Mateo 22 - UPANGANO UPYA

uWinga wa mwaana mweene

¹ Yesu afwaanga ayaneena kaili uku miluumbe, aati:

² “Uweene-wa-mwiyulu ukoliine nu mweene weenga, wino wachitile umwaana uwiinga.

³ Watuma aomfi yaakwe yayiite yano yalaliikwe ukwisa uku wiinga; nayo yakana ukwisa.

⁴ Watuma kayili aomfi aanji, waati: ‘Nenini yao yano yalalikwe: lolini, ntiteyanya ifyulya fyane. Ing'ombe shane ni ifinone ntifyula, fyooshi ifipya; nguuni uku wiinga.’

⁵ Leelo yatalanga naanti umyeeso, yampita, weenga uku fyaalo ukwaakwe, nuunji um-uchulushi waakwe.

⁶ Na yano yashila, yalema aomfi yaakwe, yayachusha nu kuyumoola.

⁷ Ngu mweene wiyo walakalika, watwaala asalifi yaakwe yumoola ayumoshi yaaya, yoosha unsi wao.

⁸ Ichisila wanena aomfi yaakwe, waati: ‘Uwiinga uwufika, leelo yano yalaliikwa yataine.

⁹ Fwaandi yangini naanti um-mpandanya sha mbalawala. Na yooshi yano mwalola, yitiini uku wiinga.’

¹⁰ Aomfu yao yafuma yaya un-nsila inkulu, yakonganya yooshi yano yalola, ayiipe na asiipe; uwiinga washuula ayeeni.

¹¹ Nga pano wingila wiiwi umweene, ukuti alole ayeeni yaakwe, walola umwenemo untu weenga wino ataswite umweenda wa wiinga.

¹² Wannena, waati: ‘Kataane, uwingile uli mu, neewe utakwiite umweenda wa wiinga?’ Leelo weene watusha.

¹³ Apano umweene wanena aomfi, waati: ‘Nnyepini amakasa na muulu, nnseendini mukansuumbile apaashi un-chaanda; ukuno alililaange nu kuchecheta amiino.’

¹⁴ Kuno yano yisiilwe yaafula, leelo asolole yali yache.”

Kulipa Kaisali ikodi

¹⁵ Nga aFaliseo yaampita, yaya yamba ifyakuti yanneeme uku maswii.

¹⁶ Yatuma alondeshi yao kuno ali poonga na ya Yelodi, yalaanda, yaati: “Kasambilisha, tumanyile fino weewe ntu wa kapaanga, ni sila yi Leesa ulusambilisha ningo, naanti utalondiile ukulu wa ntu, kuno utakulola uushu wa antu.

¹⁷ Ichino utuneene, walola uli? Chili niingo ukupa Kaisali ikoodi naanti awe?”

¹⁸ Leelo Yesu amanya uyiipe wao, walaanda, waati: “Nga fino mulungesha mwe yaufi?

¹⁹ Ndangini ulupia lwi kodi.” Nayo yanndetela ulupia.

²⁰ Nga wayaneena waati “Ichata chiini chi na maandiko ya?”

²¹ Yanneena, yaati “Ayi Kaisali.” Wayaneena, waati: “Fwaandi mpini Kaisali ifyi Kaisali, na Leesa ifyi Leesa.”

²² Pano yapulika yasunguka, yansha yampita.

Apa ututuluko

²³ Uwaanda ulye yamwi apa aSadukeo, antu yano yakuluti, kuushi ukututuluka kwa yafwi, yaaya kunalii, yantondosha,

²⁴ yaati: “Kasambilisha, Mose watasile ati: Untu ndi wafwa asi na aana, unniina antoole unchi wiyo, ukuti afyaale nawe.

²⁵ Nga ukumwiitu kwali aantu saba aliyoonga. Uwantangulo wapindula, wafwa, fino aasi na ayaana, washila unnina unchi.

²⁶ Nu wa uwili fiyo kweene, nu wa utatu, apaliinji yooshi saba.

²⁷ Ichisila chi yooshi nawe umwanachi wiyo waafwa.

²⁸ Ali apa kututuluka kwa yafwi, aluwa inka wiini pali yaaya saba? Kuno yooshi yaali nawe.”

²⁹ Yesu wayaneena, waati: “Mululowana, kuno mutamanyile aMaandiko naanti amaka yi Leesa.

³⁰ Kuno uku kututuluka uku yafwi kuushi ukupinduula naanti ukupindukwa, leelo yaluwa wi yamalaika ya mwiyulu.

³¹ Kayili uku maswii ya kututuluka ku yafwi, mutachili musome iswii lino lyafwashilwe na Leesa, ukuti

³² ‘Neene ndi Leesa wi Ablaamu na Leesa wi Isaka na Leesa wi Yakobo?’ Leesa asi Leesa wa yafwi, leelouwa yapuma.”

³³ Na maumba pano yapulika, yasunguka uku masambilisho yaakwe.

Ichilangaso ichikulu

³⁴ Nga aFaliseo pano yapulika fino wayamyalasha aSadukeo, yakongaana apali poonga.

³⁵ Nga weenga pali yakamaanya-ya-Ntaambi wantondoosha angi alumwesha, waati:

³⁶ “Kasambilisha, un-Ntambi ichilangaaso ichikulu ichili kwi?”

³⁷ Wanneena, waati: “Ukuunde uMweene Leesa waako uku mweeso waako wooshi, nu upuma waako wooshi, nu ku maano yaako yooshi,

³⁸ Alachi ali chilangaaso chikulu na kayili icha ntangulo.

³⁹ Ni cha uwili chikoline nacho, nacho iichi: Ukuunde unnyoonko ndi fino wawukuunda wenkola.

⁴⁰ Uku vilangaaso wiyili fi vilemile iNtaambi yooshi na malau.”

Mwaana nu Mweene wi Daudi

⁴¹ Na aFaliseo, pano yakongaana, Yesu wayatondoshishe, waati: “Mululola uli pali Klisto?

⁴² uMwaana wiini?” Yannena, yaati: “uMwaana wi Daudi,”

⁴³ Wayatondoosha, waati: “Nga chili uli, fwaandi, Daudi uku Mweeso Nsweefu ukumwita Mweene, ukuti:

⁴⁴ ‘Umweene wanenile uMweene waane: Uwikale ukwikasa lyaane ilya kwiluunji, fika na lino nawika asiluweembu yaako apaasi apa muulu yaako?’

⁴⁵ Nga Daudi ngi wamwita uMweene, nga wawa umwaana kwe uli?”

⁴⁶ Leelo kutali untu wakulaanda chimwi; nu kufuma uwaanda uo kweene kutaali untu uwa kumtondosha chimwi kayili.