Mateo 20 - UPANGANO UPYA

Unndumbe wa alimi apa chaalo

¹ “Kuno uweene-wa-mwiyulu ukoliine nu ntu wino ali ni ng'anda, wafumile akatondo-tondo ukuyulaliika alimi ayatwala un-chaalo chaakwe icha misabibu.

² Nga pano yapulikana nalimi, yalime lîle ayape ulupia, nga ayatwala un-chaalo chaakwe icha misabibu.

³ Afuma untoondo saa taatu, alola aanji kayili yimiliile apa sokooni, yatakwite unndimo.

⁴ Na yao kweene wayaneena, waati: ‘Yangini neemwe un-chaalo chaane icha misabibu, ni chakuombela kwino namwisa imupe.’ Yampita ukuya.

⁵ Afuma kayili unsanya apakashi na mangushi pano lyateemba, wachita fifi kweene.

⁶ Nga amangushi pano liila, afuma asaana aanji kayili yimilile; wayaneena, waati: ‘Nga fino mwimiliile pa unsanya wooshi naanti nnimo?

⁷ Yanena, yaati: ‘Rumo kuushi untu wino watatulaalika.’ Wayaneena, waati: ‘Yangini neemwe kwene un-chaalo cha misabibu.’

⁸ Pano lyawa, wiwi unkola chaalo wanena unnyampala waakwe, waati: ‘Yiite alimi, uyape ichakuombela kwao, utalikile uwa chisila kufika nu Wa ntangulo.’

⁹ Nga pano yisa yaya aya mangushi pano lila, yapiilwe chila ntu ulupia.

¹⁰ Na yaya ayantangulo, pano yisa, yataangi kuunde twampata nkaani, na yao kweene yapokela chila untu ulupia.

¹¹ Nga pano yapokelela, yang'wing'intikila unkola ng'anda.

¹² Yalaanda ukuti: ‘Alaya aya chisila yaomba unndimo isaa yoonga sile, neewe wayalingaanya neeswe, yano utuchuula unsanya wooshi lisa lîla.’

¹³ Nawe anena wenga pali yao, ati: ‘Kataane, ntakuchenjishe; utapulikiine neene uku lupia?

¹⁴ Toola ili yaako, upite; nkasiime ukupa wi uwa chisila ichili choonga neewe.

¹⁵ Cheene! chitanjiile ukuchita fino nkasime uku ifiintu fyaane? Cheene! iliiso lyaako lyayiipa kuno ne nsiipe?’

¹⁶ Ali fiyo kweene, aya chisila yaluwa aya ntangulo, na ya ntangulo yaluwa aya chisila.”

Yesu walaanda ilya utatu apa fwa nu kututulukaakwe

¹⁷ Nga pano Yesu wapitaanga ukuya uku Yelusalemu, wayaseshile yaya alondeshi ikumi na yayili ukumbali, nunnsila ayaneena, ati:

¹⁸ “Lolini, twapita ukuya uku Yelusalemu, nu Mwaana-ntu alupiiwa um-makasa ya yikolo iyakapela na yakaandika, nayo yalumputwiila ukufwa.

¹⁹ Yaluntwaala uku yakulukuwa, kuti yansoweke nu kumuuma ni mikowa nu kumumoola, nu waanda wa utatu alututuluka.”

Utalaasa, leelo ombela

²⁰ Apano nyina wa yana wi Sebedeo aya kunali, poonga na anakwe, amfukamila anndomba chimwi.

²¹ Nga nawe wannena, waati: “Ulushita chaani?” Wannena, waati: “Ndusita ukuti anaane ya yayili, yikale weenga ukwikasa lyaako ilya kwiluunji, na weenga ikasa lyaako ilya kuli kamani um-weene waako.”

²² Yesu walaanda, waati. “Mutamanyile chino mululoomba. Cheene! Munganweela ulwaako luno ndunweela neene?” Yannena, yaati “Ee.”

²³ Wayaneena, waati “Umwenemo, mulunweela ulwaako lwaane, leelo ukwikala ukwikasa lyaane ilya kwiluunji nikasa ilya kuli kamani, nsi na maka ukumupa, leelo yalupiiwa ayateyanyiwa na Taata waane.”

²⁴ Na yaya ikumi pano yapulika, yayalakalikila yaya yayili.

²⁵ Leelo Yesu wayita wayanena, waati “Mumanyile fino aene ya yakulukuwa yakuluyalâsa uku maka, na yikolo yao yakuluyaombisha.

²⁶ Leelo chisi fiyo kuli mweemwe; leelo untu wino alushita ukuwa uwikolo kuli mweemwe, awe umuofi wino.

²⁷ Nu ntu weeshi wino alushita ukuwa uwa ntangulo kuli mweemwe, awe umuofi wino.

²⁸ Ndi kuti fino uMwaana-ntu atishile ukwisa wombelwa, leelo ukuombela nu kufima upuma waakwe uku kulula antu tupu.”

Apofu yayili yaposhiwa

²⁹ Na pano yatiina uku Yeliko, iumba ikulu lyanndondela.

³⁰ Nga lola, apofu yayili yateesi un-nsila umbali, nayo pano yapulika fino Yesu alupita, yangwile, yaati: “Utukumbukile, Mweene. mwaana wi Daudi!”

³¹ Ngiumba lyayakalipila, kuti yatushe. Leelo weene yalusha ukwangula, angi yaluti: “Utukumbukile, Mweene, mwaana wi Daudi!”

³² Nga Yesu awimilila, ayiita, ayaneena, ati: “Mulushita mushitile chaani?”

³³ Yannena, yaati: “Mweene, tulushita amaaso yitu yanndola.

³⁴ Yesu wayalolela inkuumbu, wayeemye amaaso yao, nga yalola liyo kweene, yandondela.