Mateo 17 - UPANGANO UPYA

Yesu wawa um-mwata unnina

¹ Ni chisila cha manda sita, Yesu ayaseenda Petlo na Yakobo na Yoane unninakwe, wayaleta apa mwaamba untali, angi yali yoonga.

² Asenuka ichata chaakwe apa yakola, ushu waakwe wameesa wilaashi, imyeenda yaakwe yawa imitiswe wa mwengelela.

³ Nga lola, yafumbuluka Mose na Elia; angi yalufwaanga nawe.

⁴ Nga Petlo afwaanga ukunena Yesu, ati: “Mweene, chasipa fino sweeswe tuli pa; ndukashiime, nanchita pa ifisansa fitatu, choonga ichaako weewe, na choonga ichi Mose na choonga ichi Elia.”

⁵ Nga pano achili alufwaanga, lola, ipuufi litiswe lyayachitila ichisau, nga lolini, iswii lyafuma umwipufi liyo, lyaati: “Alawi uMwaanane wino nakuunda, wino wansipila neene; mpulikini wiyo.”

⁶ Nga alondeshi yao, pano yapulika, yaponile apaasi, yoopa nkaani.

⁷ Nga Yesu awisa ayeemya, afwaanga ukuti: “Katukini, mutachopa.”

⁸ Yakatusha maaso yao, yatalola untu leelo Yesu weenga.

⁹ Nga pano yatentenkanya um-mwaamba, Yesu ayakomenkesha ukuti: “Mutaneena untu umwi uku maswi ya malele yao, shiko lino uMwaana-ntu wacha watutuluka uku yafwi.”

¹⁰ Apano alondeshi yaakwe yantondosha, yaati: “Nga uku chaani yakaandika yakuluti, fino Elia alutangula ukwiza?”

¹¹ Nawe wayanena, waati: “Ee, Elia alutangula ukwisa, nawe aluchita niingo fyooshi.

¹² Leelo ndumuneena, fino Elia watawisa, yatammanyile, leelo yanchita fyooshi fino yakasime. Ifino nu Mwaana-ntu kweene aile ukuyuchusiwa nayo.”

¹³ Apano alondeshi yaakwe yamanyile fino alufwaanga nayo imbalu shi Yoane Kabatisha.

Yesu waposha umwanche wa chiwa

¹⁴ Nga pano yafika ukwiumba, untu weenga aya kunalii, afukama pano ali, afwaanga ukuti:

¹⁵ “Mweene, unkumbukile umwanaane, kuno ali ni chifumfumi nu kuchuula ifiipe; kuno amaila tupu akuponela um-mooto, na amaila tupu umaasi.

¹⁶ Nanndeta uku alondeshi yaako, yapootwa ukumposha.”

¹⁷ Yesu wafwaanga, waati: “Mwe mpanda untasumile walowana; namwikala poonga neemwe kufika na li? Nachula neemwe kufika na li? Nndetini ku kuli neene.”

¹⁸ Nga Yesu wachikalipila ichiwa, nacho chamfuma, unndumeendo wiyo wampola fuma liyo kweene.

¹⁹ Nga yalye alondeshi yaya kunali Yesu ukumbali, yaati: “Nga fino sweemwi twaposilwe kwa usumilo wino.

²⁰ Kuno umwenemo, ndumuneena: ngi mwawa nu sumilo kache, wa lupeche lwa Aladadi, muluneena umwaamba uu, muti: ‘Tiina pa, uye kuulye!’ nao ungatina; kutaluuwa iswii lino litaluombeka kuli mweemwe. [

²¹ Leelo fiwa ndi fiyo fita kufuma shiko uku kusaalika nu kuusilishi fyakulya.”]

Yesu walanda kayili apa fwa yaakwe

²² Nga pano yikalaanga uku Galilea, Yesu wayanena, waati: “uMwaana-ntu waya ukuyupiwa um-makasa ya aantu, nayo yalumumoola, nu uwaanda wa utatu alututuluka.”

²³ Nga yalola malaanda nkaani.

Yesu nu kulipa ikodi

²⁴ Nga pano yafika um-Kapenaumu, yakalifya ya mpia yayile kuli Petlo, yannena, yaati “Cheene! Kasambilisha wiino akulufiima impia?” Nawe ayaneena, aati: “Akulufiima.”

²⁵ Nga pano wingila un-nganda, Yesu atangula ukumtondosha, ati: “Walola uli, Simoni? Ayene ya nsi yakutola koodi nanti ifisaangwa uku aantu ya uli? Uku saana yao naanti uku yeeni?”

²⁶ Nawe pano waati: “Uku yeeni” Yesu wannena, waati: “Fwaandi ndi fiyo, ana aya kauwele.

²⁷ Leelo ukuti tutayafwitosha, yaanga muli yeemba, ukasumbile indoani, ukatoole iswii yino yalemya inkoleelo; na pano wayasamula unndomo waakwe, wanndola ulupia. Ulutoole ukayape, kuli neene neewe.”