Mateo 27 - UPANGANO UPYA

Yesu pali Pilato nu kufwa kwi Yuda

¹ Nga pano wawa untoondo, ayikolo iyakapela yooshi na yikolo ya antu yafwaanga isha pali Yesu, ukuti yamumole.

² Nga yannyepa, yankolesha yantwala kwi Pilato, wino wali unnâsi.

³ Apano Yuda, wiiwi wino wanfimiile, pano walola iyamputwila unndandu wa kufwa, umweeso uwela, wayapilusisha ayikolo iyakapela na ayikolo fiifi ifipaande vya mpia amakumi yatatu,

⁴ walaanda waati: “Nononile pano nafimile uwaashi uno usi niifyo!” Leelo weene yannena, yaati: “Ala! Alaya nga yitu? Yalolange yao wenkola!”

⁵ Wasumbile ifipande fiyo ifya mpia un-ng'anda-nkulu-iyi-Leesa, wampita waya waikulika.

⁶ Ayikolo iyakapela yatola ifipande fiyo ifya mpia, yalaanda, yaati “Chitayiile ukushiwiika um-mbokosi ya mpia, kuno isha waashi.”

⁷ Yafwaanga apalipoonga yafiombele ukukala ichaalo chi nakamata, chiwe icha kushiikaa yeeni.

⁸ Ichino ichaalo chiyo ni leelo kweene chikulwitwa. “Ichaalo cha waashi.”

⁹ Chaleka lyawa iswii lino kalausha Yelemia wafwanshile, ukuti: “Yatoshile ifipande amakumi yatatu fya mpia, umpangila waakwe wino wapangilwa, wino yamwi apa aIslaeli yanchitile umpangila.

¹⁰ Yafiombela uku kukala ichaalo chi nakamata, ndi fino uMwene wantumile.”

Pilato waputula unndandu wi Yesu

¹¹ Nga Yesu awimilila apa unndâsi; nga unndâsi wantondosha, waati: “Weewe uli mweene wa a Yudea?” Na Yesu wannena, waati: “Weewe walaanda.”

¹² Leelo pano ayikolo iyakapela na akoombe yansitachi, atachili afwaange chimwi.

¹³ Apano Pilato wannena, waati: “Chene! utapulike ifintu vinga fino yakwimikila?”

¹⁴ Leelo weene atachili afwaange iswii naanti lyoonga; chaleka unndâsi wasunguka ndi.

¹⁵ Nga apa waanda ukulu, unndâsi wali ni ntaambi ya kusapwiila iumba untu weenga wino wanyepwa, wino yakuunda.

¹⁶ Nga pa maanda yaaya kweene pali untu unyepwa, wino walumbuka. Ishiina lyaakwe i Balaba.

¹⁷ Nga pano yakongana, Pilato wayanena, waati: “Mulusita msapwile wini? Wiwi Balaba naanti Yesu, wino yakuluti Klisto?”

¹⁸ Kuno wamanyile fino yantwashile uku usuwa.

¹⁹ Nga pano walile atikala apa chisuumbi-cha-kuputwilaimilandu, unchi watumile untu ukunnena ukuti: “Utise uchite chimwi uku ntu wiyo uwa chuumi, kuno ilelo ninchuula ifyavula uku tulo uku ntu wiyo.”

²⁰ Nayo ayikolo iyakapela na koombe yachufyanya amaumba, kuti ayasapwiile Balaba, yumoole Yesu.

²¹ Nga unndâsi wayanena, waati: “Mulushita msapwile wini pali ya yayili?” Yalanda yaati: “I Balaba!”

²² Pilato wayanena, waati: “Nga inchite uli Yesu wino yaluti iKlisto?” Yalanda yooshi, yaati: “Aumoolwe!”

²³ Wafwaanga, waati: “Kuno ichaani? Uyifu chi! uno wachita?” Nga yalusha nkaani ukuma choongo nukuti: “Aumoolwe!”

²⁴ Nga pano Pilato walola chakoma ni mpansheela ilulu kukula, watola amaasi, wafulala amakasa yaakwe apiumba, waati: “Ineene nsimoo um-waashi wa ntu wi uwa chuumi; umupeleele mwe yakola.”

²⁵ Aantu yooshi yalaanda ukuti: “Uwaashi waakwe utupelele sweeswe ponga na ana yitu.”

²⁶ Apano wayasapwila Balaba, leelo wamuma Yesu ni mikowa, anfima ukuti yakamumoole.

Asalifi yasoweka Yesu

²⁷ Apano asalifi ya unndâsi yanseenda Yesu umu Pleitolio (alikuti: ng'anda yi Gavana) niumba lya asalifi yankonganila,

²⁸ nga yansuula umweenda waakwe, yanswika umweenda unkasuke.

²⁹ Yaluka inkata ya myoonga, yanswika uku ntwe. Nga yampa ilonje kwikasa lyaakwe ilya kwiluunji, yafukama panali, yansoweka, angi yaluuti: “Tulukulaula, mweene wa aYudea.”

³⁰ Nga yapuutila amati, yatola ilonje yamumauma nalyo apa ntwe.

³¹ Nga pano yansoweka yansula umweenda ulye, yanswika imyeenda yaakwe, yanseenda ukuyumumoola.

³² Nga lino yalufuma, yalola untu wa ku Kilene, ishiina lyaakwe Simoni; nga yanfyengelesha ukuti asende unsalaba waakwe.

Yesu wakonkomelwa apa nsalaba

³³ Nga pano yafika apantu pano yataangi Golgota, ulikuti: “Ipanga lya ntwe.”

³⁴ Yampa amaasi ya misabibu, yano yuminkine ni nyeengo, kuti anwe; leelo pano wasumpula wakana ukunwa.

³⁵ Nga pano yankonkomela apa nsalaba, yankanya imyeenda yaakwe, yachita chimala-mpaka, (ukuti liloleka lino ilau watasile, ukuti: Yankine imyenda yane apa yakola, na pa mwenda wane yachiti chimala-mpaka.)

³⁶ Nga yikala ukunndolela pao kweene.

³⁷ Nga yaandika amaandiko ya unndandu waakwe, yawika apiyulu apa ntwe waakwe, angi yaatile: “ALAWI YESU, MWEENE WA AYUDEA.”

³⁸ Liyo kweene aifi yayili yumoolwa poonga nawe, weenga ukwikasa lyaakwe ilya kwiluunji, na weenga ukwikasa lyaakwe ilya kuli kamani.

³⁹ Nga yano yapitaanga un-sila angi yaluntuka, angi yalupukusha imitwe yao, yaluti:

⁴⁰ “Weewe wino ukupomola ng'anda-nkulu-iyi-Leesa nu kuikuula uku maanda yatatu, uufyusye wenkola; ndiwe mwaana wi Leesa, wika uku nsalaba.”

⁴¹ Na yikolo iyakapela nayo kweene yansoweka, poonga na yakaandika na akoombe, yaati: “Wafyushishe aanji, atangi aufyusha unkola.

⁴² Ali mweene wa Islaeli ichino leelo awike uku nsalaba, neeswe twammsumila

⁴³ Wataila Leesa; ali leelo antule ndi wansipila, kuno wataangi: ‘Neene ndi Mwaana wi Leesa.’ ”

⁴⁴ Na yaaya kweene aifi yano yumolwa poonga nawe yalaanda fiyo kweene.

Yesu wafwa

⁴⁵ Nga fuma unsanya pakasi kuwa ichaanda un-nsi yooshi, kufika na pano lyateemba.

⁴⁶ Nga pano lyateemba, Yesu afwaanga. iswii uku maka, aati: “Eloi! Eloi! Lama sabaktani?” alikuti: Leesa wane! Leesa wane! Nga fino waanta?

⁴⁷ Na yamwi yano yali penepo, pano yapulika, yaati: “Alawi alwita Elia”

⁴⁸ Nga weenga liyo kweene awituka ulwilo, ayatola inkamu ayiombeka um-maasi masasalume, wayitunga ukwilonje, wannwesha.

⁴⁹ Anina yaati: “Leka, tulole ndi Elia alwiisa antule.”

⁵⁰ Nga pano Yesu wangula kayili ukwiswi nkaani, umweeso waputuka.

⁵¹ Nga lolini, umweenda wa ng'anda-nkulu-iyi-Leesa yalepuka apakashi, ukufuma piyulu kufika na paasi; insi yatetema, amafiinga yalepuka.

⁵² Amaliindi yayulike, imyiili tupu iya yasweepe yano yawisi, yakatuka

⁵³ Nga yafuma um-maliindi yao pa chisila cha kututuluka kwaakwe, yingila umunsi nsweefu, yaloleka uku aantu tupu.

⁵⁴ Nga unkulu wa asalifi na yalye yano yali poonga yalunnolelela Yesu, pano yalola ichitentema cha nsi na fino fyaombeka, yoopa nkaani, nga yaati: “Umwenemo, wi wali umwana wi Leesa.”

⁵⁵ Pao kweene pali na anachi tupu yalolaanga lwa patali, yao yano yalondile Yesu ukufuma uku Galilea nu kumwombela.

⁵⁶ Pali yeneyo pali Malia wa ku Mandala, nu Malia nyina wi Yakobo na Yosefu na nyina wa yana yi Zebedeo.

Yesu wazikwa mwilindi

⁵⁷ Na pano yawa amaangushi, awisa untu unsafi uwa ku Alimateo, ishiina lyaakwe i Yosefu, nawe kweene wali unnondeshi wi Yesu.

⁵⁸ Untu wiyo wayile kuli Pilato, aloomba ichaala chi Yesu. Apano Pilato walaanda apiwe.

⁵⁹ Yosefu watola ichaala, wachifuunda um-mweenda untiswe.

⁶⁰ Washiika umwilindi lyaakwe ipyaa, lino wimfile uku mwaamba, akunkulusisha ifiinga ikulu apa nndyango wi lindi, nga ampita.

⁶¹ Pao kwene yalipo Malia wa ku Mandala nu Malia wiwi uwa uwili, yatenzi apipi nilindi.

Yakalolela yilindi

⁶² Nu waanda wa uwili uli waanda uno walondelile uwaanda wa kuteya, ayikolo iyakapela na aFaliseo yakonganila Pilato.

⁶³ Yalaanda, yaati; “Mweene, twisukila fino wiiwi unchenjesu watakaanga pano achili umpuma, ati: ‘Ichisila cha maanda yatatu ndututuluka.’

⁶⁴ Ichino utume iliindi lilolelwe niingo kufika amaanda yatatu, alondeshi yaakwe yaatize yamwiye, nu kunena antu, yaati: ‘Watatutuluka uku yafwi.’ Nu ufi wa chisila ululuta ufi wa ntangulo.”

⁶⁵ Pilato wayanena, waati: “Mulina asalifi, yangini mukalolele niingo fino mumanyile.”

⁶⁶ Nga yaaya ukuyulolelela niingo iliindi, uku kutela akamanyililo api fiinga liyo, poonga na asalifi yano yalulolela.