Malko 15 - UPANGANO UPYA

Yesu pali Pilato

¹ Walangi kulucha, ayikolo iyakapela yamba ponga nakombe na yakaandika, yamwitengo yoshi, yanyepa Yesu, yamsenda yamtwala kuli Pilato.

² Pilato wamtondosya, waati: “Wewe uli mwene wa aYudea?” Nawe wannena, waati: “Wewe walanda.”

³ Nayo ayikolo iyakapela yalile yamtakila ivyavula.

⁴ Pilato wamtondosya kaili, waati: “Utaluvwanga chimwi? Lola, ifintu vinga fino yakutakila.”

⁵ Leelo Yesu atachili avwange chimwi; chaleka Pilato wazunguka.

Yesu na Balaba

⁶ Apa manda ya wanda ukulu wasapulanga unnyepwa umwi, wino yalomba.

⁷ Nga kwali untu wino yatangi Balaba, wali unnyepwa ponga na antu yano yachisile mpanzyela nu kumola untu um-mpanzyela iyo.

⁸ Ngiumba liyo litampa ukunnomba ayachitile fino wamanyilila.

⁹ Pilato wayanena, waati: “Chene! Mulusita musapwile umwene wa aYudea?”

¹⁰ Kuno wamanyile fino ayikolo iyakapela yamfimile uku uzuwa.

¹¹ Leelo ayikolo iyakapela yatunkola iumba, yaati: “Chingawa ningo, Balaba ayulilwe.”

¹² Pilato wayanena kaili, waati: “Ivyo nchite uli wi, wino muluti: Mwene wa aYudea?”

¹³ Yumi chongo kaili, yaati: “Akonkomelwa apa nsalaba!”

¹⁴ Pilato wayanena, waati: “Uipe chi uno wachita?” Yalusya nkani ukumi chongo: “Akonkomelwa apa nsalaba!”

¹⁵ Pilato fino wakasime iumba lituzye, wayasapwila Balaba, wafima Yesu, pano wamuma ni mikowa, kuti akonkomelwe apa nsalaba.

Asalifi yasoweka Yesu

¹⁶ Nayo asalifi yantwala um-nsolo, ali Preitolio (alikuti: ng'anda yi Gavana) yakongana ponga asalifi yoshi.

¹⁷ Yamswika umwenda wa mala ya sambalau, yasuka inkata ya myonga, yamswika uku ntwe.

¹⁸ Yatampa ukunnaula, yaluti: “Tulukulaula, mwene wa aYudea!”

¹⁹ Yamuma ni lonje uku ntwe, yamswila na mati, yafukama nu kumwinamila.

²⁰ Nga pano yamsoweka, yamzula umwenda wuwu wa mala ya zambalau, yamzwika imyenda yaakwe unkola. Yansenda panzi kuti yamkonkomele apa nsalaba.

²¹ Yannemenkezya untu wino wapitanga ukufuma uku vyalo, Simoni wa ku Kilene, isi wi Aleksanda na Lufo, kuti asende unsalaba wakwe.

Yesu wakonkomelwa apa nsalaba

²² Yamtwala apantu pano yakuluti “Golgota,” alikuti: “Ipanga lya ntwe.”

²³ Yampa amasi ya nsabibu yano yuminkine na manemane, leelo wayakana.

²⁴ Yamkonkomela apa nsalaba, yankanya ivizwalo vyaakwe, yachita ichimala-mpaka, kuti chila ntu atole chani.

²⁵ Nga pano yali saa tatu, yamsenda, yamkonkomela apa nsalaba.

²⁶ Pali maandiko ya nnandu waakwe apiyulu yaakwe, yaatile: MWENE WA YUDEA.

²⁷ Pali aivi yakapoka-ya-ifintu, yumozilwa ponga nawe, wenga ikasa lya kwi lunji, na wenga ikasa lya kuli kamani. [

²⁸ Ngi Lyandiko lifikilile lino litile: “Yamuminkinye ponga na aipe.”]

²⁹ Nga yano yapitanga un-nzila yamtuka, yapukusya imitwe yao, yaati: “Ehee, wewe wino ungumola ng'anda-nkulu-iyi-Leesa nu kuikula uku manda yatatu;

³⁰ Fyusya umweso wako, uwike uku nsalaba!”

³¹ Ifino na yikolo iyakapela yamsoweka akola na akola, ponga na yakaandika, yaati: “Wafyusizye anji, atangi aufyusye unkola.

³² Klisto ngi umwene wa Islaeli, awike li kwene uku nsalaba, kuti tulole nu kuzumila.” Na yalye yano yakonkomilwe ponga nawe kwene yamtuka.

Yesu wafwa

³³ Na pano wawu nsanya pakasi, kwawa ichanda insi yoshi, kufika pano lyatemba.

³⁴ Na pano lyatemba, Yesu avwanga ukwiswi ikulu, ati: “Eloi, Eloi, Lama Sabaktani?” alikuti: ‘Leesa wane, Leesa wane, nga fino wanta?’

³⁵ Na pali yano yimilile pao, yamwi yaati: “Lola, alwita Elia.”

³⁶ Na wenga awituka ulwilo, wazuzya inkamu divai, watela itete, wanwesya, waati: “Lekini tulole ndi Elia wamwiza mwisye.”

³⁷ Nawe Yesu afumya iswi ikulu, umweso umputuka.

³⁸ Nu mwenda wa ng'anda-nkulu-iyi-Leesa walepuka fuma piyulu kufika na pansi, utupande tuwili.

³⁹ Ngu unkulu wa asalifi, wino wimilile apipi, pano walola wafwa, ni ifintu fino vyaombeka, walanda ukuti: “Umwenemo, untu wi wali uMwana wi Leesa.”

⁴⁰ Pali na anachi yalolanga lwa patali, pali yao walipo Malia Mandalena na Malia nyina wi Yakobo, untoo wi Yose, na Salome.

⁴¹ Yao, ayano yalondekine nawe uku Galilea nu kumwombela, na anina yinji yano yayile ponga nawe uku Yelusalemu.

Yesu wazikwa mwilindi

⁴² Nga pano yawa mangusi kuno yalalilile uwanda uno ukolelile uwanda wa Sabato.

⁴³ Wayile Yosefu untu wa ku Alimateo, untu wa mwitengo, unchindamu nawe kwene walolelanga uwene-wi-Leesa; achita ichiposye aya kuli Pilato, alomba ichala chi Yesu.

⁴⁴ Leelo Pilato azunguka fino watafwa, wita wilye unkulu wa asalifi, wamtondosya ndi akazimbo chi kapita, pano wafwila.

⁴⁵ Na pano wamanya ningo uku unkulu wa asalifi, apano wazumila Yosefu atole ichala.

⁴⁶ Akala umwenda untiswe, nga amwisya; nga afunda ichala um-mwenda untiswe, amzyika umwilindi ilyimbe uku mwamba, nga asungutizya ifinga apilindi.

⁴⁷ Na Malia Mandalena na Malia nyina wi Yose, yalolanga pano wazyikwa.