Milimo 15 - UPANGANO UPYA

Ikongani lyakongana uku Yelusalemu

¹ Nga isa antu ukufuma uku Yudea yasambilisha achao, fino ngi mutachisilwe ichibalu ukuyana ni ntambi yi Mose, mutangi mufyusiwe.

² Nga pano Paulo na Balanaba yapashanya na antu yao nu kutondoshana nayo nkani, yalanda fino Paulo na Balanaba na yamwi pali yeneyo, yapite uku Yelusalemu uku mitume nakombe, uku maswi ya chintu chiyo.

³ Ngi kanisa liyasindikila, yapita apakasi ya nsi ya Foiniki ni Samalia, yachimvya nkani anina yoshi, pano yayalandila fino akulukuwa yafyusiwa.

⁴ Pano yafika uku Yelusalemu, yapokelelwa ni kanisa ni mitume nakombe, nayo yayalandila ifintu vyonsi fino Leesa waomba ponga nayo.

⁵ Leelo yamwi amwiumba lya aFaliseo yano yazumila, yakatuka nukuti: “Chilingine yachitwe ichibalu nu kuyanena yaleme intambi yi Mose.”

⁶ Imitume nakombe yakongana, ukuti yalole iswi liyo.

⁷ Nga pano yapazyana, Petlo akatuka, ayanena, ati: “Yachane, umwemwe mumanyile fino fuma amanda ya ntangulo, Leesa wansolwile pali mwemwe, ukuti akulukuwa yapulike iswi-zipe uku nnomo wane nu kulizumila.

⁸ Na Leesa wino amanyile imyenzo ya antu, aimikila, ukuyapa uMweso Nswefu, ndi fino neswe kwene watupile.

⁹ Nga atali nu solozi pali sweswe nayo, ayaswefya imyenzo yao uku usumilo.

¹⁰ Ali nga fino mulwezya Leesa ku kuwika inkonkoli uku ngalo zya alondeshi, ino yatata itu nanti usweswe tutachili tuisende.

¹¹ Leelo tuzumile fino tulufyusiwa uku nkumbu zya Mwene Yesu vivi kwene wi yao.”

¹² Ngiumba lyonsi likala chele, lyapulikisya Balanaba na Paulo, yayalandila amaswi ya vilangizyo ni vipezya-mano fino Leesa wachita uku utume wao uku akulukuwa.

¹³ Nga pano yao yatuzya, Yakobo avwanga, ati: “Yachane, mpulikisyini!

¹⁴ Simeoni watatulandila fino apa ntangulo Leesa walolekisye akulukuwa, kuti asolole antu pali yeneyo uku nnandu wizina lyaakwe.

¹⁵ Na maswi ya malau yazumilizinye, ndi fino chaandikwe:

¹⁶ ‘Ichisila cha ifintu fiyo nduwela, nene ndukula kaili nsaka yi Daudi yino yaponile, ndukula kaili pano papona. Nene nduimika kaili.

¹⁷ Ukuti antu yano yasyala yasite uMwene, na akulukuwa yoshi yano izina lyane lyalandwa kuno yali.

¹⁸ Avwanzile uMwene wino aluchita ifintu fiyo fino wavimanyisya fuma kali.’

¹⁹ “Ichino fiyo nemwi nati, tutachichuzya akulukuwa, yano yasenukila kuli Leesa.

²⁰ Leelo tuyaandikile, fino yaleuke uku vilui, ni vya upundu, ni nyama i icha uwila, nu wazi.

²¹ Kuno fuma kali Mose ali na antu yano yalusunda ifintu vyaakwe, um-mizi yoshi akulusomwa, manda yoshi ayi Leesa um-mang'anda yao iyi Leesa.”

Imbaluwa uku azumila asi aYudea

²² Nga chazipa apa mitume nakombe ni kanisa lyonsi, ukusolola antu yamwi pali yeneyo, nu kuyatuma uku Antiokia ponga na Paulo na Balanaba; yasolola Yuda wino yatangi Balasaba, na Silasi, yano yali antu yamanyika apa yanina.

²³ Yaandika vi nu kutwala uku makasa yao: “Imitume nakombe uku achitu ya ku akulukuwa, yano yali uku Antiokia nu ku Silia nu ku Kilikia: tulumulaula wa achitu.

²⁴ Kuno twapulika, fino antu, yano yafumile kuno tuli yalulukumususya uku maswi yao, nu kumusimya uku myenzo ino, yano neswe tutayatumile.

²⁵ Swemwi twalola ningo, twapulikana ukumweeso onga, ukusolola antu nu kuyatuma kuno muli, ponga nakunde yitu Balanaba na Paulo;

²⁶ antu yano yaufimile ukwizina lya Mwene witu, Yesu Klisto.

²⁷ Ichino twatuma Yuda na Silasi, yano yalumunena akola amaswi yao kwene uku milomo yao.

²⁸ Kuno chazipile uMweeso Nswefu ponga neswe, tutamutwika ichisendo, siku chino chiile.

²⁹ Alikuti: Muleuke uku ifintu vyafimwa uwila uku vilui, nu wazi, ni nyama i icha uwila, ni vya upundu. Ngi mwaukôla ni ifintu fiyo, mukuwa mwachita ningo. Kati lumi!”

³⁰ Nga pano yao yayalambalika, yapita ukuya uku Antiokia, na pano yakonganya ikongani lyonsi, yayapa imbaluwa iyo.

³¹ Nayo pano yaisoma, yachimba uku utekezyo uo.

³² Nga fino wene Yuda na Silasi yali ayakalauzya, yayanena achitu ku maswi tupu, yayakomya.

³³ Nga pano ikala kweneko manda yamwi, yasindikilwa nachitu ukupita lumi kuli yano yayatumile. [

³⁴ Leelo wene Silasi alola ningo ukusyala kweneko.]

Paulo na Balanaba yatana

³⁵ Paulo na Balanaba yikala uku Antiokia, angi yalusambilizya nu kusunda iswi lya Mwene, ponga na antu yanji tupu.

³⁶ Ichisila cha manda yamwi Paulo anena Balanaba, ati: “Wewe! tuwele tukalole achitu yao chila nzi, muno twasunzile iswi lya Mwene, ngi yali uli.”

³⁷ Balanaba asita, kuti Yoane wino yatangi Malko, apite ponga nayo.

³⁸ Leelo wene Paulo atakasime kupita ponga na wiyo, wino wayasile uku Pamfilia, atapita ponga nayo um-milimo.

³⁹ Nga yampazyanya, apalinji yatana. Balanaba wapita ponga na Malko, yaakwela um-wato ukuya uku Kiplo.

⁴⁰ Paulo nawe wasolola Silasi, apita, angi alupepelwa nachitu yalye, apiwe inkumbu zya Mwene.

⁴¹ Apita un-Silia ni Kilikia angi alukomya makongani.