Malko 10 - UPANGANO UPYA

Kufima lucheto

¹ Nga akatuka aya unmbali ya Yudea ni mbalama yi Yodani, amaumba tupu yakongana kaili kunali, ayasambilizya kaili fino wamanyilila.

² Nga aFaliseo yaya kunali yamtondosya, yaati: “Chene! Chili ningo untu ukuta unchi?” Na ku yalumwezya.

³ Nawe ayanena, ati: “Mose wamunenile chani?”

⁴ Yalanda, yaati: “Mose watunenile ukwandika imbaluwa ya kutana nu kunta.”

⁵ Leelo Yesu ayanena, ati: “Uku ukomu wa myenzo yino wamwandikile ichilangaso chi.

⁶ Leelo ukufuma ukulengwa kwa nsi, wayaumvile monsi nu mwanachi.

⁷ Ichino fiyo untu alusya isi na nyina, alemana nu nchi.

⁸ Na yao yaili yaluwa umwili wonga, nga yasi yaili kaili, leelo umwili wonga.

⁹ Ichino chino Leesa walimba, untu atachilimbulula.”

¹⁰ Nu ku ng'anda alondeshi yamtondosya kaili iswi liyo.

¹¹ Wayanena, waati: “Untu wensi uwacha wata unchi watola unji, aluchita ivya upundu kuli wiyo.

¹² Nu nchi ndi wasya iya nu kutolwa nunji, aluchita ivya upundu.”

Yesu wapepelela anche

¹³ Nga yannetela anche yanono kuti ayemye; leelo alondeshi yaakwe yayachenzela.

¹⁴ Leelo Yesu pano walola, atuwa nkani, ayanena, ati: “Lekini anche yanono yize kunondi. Mutachi yalesya, kuno anche ndi ya uwene-wi-Leesa uwao.

¹⁵ Umwenemo ndumunena: wensi wino ataluzumila uwene-wi-Leesa wa mwanche nnono, atalwingila nanti uche.”

¹⁶ Nga ayafukatila, awika makasa pano yali, ayapepelela.

Unnumendo unsafi

¹⁷ Na pano alufuma ukuyu kunsila, untu wenga wisu lwilo, wamfukamila, wamtondosha, waati: “Kasambilisha nsipe, inchite uli kuti mpyane upuma wa manda ti?”

¹⁸ Yesu wannena, waati: “Uku chani ukungita ne nsipe? Kusi unsipe leelo wenga ali Leesa.

¹⁹ Umanyile ivilangaso: ‘Utachumola; utachichita ivya upundu. Utachiiya; utachisyutila ufi; utachifya; uchindike so na nyoko.’

²⁰ Wannena, waati: “Kasambilizya, yoshi ya nayalema ukufuma uwanche wane.”

²¹ Nga Yesu annolekesya nkani, amkunda, annena, ati: “Wawulilwa ichintu chonga: Yanga kakazye vyonsi fino uli navyo, upe apina, newe ukuwa ni vyuma umwiyulu; apano uwize undondele.”

²² Leelo wene wakonza ichikole ukwiswi liyo, wapita ni chikonko, kuno wali ni vyuma tupu.

²³ Yesu alola konsi konsi, annena alondeshi yaakwe, ati: “Vino chilutala asavi ukwingila um-wene-wi-Leesa.”

²⁴ Alondeshi yazunguka uku maswi yaakwe. Yesu ayanena kaili, ati: “Yanane, fino chatala ukwingila um-wene-wi-Leesa.

²⁵ Chapepela ntwanga-mwendo kwingila nu kufuminkana umwilina lya sindani, kuluta unsafi ukwingila um-wene-wi-Leesa.”

²⁶ Nayo yasunguka leka, yannena yaati: “Uwini fwandi wino angafyuka?”

²⁷ Yesu ayalolekesya, ati: “Uku yantu chitangi chiwe fiyo, leelo kuli Leesa chisi fiyo. Kuno vyonsi vingaombeka kuli Leesa.”

²⁸ Nga Petlo atampa ukunnena, ati: “Lola, sweswe twasya vyonsi nu ku kulondela Wewe.”

²⁹ Yesu waati: “Umwenemo ndumunena, kusi untu wino wasyi ng'anda nanti anina ayonsi, nanti anina aziche, nanti nyina nanti isi, nanti ana, nanti fyalo kwisina lyane nu kwiswi-zipe;

³⁰ leelo angapiwa maila umwanda: li kwene apa kasalaka, ing'anda nanina ayonsi na aziche na nyina na ana ni vyalo ponga nu kuzunywa, nun-nsi yino ilwiza upuma wa manda ti.

³¹ Leelo ali inji aya ntangulo yaluwa ya chisila, na ya chisila yaluwa ya ntangulo.”

Yesu walanda ilya utatu apa nfwa nu kututuluka kwakwe

³² Nayo yapitanga ukuya ku Yelusalemu na Yesu angayakolelile; yazunguka, nayo apa kunnondela yali ni ngofi. Nga kaili ayatola yalye ikumi na yaili, atampa ukuyanena amaswi ya ifintu fino vyaumsana.

³³ Ayanena, ati: “Lolini, twayu ku Yelusalemu nu Mwana-ntu alufimwa um-makasa ya yikolo iyakapela na yakaandika, nayo yalumputwila ukufwa; yalumfima uku yakulukuwa.

³⁴ Nayo yalumsoweka nu kumswila amati, yalumuma ni mikowa nu kumumola; ni chisila cha manda yatatu alututuluka.”

Utalâsa, leelo ombela

³⁵ Nga Yakobo na Yoane ana yi Zebedeo, yaya kunali, yannena, yaati: “Kasambilizya, tulusita utuchitile lyonsi lino twakulomba.”

³⁶ Wayanena, waati: “Mulusita nmuchitile chani?”

³⁷ Yannena, yaati: “Tulusita utuleke sweswe twikale wenga ikasa lyako ilyi lunji na wenga ikasa lyako ilya kuli kamani, um-ukulu wako.”

³⁸ Yesu wayanena, waati: “Mutamanyile chino mululomba. Munganwela ulwako luno ng'welile nene, nanti ukubatiziwa ulubatizyo luno nbatiziwilwe nene?”

³⁹ Yannena, yaati: “Ee.” Yesu wayanena, waati: “Ulwako luno ndunwela nene, mulunwela, nu lubatizyo, luno mbatizilwe nene, mwambatiziwa.

⁴⁰ Leelo amaswi ya kwikala ikasa lyane ilya kwilunji nanti ikasa lyane ilya kuli kamani, lisi lyane ukumupa, leelo yalupiwa yao yano yawikilwe.”

⁴¹ Na pano yalye ikumi yapulika, yatampa ukuyalakalikila Yakobo na Yoane.

⁴² Nga Yesu ayita ayanena, ati: “Mumanyile yano yalwitwa aene ya akulukuwa yakululâsa uku maka, na ikolo yao yakuluyaombisya.

⁴³ Leelo chitali fiyo kuli mwemwe; leelo untu wino alusita ukuwa uwikolo kuli mwemwe, aluwa uwa kumuombela mwemwe.

⁴⁴ Nu ntu wino alusita ukumukolelela, aluwa umuofi wino.

⁴⁵ Kuno Mwana-ntu atizile ukwizu ombelwa, leelo ukuombela nu kuufima awe unkuluzi wa inji.”

Batimeo umpofu wapoziwa

⁴⁶ Nga yafika um-Yeliko na pano yalema inzila ukufuma ku Yeliko ponga na alondeshi yaakwe, niumba ikulu, mwana wi Timeo, Batimeo, wilye kalomba umpofu, wikazile umbali ya nzila.

⁴⁷ Nawe pano wapulika ukuti Yesu wa ku Nazaleti, watampa kwangula nu kufumya iswi lyaakwe nukuti: “Yesu, mwana wi Daudi, unkumbukile!”

⁴⁸ Na inji yamkalipila, kuti atuzye; leelo alusya ukwangula ukwiswi: “Mwana wi Daudi, unkumbukile!”

⁴⁹ Nga Yesu awimilila, ati: “Mwitini.” Nga yita mpofu wiyo, yannena, yaati: “Teka umweso; katuka, alukwita.”

⁵⁰ Nga asumba umwenda wakwe, atumpuka, aya kuli Yesu.

⁵¹ Nga Yesu wannena, waati: “Ulusita nkuombela chani?” Nga umpofu wiyo waati: “Kasambilizya wane, ndusita umpe ukulola.”

⁵² Nga Yesu wannena, waati: “Pitanga, usumilo wako wakupozya.” Liyo kwene atampa kulola, annondela un-nzila.