Malko 13 - UPANGANO UPYA

Yesu walanda apa ifintu vya mpelelekezyo

¹ Na pano wafumile un-ng'anda-nkulu-iyi-Leesa, unndondeshi waakwe wenga, wannenile, waati: “Kasambilizya, lola amafinga ya fino yali, ni mikulo i!”

² Yesu wannena, waati:, ‘Walola imikulo imikulu? Litalusyala pa ifinga apali nina, lino litalupomolwa.”

³ Na pano walile waatikala um-mwamba wa Mizeituni, wuno wulondekine ni ng'anda-nkulu-iyi-Leesa, Petlo na Yakobo na Yoane na Andelea yamtondosizye ukumbali, yaati:

⁴ “Tunene ifintu fiyo viluwa li? Ni chilangizyo chi pano ifintu fiyo vilupalamila ukwiza?”

⁵ Yesu atampa ukuyanena, ati: “Chenjelini, umwi atamuzosya.

⁶ Ainji yalwiza ukwizina lyane, angi yaluti: “Nene nkola,’ nayo yaluzosya ainji.

⁷ Nemwe pano mwapulika isumo ni mpwepwe zyi isumo, mutachopa; kuno fiyo vilwisa, leelo impelelekezyo ichili.

⁸ Kuno antu yalukatuka ukulwa na antu, nu wene ulukatuka ukulwa nu wene; kuluwa ivitetema vya nsi mûntu-mûntu, kulupona inzala; ifintu vi uli ntangulo ya machulo.

⁹ “Nemwe chenjelini; kuno yalumutwala apa yakombe nu um-mang'anda yi Leesa yalumuma, nemwe mulutwalwa pali yano yamulâsile na yene ukwizina lyane, ukuwu syuta kuno yali.

¹⁰ Ni ntangulo iswi-zipe litane lisundwe uku yantu yoshi.

¹¹ Na pano yacha yamusenda nu kumusongelela, mutachelengula chino mwaulanda pao kwene, lyonsi lino mwacha mwanenwa lilandini, kuno asi mwemwe mululanda, leelo uMweso Nswefu.

¹² Nuntu alusongelela unnina, kuti yamumole, na isi alusongelela umwana, na ana yalukatukila avyazi yao nu kuyumola.

¹³ Nemwe mulutuwiwa na antu yoshi ukwizina lyane. Leelo uwacha walemasya fika ni chisila, uwino alufyuka.

¹⁴ “Lelo pano mwacha mwalola uipe wa wononi wimilila pataliile—kasoma amanya—apano yano yali um-Yudea itukile um-myamba.

¹⁵ Nuntu wino ali apidali, atika nanti ukwingila nu kutola chimwi un-ng'anda umwakwe.

¹⁶ Na wino ali un-chalo atapiluka uku chisila ukutola umwenda wakwe.

¹⁷ Leelo akalanda kao ayanda na alonsya amanda yao.

¹⁸ Leelo pepini vitacha vize apa manda ya nzusi.

¹⁹ Kuno amanda yalye yaluwa ya machulo, ukuluta fuma na lino Leesa waumvile insi fika na kasalaka, na kaili kutaluwa nanti uche.

²⁰ Nu Mwene ndi atali aputukizye amanda yao, atala afyuke untu umwi, leelo kuno kuli asolole yano wayasolwile, chaleka waputukizya amanda yao.

²¹ Na manda yalye nguntu wamunena, waati: “Lolini, Klisto ali pa, nanti ali kuku, mutachi zumila.

²² Kuno yalwisa aklisto-ya-ufi, na malau ya ufi. Yaluchita ivipezya-mano ni vizunguko, kuti yamuzosye nasolola kwene ndi chingawa.

²³ Leelo mwemwi, chenjelini, inti munena vyonsi inkolelo.

²⁴ “Lelo amanda yalye, ichisila cha machulo yao, ilanzi lilufitokela, nu mwezi utaluwala.

²⁵ Ni ntanda zya mwiyulu zilupona, na maka yano yali umwiyulu yalutelengana.

²⁶ Apano yalulola uMwana-ntu alwiza um-mapufi uku maka tupu nukulu.

²⁷ Apano alutuma yamalaika uku yakonganika asolole yaakwe ukufuma isansa zini, ukufuma kuno isansa lyasilile ilya nsi, fika na kuno isansa lya mwiyulu lyasilila.

Amasambilizyo ya nsamvu

²⁸ “Sambililini unnumbe wa nsamvu: amatai yaakwe pano yalemba nu kufumya amafwa, mumanya fino ichisiku ichipalamila.

²⁹ Ifino nemwe kwene, pano mwalola ifintu fiyo vyatampa, mumanye fino ndi apipi um-milyango.

³⁰ uMwenemo ndumunena, uluko lu lutalusila ange ifintu vi vichili vize.

³¹ Iyulu ni nsi vilusila, leelo amaswi yane yatalusila nanti uche.

³² Leelo ukumanya kwa wanda ulye na pano chafika, kusi wino amanyile, nanti ayamalaika ya mwiyulu, nanti uMwana, leelo Tata mpela.

³³ “Tekelini, muchesye; kuno mutamanyile uluwa li.

³⁴ Unnumbe waakwe chili wa ntu wino wapita um-masi, wasya ing'anda yaakwe, wapa aomvi yaakwe amaka, na chila ntu u nnimo wakwe, nawe wanena kalolela wa ng'anda atachilala.

³⁵ Mutachilala leelo, kuno mutamanyile pano unkola ng'anda alwiza, ngi amanguzi nanti usiku apakasi, nanti pali ya nkolwa, nanti katondo-tondo.

³⁶ Atisa suwa amusane umulala.

³⁷ Naliyo ndumunena mwemwe, namunena mwensi: Mutachilala.”