Mateo 13 - UPANGANO UPYA

Kapela wa mbesu

¹ Uwaanda uo kweene Yesu afuma un-ng'anda awikala umbali mwi yeemba.

² Amaumba tupu yakongaana kunalii, apalinji wakweela um-waato, wikala na liili iumba lyooshi lyimilile uku luseleseenga.

³ Ayaneena ifiintu tupu uku miluumbe, ati: “Lolini, kapela wafumile ukuyupela.

⁴ Pano wapelaanga, imbesu shimwi shaponile apiipi ni shila, ifyuuni fisa fyakoompa

⁵ Shimwi shapona apa mafiinga, pano pashi unsili tupu, nga shamela suwa, shakuno unsili utafushile.

⁶ Unsanya pano wawala, shapya fino sisi ni misishi, shanyala.

⁷ Shimwi shapona apa myoonga, imyoonga yamela yashifyeenka,

⁸ Simwi shapona pamfundo, shasêka, yoonga umwaanda, yoonga makumi shita, yoonga makumi yatatu.

⁹ Uwa makutwi, apulike!”

Lunga lya miluumbe

¹⁰ Nga yiisha alondeshi yaakwe, yanneena, yaati: “Uku chani uluvwanga nayo uku milumbe?”

¹¹ Wayanena, waati: “Mwemwi mwapiwa ukumanya melengwe ya wene-wamwiyulu, leelo yao yatapiwe.

¹² Kuno wensi uli na chimwi, alupiwa nu kongeleziwa tupu, leelo wino atakwite chimwi, alupokwa na chino ali nacho.

¹³ Ichino fiyo ndufwanga nayo uku milumbe, kuno ngi yalola, yatalulola, nga ngi yapulika, yatalupulika nantu kumanya.

¹⁴ Ichino iswii li kalausha Isaya lyawa nu kuwa kuno yali, lino litile: ‘Ukupulika mwampulika, leelo musumanya; ukulolekesha, mululolekesha, leelo mutalulola.

¹⁵ Kuno imyeeso ya antu ya iminwamu, nu ku makutwi yao yatalupulika niingo. Yashiyata amaaso yao, yaatiza yalole uku maaso yao, nu kupulika uku makutwi yao, yamanye ukumyeeso yao, yasenuke njaposhe.’

¹⁶ Leelo inkata ya maaso yiino, kuno yalulola, na makutwi yiino, kuno yalupulika.

¹⁷ Kuno umweenemo ndumuneena: yakalausha tupu na ya chuumi yakashime ukulola ifiintu fino mululola mweemwe, leelo yatafilola, nu kupulika ifiintu fino mulupulika mweemwe, leelo yataafipulike.

Kumanyisha unnduumbe wi kapela

¹⁸ “Ichino mweemwi pulikini unnduumbe weeshi kapela.

¹⁹ Untu weeshi pano wapulika iswii lya weene, atalimanya niingo, akulwiisa wiilye unjifu, anyompola lino lipeshilwe um-mweeso waakwe wiyo, wino apeshilwe pipi ni isila.

²⁰ Na wino apeshilwe apa mafiinga, wiyo uwino alupulika liili iswii, liyo kweene alipokeleela uku kuchiimba.

²¹ Leelo unkasi asi ni mishishi, akulwikala akashimbo; ndi kwaloleku kusunywa naanti amachuulo ukwiswii liyo, ashaala waata.

²² Nawe wino apeshilwe apa myoonga, wiyo uwino alupulika liili iswii; ni fya kuno ukuushi nu uchenjeshi wa usafi fikulufyeenka lili iswii, litasêka.

²³ Na wino apeshilwe apa nsili wafuunda, wiyo uwino alupulika liili iswii nu kulimanya, wino wene alusêka ifisêke, alawi umwaanda, nawi amakumi shita, nawi amakumi yatatu.”

Imiluumbe miniina

²⁴ Ayumila unnduumbe unnina, ati: “Uweene-wa-mwiyulu ukoliine nu ntu uwapela imbesu nsiipe un-chaalo chaakwe.

²⁵ Nga pano aantu yalala, aya siluweembu waakwe apela amasote apakasi un-ngano, ampita.

²⁶ Pano amafwa ya ngano yamela nu kukula, ifiloleka ni fikoona kweene.

²⁷ Aomfi ya nkola-ng'anda yaya yanneena, yaati: ‘Mweene, utapeshile imbesu nsiifu un-chalo chaako? Ngi ifikoona fyafuma kwi?’

²⁸ Wayaneena, waati: ‘Unjiipe uwachisile fi’ Aomfi yanneena, yaati: Leelo ulushita tuye tukayakonganike?

²⁹ Waati: ‘Awe, mutiise mukasakule isote nu kwiipa ingano poonga nayo.

³⁰ Fitini fyooshi fikule kufika na pa kusakaata; na pa kusakaata nduunena alusakaata, nti: Mutangule mukonganike ifikoona, mufinyepe inyengele mukafyoche, leelo ingano yikonganikini un-ntanta yaane.’ ”

³¹ Wayumile unnduumbe unniina, waati: “Uweene-wa-mwiyulu ukoline nu lupeche lwa Aladadi, luno watoshile untu, apela un-chalo chaakwe.

³² Nalo ulunoono ukuluta imbesu shooshi, leelo ndi lwamela, lukukula ukuluta inyenyi shooshi, uluwa ichiti, ni fyuuni vya mwiyulu ifiisa ukwisu tulila um-saasa yaakwe.”

³³ Wayumila unnduumbe unniina, waati: “Uweene-wa-mwiyulu ukoliine ni nasho, sino umwanachi wuminkanya nusu wa ntowa zitatu, na wooshi wasasa.”

³⁴ Ifiintu fiyo fyooshi Yesu wanenile amaumba uku milumbe, na pasi unnduumbe atafyaansile chimwi.

³⁵ Kuti liwe iswii lino kalausha watasile, waati: “Ndufwaanga imiluumbe uku nndomo waane. Ndulaanda ifyafisama ukufuma ukulengwa kwa nsi.”

Kumanyisha unnuumbe wa fikoona

³⁶ Apano Yesu walambalike amaumba, awingila un-ng'anda. Alondeshi yaakwe yaya yannena, yaati: “Tulangilile niingo unnduumbe wa fikoona fya un-chalo.”

³⁷ Wayaneena, waati: “Kapela wa mbesu nsiifu, uMwaana-ntu.

³⁸ Ichalo chiyo iisi; nimbesu nsiipe shiyo a yaana ya weene; ni fikoona a yaana yi wilye unjiipe.

³⁹ Siluweembu uwino wapesile uwiwi Chiwa; ukusakata apa mpelelekezyo yaasi; na lusakaata ayamalaika.

⁴⁰ Ndi fino ifikoona fikulusholwa nu kwoochwa um-mooto, ifino chiluuwa apa mpelelekesho ya nsi.

⁴¹ uMwaana-ntu alutuma yamalaika yaakwe, nayo yalukonganika ukufuma um-weene waakwe ifintu vyonsi iviipe, na antu yano yaluchita ukakasi,

⁴² nu kuyasumbila un-chilinkwe cha mooto; ukuno kuluuwa ukulila nu kuchecheta amiino.

⁴³ Apano achumi yalwaaka wi laashi um-weene wisi wao. Uwa makutwi apulike.

Imiluumbe kayili

⁴⁴ Kayili uweene-wa-mwiyulu ukoliine ni insao yino yafisama un-chalo, na pano untu wayilola, wayifisa nu kukuchimba kwaakwe waaya wakasha fyooshi fino ali nafyo, wakali chalo chiyo.

⁴⁵ Kayili uweene-wa-mwiyulu ukoliine nu nchulusi, wino alushita ilulu shino shili niingo.

⁴⁶ Nawe pano walola ilulu yoonga iya mpia tupu, waaya wakazya fyooshi fino ali nafyo, wayikala.

⁴⁷ Kayili uweene-wa-mwiyulu ukoliine nu nkwao wuno yasuumba muli yeemba, ukonganya ifiintu na ifiintu.

⁴⁸ Na pano washuula yaukwesela ukuushi, yikala nu kukonganika ifyiifu um-fifya, ni ifiyiifu yafisumba.

⁴⁹ Ifino chiluuwa pa kushila kwaasi; yamalaika yalwiisa nu kupaalula ayiifu sha nasipe ya chuumi.

⁵⁰ Nu kuyasumbila un-chilinkwe cha moto; ukuno kuluuwa ukulila nu kuchecheta amiino.”

⁵¹ Yesu wayatondosya, waati: “Mwamanyi ifintu fi fyooshi?” Yannena, yaati: “Endita!”

⁵² Wayanena, waati: “Ichino fiyo kaandika weeshi wino ali unndondeshi wa weneewa-mwiyulu, akoline nu ntu wa ng'anda, wino alufumya um-usafi waakwe ifiintu ifipyaa ni fya kali.”

Yesu wakaanwa uku Nasaleti

⁵³ Nga pano Yesu wamala imilumbe yiyo, afuma apita.

⁵⁴ Nga pano wafika umunsi wa kumwao, ayasambilisha un-ng'anda yao iyi Leesa; apalinji yasunguka, yaati: “Alawi wafumya kwi amaano ya ni fipesha-maano fi?

⁵⁵ Alawi asi umwaana wi kawasa? Na anina si Malia? Nanina asi Yakobo na Yosefu na Simoni na Yuda?

⁵⁶ Na siche yaakwe yooshi yatali kuno tuli? Nga wi wafumya kwi fyoonsi fi?”

⁵⁷ Yanndaakalikila. Leelo Yesu ayanena, ati: “Kalausha asuula unchiishi, siko un-nsi ya kumwao, nu ku ng'anda ukwaakwe.”

⁵⁸ Chaleka waula ukuchita ifipesha-maano tupu kweneko, ukii kuntasumila kwao.