Malko 7 - UPANGANO UPYA

Intambi zyi yatata-kulu

¹ Nga aFaliseo na yakaandika yamwi yano yafumile ku Yelusalemu, yakongana panali.

² Yalola yamwi apa alondeshi yaakwe yalulya ichulya na makasa yafita, alikuti: nanti kufulala.

³ Kuno aFaliseo na aYudea yoshi ndi yatafulile makasa kufika um-makufi, yatangi yalye. Yalemile ntambi zya yikolo yao.

⁴ Kaili ndi yafuma ku sokoni, ndi yatafulile, yatangi yalye; na kuli ifintu vinina tupu fino yapokelile uku vilema. Ndi fino kufula ingako ni chaluzi na masufulia.

⁵ Nga yalye aFaliseo na yakaandika yamtondosya, yaati: “Nga fino alondeshi yako yatalondile intambi zya ikolo, leelo yalulya na makasa nanti kufulala?”

⁶ Ayanena, ati: “Isaya walawizya ningo kuli mwemwe mwe yaufi, ndi fino chaandikwe: ‘Antu ya yanchindika uku milomo, leelo imyenzo yao ilu kutali nene.

⁷ Nayo yanfukamile sile, yalulangilila masambilizyo amatume na antu.’

⁸ “Mwemwi mulusya isunde li Leesa nu kulema intambi zya antu”.

⁹ Ayanena, ati: “Ee, mwalikana isunde li Leesa, kuti muleme intambi zino zya antu.

¹⁰ Kuno Mose watasile, ati: ‘Uchindike so na nyoko; na wino waatipa isi nanti nyina, aumolwe.’

¹¹ Leelo mwemwi muluti: untu ndi wanena isi nanti nyina: ‘I Kolbani,’ alikuti: ‘Chapiwa kuli Leesa,’ chintu chane chonsi chino chingakuombela, chiwe fiyo kwene.

¹² Ichisila cha ifintu fiyo mutangi muleke aombele isi nanti nyina ni chintu chimwi.

¹³ Na ku mulonona iswi li Leesa uku ntambi shino, shino mulupokesyana; kaili muluchita ivyavula fino vikoline na fiyo.”

¹⁴ Wita iumba kaili, wayanena, waati: “Mupulikisye mwensi nu kumanya.

¹⁵ Kusi chintu chino chilu kunzi chino ndi walya, chingannyikizya, nkambi vilufuma munali ifino vingannyikizya untu wiyo. [

¹⁶ Untu ngali na makutwi ya kupulikila, apulike.”]

¹⁷ Na pano wingile un-ng'anda, wasya iumba, alondeshi yaakwe yantondosya amaswi ya nnumbe uo.

¹⁸ Wayanena, waati: “Chene! Nemwe kwene musi na mano? Mutamanyile fino chonsi ichilu kunzi ya yantu, ndi chaya munali, chitangi chinnyikizye?

¹⁹ Kuno chitaluya ku mweso, leelo chiluya unda sile na kaili chifuma ukuyu umunsalani.” Ukukulanda vi, wazilula ivyakulya vyonsi.

²⁰ Walanda, waati: “Ichikulufuma umuntu, ichino chingannyikizya.

²¹ Kuno um-myenzo ya antu mukufuma melenguzi maipe, upundu,

²² kwiya, uumozi nu kuchita ivya upundu nu kukumbuka iviipe, ni mpati, kuzosya nu kuchita iviipe, uzuwa, intusi, chilumba nu kuzowa.

²³ Iviipe vyonsi fi ifino vikufuma unkasi, navyo vilulyikizya untu.”

Usumilo wa umwanachi mSilo-Foiniki

²⁴ Atina kweneko aya ku wilaya ya Tilo. Awingila un-ng'anda, asita kuti untu umwi atamanya fino munali. Leelo atachili afisame.

²⁵ Nga liyo kwene umwanachi umwi, wali nu mwana kachi, wino wali ni chiwa ichiipe, apulika maswi yaakwe; awiza pona pa mulu yaakwe.

²⁶ Nu mwanachi wiyo umGliki, luko lwakwe mSilo-foiniki. Wannomba awinge chiwa uku mwanakwe kachi.

²⁷ Nawe wannena waati: “Leka ana yatane yikute, kuno chitazifile ukutola ichulya cha yana nu kusumbila imbwa.”

²⁸ Nawe wannena, waati: “Ee, Mwene, leelo nanti imbwa kwene, zino zili pansi ya meza, zikulya fino vivipona ivya yana.”

²⁹ Nga wannena, waati: “Ukwiswi liyo, pitanga, ichiwa ichifuma um-mwanako.”

³⁰ Wampita uku ng'anda ukwakwe, wazana unsungu wiyo iyannalika pa chitala, ni chiwa ichifuma.

Yesu wapozya chinunu na kaili chipuli

³¹ Atina kaili ku wilaya ya Tilo, apita pakasi ya Sidoni waya kuli yemba wa Galilea, un-nsi ya Dekapoli.

³² Nga yannetela chipuli nawe ali na kalimba, yampapata, kuti amwikila makasa.

³³ Nga antisya umwiumba lya antu ukumbali, amwikila iminwe um-makutwi yaakwe, aswila amati, nga amwemya ululumi, alolekesya mwiyulu,

³⁴ aisyumweeso, ati: “Efatha,” alikuti: “Yulika!”

³⁵ Liyo kwene amakutwi yaakwe yayuka, akalimba kaputuka anvwanga ningo.

³⁶ Wayasunda yatanena umwi; leelo lino wayalesya, wene yalumbusya.

³⁷ Yazunguka nkani na nkani, yaati; “Wachita ningo ifintu vyonsi, yachipuli yalupulika na ya chinunu yavwanga.”