Mateo 15 - UPANGANO UPYA

Intaambi shi yatata-kulu

¹ Apano aFaliseo na yakaandika yafumile uku Yelusalemu, yaya kuli Yesu, yaati:

² “Nga fino aloondeshi yaako yatalondiile intaambi sha yikolo, kuno yatalufulala amakasa apa kulya ichakulya.”

³ Wayaneena, waati: “Nga fino neemwe kweene mutaloondile ichilangaaso chi Lessa uku ntaambi shino?

⁴ Kuno Leesa wafwashile, waati: ‘Uchindike so na nyoko, nu walafya isi naanti nyina, ndukufwa andukufwa.’

⁵ Leelo mweemwi muluti: ‘Uwacha wanena isi naanti inya: chonsi chino ungaswilisiwa neene, chapiwa Leesa. Nga atachindika isi na nyina.

⁶ Mwasenulula iswii li Leesa uku ntaambi shiino.

⁷ Ya ufi mwe, ifino Isaya walawishe kuli mweemwe, ati:

⁸ ‘Aantu ya yanchindika uku milomo, leelo imyeeso yao ilu kutali neene.

⁹ Nayo yalumpepa chaaka, yalusambilisha amasambilisho amatume na aantu.’ ”

Ifiintu fino filulyikisha untu

¹⁰ Awita amaumba, ayanena, ati:

¹¹ “Pulikini mumanye, asi chikulwingila un-nndomo chingalyikisha untu, leelo ichikufuma unu nndomo ichikulyikisha untu.”

¹² Apano alondeshi yaakwe yaya kunalii, yannena, yaati: “Umanyile fino aFaliseo pano yapulika iswii liili, yafwitokile?”

¹³ Wayanena, waati: “Ichipeelwa chooshi chino Taata uwa mwiyulu atapeshile, chilwiipwa.

¹⁴ Yaatini yao, aya kakoleela apofu uku yapofu. Nu mpofu ndi wakolelela umpofu nnina, yamponela un-chilina yooshi yayili.”

¹⁵ Nga Petlo wannena, waati: “Tuyulile unnduumbe uo.”

¹⁶ Yesu wafwaanga, waati: “Na li kweene neemwe kweene muushi na maano?

¹⁷ Muchili mumanye fino ichikuluya umu nndomo, chikupita un-nda, ichisuumbwa uku nsalaani?

¹⁸ Leelo fino filufuma umu nndomo fikufuma um-mweso, navyo ifikululyikisha untu.

¹⁹ Kuno um-mweeso mukulufuma amelengushi amayiipe, uumoshi, ifya upuundu, umalaya, iwifi, ukufwaanga ufi ni misalula.

²⁰ Ifiintu fiyo ifino fikulyikisha untu, leelo ukulya naanti kufulala amakasa kutakulyikisha untu.”

Usumilo wi mama umwi

²¹ Yesu atina kweneko, ayu ku mbali ya Tilo ni Sidoni.

²² Nga lolini, umwanachi mKananeo uwa n-nsi iyo, awisa awangula ukwiswi, ati: “Unkumbukile, Mweene, Mwaana wi Daudi, umwanane kachi ichiwa channeema nkaani.”

²³ Leelo weene atachili annene chimwi. Na alondeshi yaakwe yaya kunalii, yanndomba, yaati: “Leka apite, kuno alutumila ichoongo uku chisila.”

²⁴ Nga ayanena, ati: “Ntatumilwe, leelo uku fweele shi shalowa isha ng'anda ya Islaeli.”

²⁵ Nawe aya amwinamila, ati: “Mweene, untuule!”

²⁶ Leelo walaanda, waati: “Chitasifile ukutoola ichakulya cha yaana nu kusumbila imbwa.”

²⁷ Nawe aati: “Ee, Mweene, leelo nimbwa kweene, shikulya ifikunyolwa fino fifipona apa mesa pa ene yao.”

²⁸ Apano Yesu wannena, waati: “Mama, usumilo wako wakula; chiwe kuli weewe ndi fino ukasiime!” Mwanakwe kachi ampola fuma liyo kweene.

Yesu wayapa antu ielfu shini ifyakulya

²⁹ Nga Yesu atina kweneko, ayu mbali yi yeemba wi Galilea. Nga kweda uku mwamba. aikala kweneko.

³⁰ Nga yaya kunalii amaumba tupu, yantwalila yano yikala amatenda, apofu, yachinuunu, alemala naaniina ainji, yayawiika apa muulu yaakwe. Nga ayaposha.

³¹ Chaleka iumba lyasunguka, pano lyalola yachinunu yalufwaanga, alemala yaluwa apuma, aikala amateenda yalupita napofu yalulola. Yalumbanya Leesa wa Islaeli.

³² Nga Yesu awita alondeshi yaakwe, aati: “Nakumbukila iumba, kuno yikala ponga neene amaanda yawa yatatu, na yatakwiite chimwi ichakuti yalye; kayili ukuyalambalika yataliile ntakashime, yaatiza yashenguke un-nsila.”

³³ Alondeshi yaakwe yannena, yaati: “Tukufumya kwi imikaate tupu na pa inyika, ukuti likuute iumbo ndi li?”

³⁴ Nga Yesu ayanena ati: “Muli ni mikaate yiinga?” Yaati: “Saba. Ninswi siche.”

³⁵ Wayanena iumba likale apaasi.

³⁶ Atoola ilye imikaate saba ninswi shiyo, asamalisha, akunyoola, apa alondeshi yaakwe, nayo alondeshi yapa maumba.

³⁷ Yalya yooshi yikuta, yasola ifyashala ifikunyolwa fya mikaate, ifiyo saba fishushile.

³⁸ Na yano yaliile yaali imyaanda amakumi yani ayooshi, nanti kusolosha aanachi na aanche.

³⁹ Nga alambalika amaumba, akweela um-waato, ayu ku mbali ya Magadani.