Mateo 28 - UPANGANO UPYA

Yesu watutuluka

¹ Nga pano Sabato yasila, kulucha uwaanda wa ntangulo, Malia wa ku Mandala na Malia wiiwi uwa uwili, yaile ukuyulola iliindi.

² Nga lolini, kuwa ichitetema ichikulu apaasi, kuno malaika wa Mweene wikile ukufuma ukwiyulu, wiisa wakunkulusha ifiinga liili, walikalila.

³ Nu uushu waakwe wakoshile ulukosha, ni myeenda yaakwe imitiswe wa theluuji.

⁴ Nga uku ngofi yano yanndolelelanga, yatetema, yawa kanti iyafwa.

⁵ Leelo malaika wanena anachi yalye, waati: “Mwe mutachoopa; kuno manyile fino mulusita Yesu wino wumozilwe.

⁶ Asipo pa, kuno watatutuluka ndi fino watashile; nguni mulole pano wawizi.

⁷ Neemwe yangini suwa, mukayeneene alondeshi yaakwe, fino watatutuluka uku yafwi. Lolini, wamukolelela ukuya uku Galilea, ukuno mulunndola; lolini, intimunena.”

⁸ Nga yafuma suwa ukutina apiliindi ukungofi nu kuchimba, yituka ulwilo ukuyunena alondeshi yaakwe amaswii.

⁹ Nga lolini, Yesu akomengana nayo, afwaanga ati: “Ndumulaula.” Nga yapalamila, yannema amulu yanfukamila.

¹⁰ Apano Yesu ayanena, ati: “Mutachopa; yangini mukayaneene achane yaye uku Galilea, ukuno yalundola.”

Ufi wa yikolo ya a Yudea

¹¹ Nayo yao pano yapitaanga, lolini, yamwi apa asalifi yingile umunsi, yalandile ayikolo iyakapela amaswii ya ifiintu fyooshi fino ifiombeka.

¹² Nga yakongaana poonga na koombe, yafwaanga uku nndandu wa kuti yape asalifi impia tupu.

¹³ Yaati: “Mulande fino alondeshi yaakwe yishile ushiku, yamwiya, pano tulile ukulaala.

¹⁴ Niswii li ndi lyamanyika uku unndâsi, sweeswe tuluvfwaanga nawe, neemwe musuwa niswi.”

¹⁵ Nga yatola impia shiyo, yachita ndi fino yanenilwe. Niswii liyo lyamanyika uku a Yudea fika nileelo li.

Yesu watuma alondeshi yaakwe

¹⁶ Nga yaya alondeshi ikumi na weenga yaaya uku Galilea uku mwaamba uno Yesu wayanenile.

¹⁷ Nayo pano yanndola, yamfukamila. Leelo pali yeneyo yamwi yasisita.

¹⁸ Nga Yesu awiisa kuno yali, afwaanga nayo, ayanena aati: “Napiwa amaka yooshi umwiyulu na paasi.

¹⁹ Ichino yangini mukachite antu yooshi ukuwa alondeshi yaane, muyabatishe ukwiishiina li Taata ni lya Mwaana ni lya Mweeso Nsweefu.

²⁰ Nu kuyasambilisha ukulondela fyooshi fino namunena mweemwe. Nga lolini, ineene indi poonga neemwe amaanda yooshi kufika nu kusila kwansi.”