Mateo 5 - UPANGANO UPYA

Yesu wasunda uku mwamba

¹ Nawe pano wawine maumba, wakwezile uku mwamba, nga pano wikala, alondeshi yaakwe yaya kunali.

² Wavwanga uku nnomo wakwe, wayasambilizya, waati:

³ “Inkata yao apina ya mweeso, kuna uweene-wa-mwiyulu uwao.

⁴ “Inkata yao ali na malaanda, kuno weene yalusungulwa:

⁵ “Inkata yao afyaaliike, kuno weene yalupyaana insi.

⁶ “Inkata yao a ansala nu unsala uku chumi, kuno weene yalwikuta.

⁷ “Inkata yao yano yalukumbukila, kuno wene yalukumbukilwa.

⁸ “Inkata yao aya myeso misiifu, kuno weene yalunnola Leesa.

⁹ “Inkata yao yakupulikanya, kuno weene yalwiitwa ana yi Leesa.

¹⁰ “Inkata yao yano yasuumwa uku fya chumi, kuno uweene-wa-mwiyulu uwao.

¹¹ “Inkata yino mweemwe yano mulutukwa nu kusunywa nu kumwifikisha chila iswii liyifu uku ufii, uku ndaandu waane.

¹² Chimbiini nu kuchimbilila, kuno mululambulwa ichikulu umwiyulu; kuno ifino yayasunyile yakalausha yano yali inkoleelo yiino.

Unsilya nu mwengelela

¹³ “Mwemwe nsilya wa nsi; leelo ndu unsilya utakaliipe, ungateela chaani, kuti unone? Chitasiifile kayiili, leelo ukusuumbwa apaasi, nu kulyaatwa na aantu.

¹⁴ Mwemwe mwengelela wa nsi. Unsi utaangi ufisame ndi uli apa mwaamba apiyulu.

¹⁵ Na aantu kweene yasulukosha koloboi yawiika un-nyiingu, leelo yakuwiika apiyulu, nga nawe asweefesha yooshi yano yali un-ng'aanda.

¹⁶ Ifino nu mwengelela wino kweene uswefezye aantu, yalole imilimo yino imisiifu, yalumbaanye So wino wa mwiyulu.

Yesu wafwaanga pa Ntambi

¹⁷ “Mutachelengula muti: ngisile ukonoona Masuunde nanti yakalausha; awe, ntishile kwiisa ukonoona, leelo ukufikilisha.

¹⁸ Kuno mwenemo, ndumunena: kufika lino iyulu ni nsi filushila, yota yoonga nanti tonoontwa lyoonga lya Masuunde litalutiina, kufika na lino yooshi yawa.

¹⁹ Ichino untu weeshi wino waacha onoona isuunde lyoonga inoono pali yao nu kusambilisha aantu fiyo, alwiitwa unnoono nkaani um-weene-wa-mwiyulu; leelo wino aluyaoomba nu kuyasambilisha, wiyo alwiitwa uwikolo um-weene-wa-mwiyulu.

²⁰ Kuno ndumuneena, fino ichumi chino, ndi chitalusila ichumi chi yakaandika na aFaliseo, mutalwingila nanti kache um-weene-wa-mwiyulu.

²¹ “Mwapulika fino aantu ya kali yanenilwe: ‘Utachumoola; nu ntu wino wumoola, aluputwilwa undaandu.’

²² Leelo neemwi ndumuneena: fino uuntu ndi waloleela unniina ichilaakali, aputwilwe undaandu; nu ntu ndi watuka unnina, atwalwe apiteengo; nu ntu ndi waati: Chiwila, alutwalwa un-chilinkwe cha mooto.

²³ Ichino ndi waleeta uwiila waako uku altaale na ku ndi wizukila fino unnyoonko ali niswii kuli weewe,

²⁴ ushe uwiila waako apa altale, uye mukapulikane nu nnyoonko, nga pano uweele uwise ufiime uwiila waako.

²⁵ Pulikani nu mwanisi waako suwa, pano muchili muli nawe un-nsila, kuti umwanisi waako atiise akutwaale uku Mputushi, nu Mputushi akutwaale uku nsalifi, nawe akuntwaale uku nyololo.

²⁶ uMwenemo ndukuneena: utangufume muo nanti kache, kufika na lino wamalila ukulipa ulupia lwa kumaliila.

²⁷ “Mwapulika, fino chafwaashilwe: ‘Utachita ifya upuundu.’

²⁸ Leelo neemwi ndumunena, fino untu weeshi ndi walolekesha umwaanachi uku kumkumbuka, watachita ifya upundu nawe um-mweeso waakwe.

²⁹ Ni liiso lyaako ilya kwi luunji, ndi lyaleka wanoona, ulifyonkole, ukalisuumbe ukutali neewe, kuno chingakusiipila ichai chaako choonga chilowe, kuleka umwiili waako wooshi, utiisa ukasuumbilwe un-chilinkwe cha mooto.

³⁰ Nikasa lyaako lya kwi luunji, ndi lyaleka wonoona, liputule, lisuumbe ukutali neewe, kuno chingakusiipila ichai chaako chonga chilowe, kuleka umwiili waako wooshi usuumbilwe un-chilinkwe cha mooto.

³¹ “Kaili chafwashilwe, ‘fino untu ndi wata unchi, ampe ulucheto lwa kunta.’

³² Leelo neemwi ndumuneena, fino untu weeshi wino wata unchi, ndasi un-ntaambi ya upuundu, angi wannchita ukuwa umpuundu, nu ntu ndi wasaka wino yaata, aongi aluchita ifya upuundu.

³³ “Kayili mwapulika aantu ya kali fino yaneenilwe: ‘Utachilapa uufi, leelo ufikililishe uMweene ifilapo fyaako.’

³⁴ Leelo neemwi ndumuneena, fino utachilapa naanti wuche; naanti uku fya mwiyulu, kuno aali chisuumbi-cha-wene ichi Leesa.

³⁵ Naanti uku nsi, kuno uli pakuwikila amuulu yaakwe; naanti uku Yelusalemu, kuno ali unsi wa Mweene nkulu.

³⁶ Utachilapa naanti uku ntwe waako, kuno utanguchite ulunyetelwako naanti loonga ukuwa ulufwi naanti ululuku.

³⁷ Leelo amaswi yino yawe Ee, Ee; Aawe, Aawe. Kuno ndi yano yaluta pao aangi yafuma kuli wiwi Unjiipe.

³⁸ “Mwapulika fino chafwaangwa: ‘Iliinso kwi liinso, ni liino ukwi liino.’

³⁹ Leelo neemwi ndumuneena, fino mutachipashanya nu njiipe; leelo ndu ntu wino wakuuma itama lya kwi luunji, insenwiile ni lya uwiili.

⁴⁰ Nu ntu wino alusita uku kusongelela nu kutoola inkaanjo yaako, inshile ni kooti kweene.

⁴¹ Nu ntu wino wakufyengelesha ukupita kilometa yoonga, pita nawe shiyili.

⁴² Wino wakuloomba, mpe; na wino alushita ukukopa, utachimpa inkoonto.

⁴³ “Mwapulika chafwaangwa, fino: ‘Ukunde unnyoonko,’ na: ‘Utuwe siluweembu waako.’

⁴⁴ Leelo neemwi ndumuneena, fino mukuunde asiluweembu yino kweene, muyalombela yano yamusunya.

⁴⁵ Kuti muwe ana yi Tata wino winali umwiyulu. Kuno weene akuluyakosesha ilaashi lyaakwe uku yayifu na asiifu; akululeeta iseemba uku ya chuumi na iyaashi chuumi.

⁴⁶ Kuno ndi mwakuunda yano yamukuunda mweemwe, aangi mwapata chintu wuli? Na yakalifya yi kodi, Cheene! yasuluoomba fiyo kweene?

⁴⁷ Kayili ndi mwandaula anyoonko yatupu, aangi mwachita chaani ukuluta aanji? Naanti antu ya akulukuwa, Cheene! yasuchita ndi fiyo kweene?

⁴⁸ Ichino neemwe muyaane, ndi fino So wino uwa mwiyulu wayaana.