Mateo 10 - UPANGANO UPYA

Kwitwa nu kutumwa kwa alondeshi

¹ Nga awita alondeshi yaakwe ikumi na yaili, ayapa amaka uku fiwa ifiyiifu, yafwiinge nu kuposha indwaala shooshi ni mbombo shooshi

² Nga mashiina ya mitume yao ikumi na yaili aya: uwantangulo Simoni wino yataangi Petlo, na Andelea unina waakwe, Yakobo umwaana wi Sebedeo na Yoane unina waakwe;

³ Filipo na Batolomeo, Toma na Mateo kalifya wikodi, Yakobo umwaana Alfeo na Tadeo.

⁴ Simoni mKananeo na Yuda Iskaliote, nawe uwino wanfimiile.

⁵ Ikumi na yaili yao Yesu wayatumile, waati: “Un-nsila ya aantu yakulukuwa mutachiya, naanti uunsi wooshi uwa aSamalia mutingila-mo.

⁶ Leelo mutane muleme isila yakuya uku fweele sha ng'anda ya Islaeli shino shalowa.

⁷ Na muno mulupita musuunda, umuti: ‘Uweene-wa-mwiyulu wapalamila.’

⁸ Muposhe alwaale, mututulule afwi, muswefye aya ntana, wingini ifiwa; mwapiwa uwila, mufiime uku wiila.

⁹ “Mutachiseenda isahabu naanti impia, naanti amapeesa ummikowa yiino.

¹⁰ Naanti kwende wa sila naanti inkaanjo shiyili, naanti ifwaalo, naanti intuwa, kuno chiine umboofi apiwe ichakulya chaakwe.

¹¹ Nu nsi wooshi naka kooshi muno mwaya, musite untu umwi mwenemo uwa kapaanga, mwikale ukwaakwe fika na lino mulupita.

¹² Neemwe pano mulwiingila un-ng'anda, yalauliini.

¹³ Nga yang'anda ayakapanga, ukuwelela kwiino kuwa kuno yali, ngi yasi yakapaanga, ukuwelela kwiino kumuwelele.

¹⁴ Na weesi wino atamupokeelile nanti ukupulika amaswi yiino, pano mulufuma unng'a nda yiyo, naanti un-nzi uo, mukuma ni nkuungu ya ku muulu yino.

¹⁵ Umweenemo, ndumuneena, chilwangupala insi ya Sodoma ni Gomola, italunwamilwa wa nsi uo apa wanda wa uputushi wa milaandu.

¹⁶ “Lolini, namutuma wa fweele apa miinzi; ichino muwe na maano wa soka, mufyaalike wa mkuunda.

¹⁷ “Muchenjele unjaantu, kuno yalumutwaala um-mateengo, num-mang'anda yao iyi Leesa, yalumuuma.

¹⁸ Neemwe mulutwalwa apa alâsi na yeene uku nndaandu waane, ukuwa usyuta kuno yali nu ku ayakuluukwa.

¹⁹ Leelo ndi pano yamutwaala, mutamwelengula fino mwaufwaanga; kuno liyo kweene mulupiiwa ifyakuti mufwaange.

²⁰ Kuno aashi mweemwe mulufwaanga, leelo Mweeso wi So wino alufwaanga wino ali muno muli.

²¹ Nu ntu alufiima unniina kuti aumoolwe; ni isi alufima umwaana, na ayaana yalukatukila afyaashi yao nu kuyumoola.

²² Neemwe mulutuwiwa na aantu yooshi umwishiina lyane; leelo wino waacha wateeka umweeso nu kulemasya kufika ni chisila, uwino alufyuuka.

²³ Leelo pano yamuwiinga un-nsi u, mwitukile uku wuniina; kuno umweenemo ndumuneena, mutaluyimala imii yooshi iya Islaeli, kufika na lino uMwana-ntu alwisa.

²⁴ “Unndondeshi atalusile kasambilisha waakwe, naanti unsha atalusile umweene waakwe.

²⁵ Chingawa unndondeshi ndi wawa wi kasambilisha waakwe, nunsha ukuwa wa mweene waakwe. Ngi yiita unkola ng'anda Beelzebuli, Cheene! yatalulusha kuli yano yali un-ng'anda umwaakwe.

²⁶ Ichino mutayoopa; kuno kuusi chimwi chikuwe, chino chitalukululwa, naanti ichifise, chino chitaluwula ukumanyika.

²⁷ Chino namuneena pa luku, chilaandini apa mwengelela; na chino yamupwepwesa, lisuundini apa ng'anda apiyulu.

²⁸ Mutachoopa yano yalumoola umwiili, yapootwa ukumoola umweeso; leelo moope wino angumola umwiili nu mweeso poonga un-chilinkwe cha moto.

²⁹ Cheene! utuuni tuwili tutakukalwa uku hela yoonga? Leelo naanti konga kataangi kapone naanti apaansi, angi So wino atamanyile.

³⁰ Leelo mwemwi, ni nyele sha ku mitwe ino yiinoshasoloziwa shooshi.

³¹ Ichino mutachoopa, mweemwi mulusile utuuni naanti twafula.

³² Ichino untu weeshi uwacha wantaka apa yaantu, neene nduntaka apa maaso yi Taata uwa mwiyulu.

³³ Leelo weeshi wino wankaana apa yaantu, neene ndunkaana apa maaso yi Taata uwa mwiyulu.

³⁴ “Mutamwelengula fino ngishilu leeta ukuweleshaana kuno ukuushi, awe! Ntiisiile leeta ukuweleshaana, leelo ulupaanga.

³⁵ Kuno nigishilulu tuwanya untu nisi, nu mwaana kachi na nyina; nu nkwi na nyina-fyaala.

³⁶ Na asiluweembu yaakwe ayalye a ng'anda umwaakwe.

³⁷ Wino wakuunda isi naanti nyina ukuluta neene, ataiine neene. Na wino wakuunda umwaana wa chooshi naanti kachi ukuluta neene, ataine neene.

³⁸ Na weeshi wino ataseeshile unsalaba waakwe andoondele, ataiine neene.

³⁹ Wino wafyusha upuma waakwe, aluulofya; na wino walofya upuma waakwe ukwishiina lyaane, aluulola.

⁴⁰ “Wino wamupokelela mweemwe, ampokelile neene, na wino wampokelela neene, watampokelela wino wantumile.

⁴¹ Wino wapokelela kalausha kuno ikalausha, alupokelela unnambu wi kalausha; na wino wapokelela uwa chuumi, kuno uwa chuumi, alupokelela unnambu wa untu wa chumi.

⁴² Nu ntu weeshi wino waacha wanwesha umwi pali ya anoono naanti ulwaako lwa maasi yano yasuuka, kuno unndondeshi waane, mwenemo ndumuneena, ataluula unndambu waakwe naanti uche.”