuma.

Paulo na Shilasi yalemwa uku Filipi

¹⁹ Nga aene yaakwe, pano yalola utailo wa usavi wao wayafyuntunka, yalema Paulo na Shilasi, yayakolezya uku sokoni fika na pa maaso ya ikolo ya nzi.

²⁰ Yayasenda ukwitengo, yaati: “Antu ya aYuda yaluleta mpanzyela umunzi witu.

²¹ Na kaili yalulimvya amaswi ya ntambi, sino sitazifile kuno tuli ukuzipokela nanti ukuzilondela, kuno sweswe yaLoma.”

²² Amaumba yoshi yafuma yayaila, aputuzi yafima ichilangaso, yayalepwile imyenda yao uku maka, yumwe ni ntuwa.

²³ Nga pano yayumisya ivyumo, yayatwala umu nyololo, yapa Kalolela wa ng'anda-ya-minyololo ichilangaso, ayalolele ningo.

²⁴ Nawe pano wapiwa ichilangaso chiyo, ayatwala un-ng'anda unkasi, ayapantika amulu un-chimbao, ayanyepa.

²⁵ Leelo usiku apakasi Paulo na Silasi yalombanga Leesa nu kunnundila imyimbo ya kumtensya, na anyepwa anji yayapulikisyanga.

²⁶ Suwa kuwa ichitentema ichikulu un-nsi, apalinji fiimbili vya ng'anda-ya-minyololo vitelengana; liyo kwene imilyango iyulika, ivinyepelo visapuka kuli yoshi.

²⁷ Kalolela wa ng'anda-ya-minyololo alanka, nga pano walola imilyango ya ng'anda-ya-minyololo itiyulika, asomola impanga, asita uku ukulika, watangi anyepwa iyituka.

²⁸ Leelo Paulo afumya iswi lyaakwe uku maka, ati: “Utauchisa, kuno swensi tulipo pa!”

²⁹ Asita yalete nkosho, atumpukila unkasi, alutetema uku ngofi, apona pansi pali Paulo na Shilasi.

³⁰ Nga ayafumya apasi, ati: “Yatata, ngachita uli, kuti nfyuke?”

³¹ Yannena, yaati: “Sumila uMwene Yesu, newe wanfyuka, ponga na ya ng'anda umwako.”

³² Nga yannena iswi lyi Leesa, unkola na antu yoshi aya ng'anda umwakwe.

³³ Ayasenda liyo kwene ilya usiku, ayafula ivyumo vyao, nga liyo kwene abatiziwa unkola na antu yaakwe yoshi aya ng'anda umwakwe.

³⁴ Ayaleta un-ng'anda umwakwe, ayapa ichakulya, achimba nkani, unkola na yang'anda umwakwe yoshi, kuno watazumila Leesa.

³⁵ Walangi kwacha, aputuzi yatuma ayikolo ya asalifi ukunnena ukuti: “Ayate antu yao, yaupitile.”

³⁶ Kalolela wa ng'anda-ya-minyololo wanena Paulo, waati: “Aputuzi iyatuma antu kuti musapulwe; ali fumini apanzi, mupite lumi.”

³⁷ Leelo Paulo wayanena, waati: “Iyatuuma apa maaso ya antu yoshi nanti kutuputwila unnandu, neswe sweswe yaLoma, na kaili yatutwite un-ng'anda-ya-minyololo. Nga yalusita yatufumye uku mbali? Awe, chisi fiyo, yize akola yatufumye.”

³⁸ Akulu ya asalifi yanena aputuzi amaswi ya. Nayo yopa, pano yapulika fino aLoma.

³⁹ Yiza yayakopelezya, nga pano yayafumya un-ng'anda-ya-minyololo, yayapapata, yaatine umunzi ulye.

⁴⁰ Nayo yafuma uku ng'anda-ya-minyololo, ingila un-ng'anda yi Lidia, nga pano yalolana nachao, yayateka imyenzo, nga yampita.