Mateo 25 - UPANGANO UPYA

Asuungu ya maano na aasofu

¹ “Apano uweene-wa-mwiyulu ulukolana na asuungu ikumi, yano yatoshile yatala yao, yafuma ukukomenganya siwinga.

² Yasano pali yao yali ifiwele-wele, na yasano aya maano.

³ Ifiwele-wele fiyo fyaseensile yatala yao naanti kuseenda amafuta.

⁴ Leelo yaaya aya maano yasensile amafuta um-misasi yao poonga na yatala yao.

⁵ Na pano siwiinga washiimba, yooshi yanshiishila, yalala utulo.

⁶ Leelo ushiku apakashi kwaawa ichoongo: ‘Siwinga wisa; fumini mukankomenganye!’

⁷ Liyo kwene yankatuka asungu yaya yoshi, yachita ningo itala shao.

⁸ Ifiwele-wele fifi fyanena aya maano. fyaati: ‘Tupini amafuta yino mache, kuno itala shiitu ziluzima.

⁹ Leelo yao aya mano yayanena, yaati: ‘Awe, yachepa kuli sweeswe neemwe; yangini kuli yakakasha, mukakale.’

¹⁰ Nga pano yao yapitaanga ukuyukala, shiwiinga wisa, nayo yano yalipo yamwingila ponga nawe un-ntiyo, yayala nu nnyaango.

¹¹ Apano asuungu aniina yiisa, yaati: ‘Mweene, mweene! Tuyulile!’

¹² Leelo wayaneena, waati: ‘Mweneemo ndumuneena: ntamumanyile mweemwe.’

¹³ Ichino mutachilala, kuno mutamanyile ili naanti waanda.

Unnumbe wa talanta

¹⁴ “Chili wa nndumbe wa ntu wino alushita aye ku masi, wishile aomfi yaakwe, asêka uku yakola ifyuma vyaakwe.

¹⁵ Apa wenga italanta shisaano na weenga italanta shiyili, na weenga italanta yoonga, chila ntu uku maka yaakwe; wampita.

¹⁶ Liyo kweene wino wasêkilwe talanta shiisaano, wampita, waya washichuchusha, wongelesha ishiniina chisaanano.

¹⁷ Fiyo kweene nu wi shiyili; nawe kweene wongelesha shiyili.

¹⁸ Leelo wiiwi wino wasêkilwe yoonga, wayiile afukoola apaasi, afisa italanta ya mweene waakwe.

¹⁹ Pano amaanda yafula, awisa umweene wa aomfi yao, asolosha poonga nayo.

²⁰ Awisa wiiwi wino wasêkilwe talanta shisaano, waleta ni talanta shisaano, waati: ‘Mweene, wasêkile kuli neene talanta shisaano, lola, talanta shiinina shisaano shino nafyasha.’

²¹ uMweene waakwe wanneena, waati: ‘Wachita niingo, umuofi nsiipe nu wa kutailwa. Wali wa kutailwa ku ifiintu fiche; nankuwiika apa fifusu; wingila un-kuchimba kwa mweene wako.’

²² Awisa na wiiwi wino wasêkilwe talanta shiyili, waati: ‘Mweene, wasêkile kuli neene talanta shiyili, lola, talanta shinina shiyili shono nafyaasha.’

²³ uMweene waakwe wannena, waati: ‘Wachita niingo, umuofi nsiipe nu wa kutailwa; wali wa kutailwa ku ifiintu fiche, nankuwika apa fifusu; wingila un-kuchimba kwa mweene waako.’

²⁴ Awisa na wiiwi wino wasêkilwe italanta yoonga, wafwaanga, waati: ‘Mweene, namanyile fino weewe ntu wino watala, ukukumbula pano utapesile, ukukonganika pano utasambashishe.

²⁵ Ichino nofile, naya naifisa italanta yako apansi; tola ili yako.’

²⁶ “Lelo mweene waakwe wannena, waati: ‘We momfi unjifu nga wenkosu; wamanyile fino nkukumbula pano ntapeshile, ndukonganika pano ntasambashishe.

²⁷ Chasifile fino wali upe yano yaluchuchusya, na pano nisa nali njisana iya kwane na yino yongeleziwa,

²⁸ Ichino mpokini talanta iyo, mpini wino ali nazyo italanta ikumi.

²⁹ Kuno weeshi wino ali na chimwi, alupiwa nu kongeleshiiwa tupu; leelo wino atakwiite chimwi, na chino ali nacho kweene alupokwa.

³⁰ Nu momfi wiyo atasifile, msumbini ukutali ukuufika uku chaanda; ukuno akalililaange nu kuchecheta amiino.’

uWanda wa uputushi

³¹ “Pano wacha wiisa Mwaana-ntu um-ukulu waakwe, na yamalaika yooshi poonga nawe, apano alwikala apa chisumbicha-ukulu waakwe.

³² Na aantu yooshi yalukongana panali, nawe aluyapalula, ndi fino unchemi akulupalula infwele ni mpwata.

³³ Aluwika ifweele ikasa lyaakwe ilya kwiluunji, ni mpwata ikasa ilya kuli kamani.

³⁴ Apano uMwene aluneena yaalye yano yali ukwikasa lyaakwe ilya kwilunji: ‘Nguni, yano mwapepelelwa na Taata, pyanini uweene uno mwawikilwe kali ukufuma ukulengwa kwaasi.

³⁵ Kuno nali ni isala, mwampa ichakulya; naali nu unsala, mwanwesha; nali mweni, mwambulila.

³⁶ Nali tupu, mwanswika; naali undwale, mwisa mwansungula; nali uku nyololo, mwisa mundola.’

³⁷ Apano aya chumi yalunnena, yaati: ‘Mweene, ili lino twakuwine uli ni nsala, twakupa ichakulya; naanti uli nu nsala, twakupa ichakunwa?

³⁸ Na kayili, ili lino twakuwiine we mweeni, twakuulila naanti uli tupu, twakuswika?

³⁹ Na kayili ili lino twakuwiine we ndwale naanti uku nyololo, twisa twakulola?’

⁴⁰ Nu Mweene aluyanena, ati; ‘uMwenemo ndumunena Fino mwachitile umwi pali yao achaane anoono, mwanchitile neene.’

⁴¹ Apano aluneena na yalye yano yali ukwikasa lyaakwe ilya kuli kamani, aati: ‘Tinini panondi, yano mwatipwilwa, yangini um-mooto wa maanda ti, uno wawikilwa Chiwa na yamalaika yaakwe.

⁴² Kuno naali ni sala, mutampa ichakulya, naali nu nsala, mutampa ichakunwa.

⁴³ Naali mweeni, mutambulila, naali tupu, mutanswika, naali undwale nu ku nyololo, mutise mundole.’

⁴⁴ Apano nayo kweene yalulaanda, yaati: ‘Mweene, ili lino twakuwiine weewe uli ni sala naanti uli nu nsala, naanti we mweeni, naanti uli tupu, naanti we undwale, naanti uku nyololo, tutise tukulole?’

⁴⁵ Nawe aluyaneena, ati: ‘Umwenemo ndumuneena: fino mutachitile weenga pali yao anoono, mutanchitile neene.’

⁴⁶ Na yao yalupita ukuyu wingila um-machuulo ya maanda ti leelo aya chuumi yaluya um-upuma wa maanda ti.”