Mateo 19 - UPANGANO UPYA

Ukupa ulucheto

¹ Nga pano wamala amaswii yao, atina uku Galilea, aya umbali ya Yudea, umbalama yi Yodani,

² Amaumba tupu yanndondela, nawe ayaposha indwaala kuwo.

³ Nga aFaliseo yaya kunalii, yantondoosha, angi yalumwesha, yaati: “Chili niingo untu ukuta unchi kuli chila wonooni?”

⁴ Wayanena, waati: “Mutachili musome fino uwayalengile inkoleelo, wayalengile untu umooshi nu ntu mwanachi?”

⁵ Wayanena, waati: Ichino fiyo untu alusha isi na nyina auminkane nunchi, nayo yayili yaluuwa umwili woonga.

⁶ Na yasi yayili kayiili, leelo umwiili woonga. Chaleka chino Leesa waliimba, untu atachi limbulula.”

⁷ Yannena, yaati: “Nga chili uli fwaandi, fino Mose watunenile ukumpa imbaluwa ya kutana nu kunta?”

⁸ Nawe ayanena, ati: “Mose uku ukomu wa myeeso yino, wamusumile ukuta aachi yino, leelo ukufuma intangulo chitaali fi.

⁹ Neene namuneena mwemwe, untu weeshi wino wacha waata unchi, ndi kushi kuno wawa umpuundu, nu kutoola uunji, aluchita ifya upuundu, nawe wino watoola wiwi wino yata, aluchita ifya upuundu.”

¹⁰ Nga alondeshi yaakwe yannena, yaati: “Ifiintu fya ntu nu nchi ngi fyawa fiyo, chitasifile ukupindula.”

¹¹ Leelo weene ayaneena, ati: “Asi yooshi yano yangalipokelela iswi li, shiko yano yapiilwe.

¹² Kuno kuli yantuungwi yano yafilwe angi yali fiyo kweene ukufuma un-nda shi ya nyina; kayili kuli yantuungwi yano yachisilwe na aantu ukuwa antuungwi; kayili kuli yantuungwi yano yauchita ayantuungwi uku nndandu wa weene-wa-mwiyulu. Wino angalipokelela iswii li, alipokelele.”

Yesu wapepelela aanche

¹³ Apano yanndetela aanche yanoono, kuti ayawikile amakasa yaakwe apa mitwe yao nu kuyapepela. Alondeshi yaakwe yayakalipila.

¹⁴ Leelo Yesu afwaanga, ati: “Lekini aanche yanoono yise kunondi; mutachi yalesha, kuno yano yakoliine na yao, uweene-wa-mwiyulu uwao.”

¹⁵ Nga awika amakasa yaakwe apa mitwe yao, nga atiina kweneko.

Unndumeendo nnsafi

¹⁶ Nga lola, untu weenga aya kunalii, annena, ati: “Kasambilisha, nchite uli ichiintu ichisiifu, ukuti mbwe nupuma wa maanda ti?”

¹⁷ Annena, ati: “Ukuchaani ukuntondosha amaswi ya uzipe? Usifu ali weenga. Leelo ngulushita ukwingila um-upuma, londela ivilangaaso.”

¹⁸ Wannena, waati; “Fili kwi?” Yesu wannena waati: “Ifi: Utachumoola, utachichita ifya upuundu, utachiiya, utachifwaanga ufi.

¹⁹ Uchindike so na nyoko, na kayili, ukuunde unnyoonko ndi fino waikuunda we nkola,”

²⁰ Nga unndumeendo wiyo wannena, waati: “Efi fyooshi nafilondela; chashala chaani kayili?”

²¹ Yesu wannena waati: “Ngu lushita ukuyanya fyooshi, yaanga ukakashe fino uli navyo, upe apina, apano uluwika uwikalo waako umwiyulu, apano nguuna, undondele.”

²² Nga unndumeendo wiyo pano wapulika iswii liyo, wampita uku chikoonko, kuno wali nu usafi tupu.

²³ Apano Yesu wanena alondeshi yaakwe, waati; “uMweenemo ndumuneena: chilutala uwa usafi ukwingila umwiyulu.

²⁴ Ndumuneena kayili, changupala nkaani ntwanga-mweendo ukwingila umwiliina lya sindaani, kuleka ukuti uwa fyuma ukwingila um-weene-wi-Leesa.”

²⁵ Alondeshi pano yapulika, yasunguka nkaani, yalaanda yaati: “Uwini fwaandi, wino alufyuuka?”

²⁶ Nga Yesu ayakundwila amaaso, wayanena, waati: “Uku antu Uyo litangi liwe, leelokuli Leesa fyooshi fingawa.”

Unndambu wa kulondela Yesu

²⁷ Nga pano Petlo wannena, waati: “Lola, sweemwi twasha fyooshi twakulondela; tulupata chaani fwaandi?”

²⁸ Yesu wayanena, waati: “Mwenemo ndumuneena, mweemwe yano mwandondela neene, un-nsi mpya, pano wacha wikala uMwaana-ntu apa chisuumbi-cha-ukulu waakwe, neemwe kweene mulwikala apa fisuumbi ikumi na fiyili’ muyaputwiile imilaandu iinko ikumi na shiyili sha Islaeli.

²⁹ Na chila ntu wino washa ing'anda naanti anina ya shooshi naanti aya kachi, naanti isi naanti nyina, naanti ana, naanti ivyalo ukwizina lyane, alupokelela maila umwanda nu kupyana upuma wa maanda ti.

³⁰ “Leelo ali tupu aya ntangulo yaluwa aya chisila, na yano aya chisila yaluuwa aya ntangulo.