Malko 11 - UPANGANO UPYA

Yesu wingila um-Yelusalemu

¹ Na pano yapalamila i Yelusalemu apipi ni Betfage ni Betania, uku mwamba wa Mizeituni, watumile alondeshi yaakwe yaili.

² Ayanena, ati: “Yangini umunzi wuwo ula apipi, na pano mwaya, liyo kwene mwaunnola umwana mpunda unyepe, atatana wakowelwa nu ntu; msapulini nnete.

³ Nu ntu ndi waati: ‘Nga fino muluchita fiyo?’ muti: ‘uMwene alunsita; nga liyo kwene wamneta pa kaili.’ ”

⁴ Yampita, nga yalola umwana mpunda anyefilwe apa nnyango, apanzi un-nzila inkulu, yamsapula.

⁵ Antu yano yimilile penepo, yamwi yayanena, yaati: “Muluchita chani ukusapula umwana mpunda?”

⁶ Yayanena fino Yesu ayatumile, nga yayazumila.

⁷ Nga yaletela Yesu umwana mpunda wiyo, nga yala imyenda yao apiyulu, nga awikala penepo.

⁸ Antu ainji yala imyenda yao un-nzila na yamwi amafwa yano yatema um-vyalo.

⁹ Na antu yano yakolezile na yano yalondela, yangula uku maswi makulu, yaati: “Osana, alimpepelelwa, wino alwiza ukwizina lya Mwene.

¹⁰ Wapepelelwa uwene uno ulwiza uwi tata witu Daudi; Osana umwiyulu.”

¹¹ Nawe awingila um-Yelusalemu un-ng'anda-nkulu-iyi-Leesa; na pano walola vyonsi konsi konsi, kuno amangusi, afuma ayu ku Betania ponga na yalye ikumi na yaili.

Yesu waatipwila unsamvu; waswefya ng'anda-nkulu-iyi-Leesa

¹² Nu ntondo pano yafuma uku Betania, alola inzala.

¹³ Nga alola ukutali unsamvu uli na mafwa, aya kuti palimwi azane amasamvu kweneko; na lino wafika, atatana zane chimwi, leelo amafwa sile, kuno asumacha.

¹⁴ Waunena, waati: “Kufuma ilelo na manda ti umwi atalulya ivisêke vyako!” Alondeshi yapulika.

¹⁵ Yafika uku Yelusalemu. Nawe awingila un-ng'anda-nkulu-iyi-Leesa, atampa kuwinga yalye yano yakazyanga nu kukala un-ng'anda-nkulu-iyi-Leesa. Apenula imeza zyao yakakaunkana mpia, ni visumbi vi yakakazya ya nkunda.

¹⁶ Nga atachili aleke umwi asende ichivya un-ng'anda-nkulu-iyi-Leesa.

¹⁷ Asambilizya, ati: “Chene! Chitaandikwe ing'anda yane ilwitwa ng'anda ya kusalikila uku yantu yoshi? Leelo mwemwi mwaichita ichele lya ivi.”

¹⁸ Ayikolo iyakapela na yakaandika yapulika nga yamba ivyakuti yamumole, kuno yamofile, kuno iumba lyonsi lyazungwike uku masambilizya yaakwe.

¹⁹ Na pano lyawa amangusi wafumile umunsi.

²⁰ Nu ntondo pano yalupita, yalola unsamvu wuwo uwunyala ukufuma umwisinda.

²¹ Petlo welengula fino chali, wannena, waati: “Labi, lola unsamvu wuno waatifile, uwunyala.”

²² Yesu wannena, waati: “Zumilini Leesa.

²³ Umwenemo ndumunena, wensi uwacha wanena umwamba wu, waati: “Wipuka, ukaponele muli yemba, atachi tentenganya um-mweso wakwe, leelo ataile fino yano atasile iyawa, yaluwa yaakwe.

²⁴ Ichino fiyo ndumunena, yoshi yano mululomba nu kusalika, tailini fino mwanjapata, nayo yamwa yino.

²⁵ Nalino mulwimilila nu kusalika, mwelele ndi muli niswi nu ntu, ukuti na Tata wino uwa mwiyulu amwelele nemwe amaifyo yino. [

²⁶ Leelo ngi mwemwe mutalwelela, na Tata wino uwa mwiyulu atalumwelela mwemwe amaifyo yino.]

Kutondosya Yesu apa maka yaakwe

²⁷ Kaili yaya um-Yelusalemu; na pano wapitanaa un-ng'anda-nkulu-iyi-Leesa, yaile kunali ayikolo iyakapela na yakaandika na yikolo.

²⁸ Yannena, yaati: “Uku maka chi uluomba ifintu vi? Nawe uwini wakupile amaka ukuomba vi?”

²⁹ Yesu wayanena, waati: “Namutondosye iswi lyonga, nemwe munene, apano namunena uku maka chi nduomba vi.

³⁰ Ulubatizyo lwi Yoane lwafumile umwiyulu nanti uku yantu? Munene.”

³¹ Nga yatondosyana yonga, yaati: “Ndi twati: ‘Lwafumile umwiyulu,’ wanti: ‘Nga fino mutachili mutaile?’

³² Napo kwene, ndi twati: ‘Lwafumile uku yantu’ ” Yofile antu, kuno antu yoshi yawine Yoane fino ikalauzya unkola.

³³ Yannena Yesu, yaati: “Tutamanyile.” Yesu wayanena, waati: “Nene kwene nsumunena mwemwe uku maka uli yano nduomba vi.”