Malko 9 - UPANGANO UPYA

¹ Ayanena, ati: “uMwenemo, ndumunena: palantu pali yano yimilile pa, yatalulola infwa nanti uche, fika na lino yacha yalola uwene-wi-Leesa ulwiza uku maka.”

Yesu wawa um-mwata unnina

² Ni chisila cha manda sita, Yesu ayasenda Petlo na Yakobo na Yoane, yaya piyulu apa mwamba untali yao yonga. Wasenuluka ichata chakwe apa yakola.

³ Imyenda yaakwe imesa-mesa iwa imitiswe nkani, fino kafula atangi aiswefye kuno kunzi.

⁴ Nga Elia na Mose yalolike angi yaluvwanga na Yesu.

⁵ Petlo wanena Yesu, waati: “Labi, chazipa sweswe tumwa pa na tuchite visansa vitatu chonga ichako na chonga ichi Mose na chonga ichi Elia.”

⁶ Kuno atamanyile icha kuvwanga, ingofi zyayalemile nkani.

⁷ Nga liza ipufi lyayachitila ichisau, iswi lyafuma umwipufi liyo, lyaati: “Wiyo uli Mwanane nkundikwa; mpulikini wi.”

⁸ Liyo kwene yalola ku na ku, yatachili yalole untu ponga nayo, leelo Yesu wenga mpela.

⁹ Na pano yalutentenka um-mwamba, wayalesizye yatalandila umwi fino yalile yalola, fika na lino Mwana-ntu wacha watutuluka uku yafwi.

¹⁰ Nga yalemi iswi liyo, yatondosyana akola na akola, yaati: “Kuo ukututuluka uku yafwi, ali chani?”

¹¹ Yantondosya, yaati: “Nga fino yakaandika yakuluti: ‘Elia alutangula ukwiza?’ ”

¹² Wayanena, waati: “Umwenemo, Elia alutangula ukwiza nu kuchita vyonsi viwe ivipya; leelo ponga na fiyo waandikilwe uli uMwana-ntu, ukuti aluchula nkani nu kusulwa?

¹³ Leelo ndumunena: Elia watawiza, nayo yamchita vyonsi fino yakasime, ndi fino waandikilwe.”

Yesu wapozya umwanche wa chiwa

¹⁴ Nga lino isa uku yalondeshi, yaloli umba ikulu kuno yali liyalizizye na yakaandika yalutondosyana nayo.

¹⁵ Liyo kwene iumba lyonsi pano lyannola, lyazunguka, lyachonchomala kunali lyannaula.

¹⁶ Wayatondosya, waati: “Mulutondosyana chani nayo?”

¹⁷ Untu wenga umwiumba wannena, waati: “Kasambilizya, naleta umwanane kuli wewe; ali ni chiwa chinunu.

¹⁸ Ngi pano chakatuka, chikulumponya pansi nu kutuka itomvu, nu kuchecheta mino nu kukala unkanka. Nanena alondeshi yako yaatisye chiwa, leelo yapotwa.”

¹⁹ Wayanena, waati: “Mwe luko luntazumila, ngikale nemwe kufika li? Nammutekelela manda yanga? Nnetini kunondi.”

²⁰ Yanneta kunali; na pano wannola liyo kwene ichiwa chanchita ichifumfumi, nawe wapona pansi nu kusalakata, ni tomvu lyatuka.

²¹ Watondosya isi, waati: “Channemile fuma li?” Waati: “Fuma uwanche.

²² Na maila tupu chikulumponya um-moto nu um-manzi, kuti chimumole. Leelo nduli na maka ya kuchita chimwi, utukumbukile, utwazwe!”

²³ Yesu wannena, waati: “Ndi uwezizye! vyonsi vingaombeka kuli wino azumile!”

²⁴ Liyo kwene isi wa unnumendo awangula ukwiswi ikulu, ati: “Nzumile, ungazwilizye uku kuntazumila kwane!”

²⁵ Yesu nawe pano walola iumba lyakongana zuwa, wachenzela ichiwa chiipe, waati: “We, chiwa chinunu na chipuli, nene ndukunena, fuma muliwi, utachi uwele kaili.”

²⁶ Changula, chanchita ichifumfumi nkani, chamfuma; nawe wawa kanti watafwa, chaleka na inji yaati: “Watafwa.”

²⁷ Leelo Yesu wannema ikasa, wankatusha, nawe wimilila.

²⁸ Nga pano wingila un-ng'anda, alondeshi yaakwe yamtondosya ukumbali, yaati: “Nga fino swemwi twaposilwe ukuchitisya?”

²⁹ Wayanena, waati: “Alavi chitangi chitine ukwiswi limwi, leelo uku kupepa.”

Yesu walanda ilya uwili apa nfwa nu kututuluka kwakwe

³⁰ Yaatina kweneko, yapita pakasi pa Galilea. Nawe atakasime ntu amanye.

³¹ Kuno wayasambilizyanga alondeshi yaakwe, ayanena, ati: “Mwana-ntu wayufimwa um-makasa ya antu, nayo yalumumola, na ndi yamumola, ichisila cha manda ya tatu alututuluka,”

³² Leelo yatalimanyile iswi liyo, yopa ukumtondosya.

Ukiwolo uwini um-wene-wa-mwiyulu

³³ Yafika ku Kapenaumu, nga pano ali un-ng'anda, ayatondosya, ati: “Mwapazyanyanga chani un-nzila?”

³⁴ Yatuzya, kuno un-nzila yapazyanyanga akola na akola, yaati: “Uwikolo uwini?”

³⁵ Awikala pansi, awita yaya ikumi na yaili, ayanena, ati: “Untu wino alusita awu wa ntangulo, aluwa uwachisila pali yoshi na kaombela wi yoshi.”

³⁶ Watola umwanche. wamwika pakasi yao, amfukatila, ayanena, ati:

³⁷ “Untu wino wapokelela umwanche wenga uwa fi ukwizina lyane, ampokelile nene; nu ntu ndi wampokelela nene, atampokelela asi nene, leelo wino wantumile.”

Anji paliponga neswe

³⁸ Yoane wannena, waati: “Kasambilizya, twawine untu aluwinga iviwa ukwizina lyako, wino atali ponga neswe; twezya kunnesya, kuno asi ponga neswe.”

³⁹ Leelo Yesu waati: “Mutachinnesya; kuno kusi untu aluchita ichipezya-mano ukwizina lyane, na kuno angalu mvwangila iviipe.

⁴⁰ Kuno wino atatuselewike, ali ponga neswe.

⁴¹ Kuno wensi uwacha wamunwesya ulwako lwa manzi, kuno mwemwe yantu yi Klisto, umwenemo ndumunena, ataluula ichilambu chakwe.

Vya kukumika

⁴² Na wensi uwacha waleka umwana unnono wonona palia yano anzumile, chinjile anyepelelwa ifinga lya kusyila un-ngalo yaakwe, nu kusumbilwa muli yemba.

⁴³ Nikasa lyako ndi liluleka ulonona, liputule; chingakuya ndi wingila um-upuma, we chinkuntu, apakuti uwe na makasa yaili nu kuyu un-chilinkwe cha moto untazima. [

⁴⁴ Muno ingonyo zyao zisufwa nu moto untazima.]

⁴⁵ Nikulu lyako ndi lyaleka wonona, liputule; chingakuya ukwingila um-upuma ni kulu lyonga, apakuti uwe na mulu yaili nu kusumbilwa un-chilinkwe. [

⁴⁶ Muno ingonyo zyao zisufwa nu moto usuzima.]

⁴⁷ Ni linso lyako ndi lyaleka ulonona, lifyonkole, ulisumbe; chingakuya ukwingila um-wene-wi-Leesa ni linso lyonga lyafwa, apakuti uwe na maaso yaili nu kusumbilwa un-chilinkwe.

⁴⁸ Muno ingonyo zyao zisufwa nu moto usuzima.

⁴⁹ Kuno chilantu alulungwa wa nsilya uku moto.

⁵⁰ Unsilya wazipa, leelo unsilya ndi utakalipe, mungatela chani chinono? Muwe nu nsilya unkasi yino; mukikale ningo, muwelezyanye na anyonko.”