Mateo 24 - UPANGANO UPYA

Yesu alufwaanga pa ifiintu fya mpelelekesho

¹ Nga Yesu afuma un-ng'anda-nkulu-iyi-Leesa, a pita. Alondeshi yaakwe yaaya kunaali, kuti yanndange mikulo ya ng'anda-nkulu-iyi-Leesa.

² Nawe wayanena, waati: “Mululola efi fyooshi? Mwenemo ndumuneena: kutalu shaala pa ifiinga lino liluuwa apa linina, leelo yooshi yalupomololwa.”

³ Nga pano wayiile atikala apa mwaamba wa Miseituni, alondeshi yaakwe yaaya kunali ukumbali, yaati: “Tuneene ifiintu fiyo filuwa li na kuluwa uli apa kwisa kwako, na pa kusila kwansi?”

⁴ Yesu wayaneena, waati: “Lolini, untu umwi atamuzosha.

⁵ Kuno ayiinji yalwisa ukwishiina lyane, angi yaluuti: ‘Neene ndi Klisto.’ Nayo yalusosha ayiinji.

⁶ Neemwe mulupulika isumo, ni mpwepwe sha nkoondo; mulole mutachoopa, kuno chilungime filwisa, leelo ukushila kwansi kuchili.

⁷ Kuno antu yalukatuka ukulwa na antu yaniina, nu weene ukulwa nu wene unina; kuluuwa isala ni vitentema fya nsi mûntu mûntu.

⁸ Fiyo fyooshi ali ntangulo ya machuulo.

⁹ Apa maanda yao yalumufiima ukuti mulole amachuulo nayo yalumumoola, neemwe mulutuwiwa na antu yooshi ukwishiina lyane.

¹⁰ Apano ayiinji yaluchituwa nu kusongelelana nu kutuwana.

¹¹ Na malau tupu aya ufi yaluloleka nu kusosha ainji.

¹² Nu ku nndandu wa kutanduka kwa nno, ulukundo lwa yiinji lulusila.

¹³ Leelo wino alutekaana kufika ni chisila, uwino alufyuuka.

¹⁴ Kayili iswi-isiipe lya weene lilusuundwa unsi yooshi, ukuwa usyuta uku yantu yooshi. Apano kusila kwansi kulwisa.

¹⁵ “Ichino pano mwacha mwalola uyiipe wa wonooni uo wimiliile apakashi apasweepe uno kalausha Danieli watashile— kasoma amanye —

¹⁶ apano yano yali umu Yudea, yitukiile um-myaamba.

¹⁷ Na wino ali apidaali, atika ukutola ifiintu fino fili un-ng'anda umwakwe.

¹⁸ Naanti wino ali uku fyaalo, ataweela uku chisila ukutoola umweenda waakwe.

¹⁹ Akalaanda kao yano yali ni sanda, na yano yalonsya amaanda yao.

²⁰ Pepini kuti ukwituka kwino kutacha kuwe uku nzusi, naanti uwaanda wa Sabato,

²¹ Kuno amaanda yao amachuulo yalufulisho nkaani, yano yatachili yaloleke fuma ukulengwa kwansi, fika na li, nga yataluwako kayili.

²² Na amaanda yao ngi yatali yaputukisiwe, atali afyuuke untu naanti umwi; leelo ku nndandu wi yano yasololwa, yaluputukisiwa.

²³ Apa makati yao. ngu ntu wamunena, waati: Lolini Klisto alipa, naanti: ‘Ali kuo,’ mutachisumila.

²⁴ Kuno yalukatuka yaklisto-ya-ufi na malau yaufi, nayo yaluchita ifilangisho ifikulu ni ifintu fya kuzunguka, ukuti yamulovye na asolole kwene ndi chawela.

²⁵ Lolini, ntimusokesha inkolelo.

²⁶ Ichino ngi yamuneena, yaati: ‘Lolini, ali uku lusaanga,’ mutachiya; naanti yaati: ‘Ali un-ng'anda unkasi,’ mutachisumila.

²⁷ Kuno ndi fino ulukosho lukufuma uku kafuma ndaaka, luloleka nu ku kawa ndaaka, ifino kuluwa ukwisa kwa Mwaana-ntu.

²⁸ Ichino pooshi pano pali ichaala, apano amakoshi yalukongaana.

²⁹ “Lelo liyo kwene ichisila cha machuulo ya maanda yao, ilaashi lilufitokela, nu mweeshi utaluwala ni ntaanda sha mwiyulu shilupona, na maka ya mwiyulu yalutelengana

³⁰ Apano chiluloleka chilangisho cha Mwaana-ntu um-mwiyulu, apano aantu yooshi aya kuno ukuushi yaluloshaa, nayo yalulola uMwaana-ntu alwisha na mapuufi ya mwiyulu, poonga na maka nkaani nukulu tupu.

³¹ Nawe alutuma yamalaika yaakwe poonga nu nndilo unkulu wipeenga, nayo yalukongaanya yano wasolola ukufuma isansa shini, ukufuma uku lusansa lu lwa mwiyulu, nu kufika ku lusansa lu.

Amasambilisho ya nsamfu

³² “Ichino sambililiini unndumbe wa nsamfu: itayi lyaakwe ngi lyaleemba nu kufumya amafwa, mumanye fino ichisiku chapalamila.

³³ Neemwe ifiyo kweene, pano mwalola fiyo fyooshi, mumanye fino indi apiipi, um-milyaango.

³⁴ uMwenemo ndumuneena: umpaanda u utalusila, angi fyooshi fi fichili filoleke.

³⁵ Iyulu ninsi filusila, leelo amaswii yaane yatalusila naanti uche.

³⁶ “Lelo ukumanya icha pa waanda uulye, ninsaa lino alwisa, kuushi wino amanyile, naanti ayamalaika ya mwiyulu, naanti Mwaana, leelo Taata weenga mpela.

³⁷ Kuno ndifino chaali apa maanda yi Noa, ifino chiluwa apa kwisa kwa Mwaana-ntu.

³⁸ Kuno ndi fino chaali um-maanda yano yakoleliile nndamba, antu fino yalyaanga nu kunwa, yapindulanga nu kupindukwa, ukufika uwaanda wuuwu, wuno Noa wingilu um-safina.

³⁹ Yatamanya chimwi kufika na li nndamba wisa, wayaseenda yooshi, ifino chiluuwa apa kwisa kwa Mwaana-ntu.

⁴⁰ Lili kweene aantu yaili yaluuwa uku chaalo, weenga asendwa, weenga ashaala.

⁴¹ Anachi yayili yaluwa yalusha, weenga aseendwa, weenga ashala.

⁴² Ichino mutachilaala, kuno mutamanyile uwaanda chi uno alwisa uMweene wino.

⁴³ “Lelo mumanye iswii li: unkola ng'anda ngi amanyile lino umwifi wanja, atangi alaale, ataangi ashe ing'anda yaakwe ipomolwe.

⁴⁴ Ichino fiyo neemwe kweene uteyanyini, kuno lino mutamanyile ilino Mwaana-ntu alwisa.

⁴⁵ “Ali uwini leelo umuofi wa kutailwa uwa maano, wino umweene waakwe wamwika un-ng'anda yaakwe, angi alupa ifyulya lino fyasitwa?

⁴⁶ Inkata yaakwe umuofi wiyo wino umweene waakwe wisa wasana aluchita fiyo.

⁴⁷ uMwenemo ndumuneena: alumwika kuloleleela ifiintu fyaakwe fyooshi.

⁴⁸ Leelo umuofi wiiwi unjiipe, ngi um-mweeso waakwe waati: ‘Mweene wane wasimba,’

⁴⁹ watampa ukuma aomfi nachakwe, nu kulya nu kunwa poonga nakoleshi,

⁵⁰ umweene waakwe umuofi wiyo alwisa uwanda uno atalwelengula, ni nsaa ino atamanyile.

⁵¹ Alumkoma nu kumwikila malipisi apali poonga na yaufi. Ukuno kuluwa ukulila nu kuchecheta mino.