Luka 9 - UPANGANO UPYA

Yesu watuma alondeshi ikumi na yaili

¹ Nga wayita yaya ikumi na yaili, wayapa ukulu na maka uku fiwa fyoshi nu kuposha imbombo.

² Wayatuma yume imbila ya wene-wi-Leesa, nu kuposha alwale.

³ Wayanena, wati: “Mutachisenda chimwi icha kusila yiyo, intuwa nanti kwende, nanti unkate, nanti impia, nanti umwi pali mwemwe atawa ni nkanjo shili.

⁴ Ni ng'anda yoshi yino mwingila wikalini mwenemo, fika na lino mulufuma nu kupita.

⁵ Na yano yatamupokelile, pano mulufuma um-nsi uo, mukung'unte ni nkungu ya ku mulu yino, ukuwa ushuta kuno yali.”

⁶ Nga yafuma, yapitana um-mizi, nu kusunda iswi-isipe, nu kuposha antu poshi poshi.

Masima yi Yelodi

⁷ Ngu umwene Yelodi, pano wapulika amaswi ya ifintu vi fyonsi fino fyaombeka, asima kuno antu tupu yaatile, Yoane watatutuluka uku yafwi.

⁸ Na yamwi yaati: “Elia wataloleka.” Na yamwi yaati: “Umwi apa malau ya kali watatutuluka.”

⁹ Leelo Yelodi ati: “Yoane namputwile untwe; nga uwini wi wino ndupulika ifintu vi kuli wenewe?” Asita ukunnola.

Yesu wapa antu ielfu shisano ifyakulya

¹⁰ Nga imitume iyo pano yawela, yanndandile ifintu fyonsi fino yaombike. Nga wayasenda wapita nayo yonga yaya uku nsi umwi uno yakuluti: Betsaida.

¹¹ Walangi maumba yachimanya, yalondela; nawe wayapokelela wafwanga nayo amaswi ya wene-wi-Leesa, aposha yano yakasime ukuposhiwa.

¹² Na pano lîla, yaya ikumi na yaili yaya kunali, yannena, yaati: “Ulambalike iumba, ukuti yapite um-misi num-fyalo fya pipi, yasite apa kulala ni fyakulya, kuno apantu pa pano tuli inyika ntupu.”

¹³ Wayanena, waati: “Yapini mwemwe ichakulya.” Nayo yaati: “Tuli ni mikate yisano niswi shili sile, ngi tutaile tukayakalile antu ya yoshi ifyakulya.”

¹⁴ Kuno ayonsi yano yali penepo palumwi yali elfu shisano. Wayanena alondeshi yaakwe, waati: “Tekini antu um-mitantali, untantali onga antu amakumi yasano.”

¹⁵ Yachita fiyo kwene, yayikalisha yoshi.

¹⁶ Watola imikate isano ilye ninswi shili, walolekesha umwiyulu, wafipepelela, wafikunyola, wapa alondeshi yaakwe kuti yape iumba.

¹⁷ Yalya yikuta yoshi, uku fikunyolwa fino fyashalile, yakonganika iviyo ikumi na viili.

Petlo wataka fino Yesu i Klisto

¹⁸ Walangi pano alusalika wenga, walondeshi yaakwe yali pipi nawe; ayatondosha, ati: “Chene! amaumba ya yakuluti nene wini?”

¹⁹ Yannena, yaati: “ ‘We Yoane Kabatisha,’ leelo yamwi yaati: ‘We Elia.’ na yamwi yaati: ‘We umwi apa malau ya kali watatutuluka.’ ”

²⁰ Wayanena, waati: “Nemwe muluti nene wini?” Petlo wannena, waati: “Wewe uli Klisto wi Leesa.”

²¹ Wayasunda nu kuyalesha, kuti yatalandila untu nanti umwi ichintu chiyo.

²² Wafwanga ukuti: “Chilungime uMwana-ntu kusanwa na machulo tupu nu kukanwa na akombe na ikolo iyakapela na yakaandika, nu kumolwa; nu wanda wa utatu alututuluka.”

²³ Ayanena yoshi, wati: “Untu wensi wino alusita ukundondela, aukane wenga, autwike unsalaba waakwe manda yoshi, andondele.

²⁴ Kuno untu wino alushita ukuufyusya upuma wakwe, aluulofya; nuntu wino walofya upuma waakwe ukwishina lyane, aluufyusha.

²⁵ Kuno chingamwaswa chani untu ndi wapata fyoshi ifya kuno ukushi, ndi waumola nanti akuulofya unkola?

²⁶ Ichino fiyo wensi wino wacha wandolela insoni nene na maswi yane, uMwana-ntu alunndolela insoni untu wiyo, pano wacha wisa um-ukulu wakwe, nu wi Tata nu wi yamalaika yaswepe.

²⁷ Umwenemo namunena, pali yamwi muli yano imilile pa, yatalulola infwa nanti uche, yalutangula ukulola uwene-wi-Leesa.”

Yesu wawa um-mwata unnina

²⁸ Ichisila cha maswi yao, yapita amanda nnane, asenda Petlo ya Yoane na Yakobo, akwela uku mwamba ukuyupepa.

²⁹ Nga lino alusalika, ichata cha ku maaso yaakwe chasenuka, imyenda yaakwe iwa imitiswe, ilumesa.

³⁰ Nga antu yaili yalolike, yalufwanga nawe, nayo i Mose na Elia.

³¹ Pano yalolike um-ukulu, angi yalufwanga isha pa nfwa yaakwe, ino iluloleka uku Yelusalemu.

³² Petlo na yaya yano yali ponga nawe yali nutulo, nga pano yalanka, yalola ukulu wakwe, na yaya yaili yano yimilila ponga nawe.

³³ Nga pano yaatiana pano ali, Petlo wanena Yesu, waati: “Mwene, chasipa ukuti tungawa pa; tuchite ifisansa vitatu, chonga ichako wewe, na chonga ichi Mose na chonga ichi Elia.” Na kuno yatamanyile chino alufwanga.

³⁴ Nga pano alufwanga ifintu fi, lisile ipufi liyachitila ichisau; yopa pano yawa umwipu filiyo.

³⁵ Iswi lyafuma umwipu filyaati: “Alawi uMwanane, wino nasolola; mpulikini.”

³⁶ Ni iswi liyo pano lyasila, Yesu walolike ali wenga. Nayo yatusha, nanti kulandila umwi chimwi ifintu fino yawine amanda yalye.

Yesu waposha umwanche wa chiwa

³⁷ Nu wanda wa uwili pano yatentenka um-mwamba, iumba ikulu yakomana nawe.

³⁸ Nga untu umwi umwiumba alaizya ukwiswi, ati: “Kasambilisha, ndukulomba, kuti ulole umwanane, kuno umwanane ali wenga,

³⁹ ichiwa chikulunnema, pao kwene awangula, nga chimchita wa ichifumfumi, atuka nitomvu, nga chikulu nkwangolakwangola chatalamana ukufuma munali.

⁴⁰ Napapata alondeshi yako, kuti yachifumye, leelo yapotwa.”

⁴¹ Yesu annena, ati: “Mwe umpanda usina usumilo wanyongana; namwikala nemwe nu kumutekelela fika na li? Leta umwanako pa.”

⁴² Nga pano alwiza ichiwa champonya apansi, chamchita wa ichifumfumi. Leelo Yesu wachikalipila ichiwa chiipe, wapozya umwanche, amwezya kuli isi.

⁴³ Yoshi yazunguka ukulola ukulu wi Leesa. Pano yachilizunguka uku ifintu vyonsi fino wachisile, wene wanenile alondeshi yaakwe, waati:

Yesu walanda kaili apa nfwa yaakwe

⁴⁴ “Muleme ningo amaswi ya um-makutwi yino, kuno Mwana-ntu wayutelwa um-makasa ya antu.”

⁴⁵ Leelo yatamanyile iswi liyo, lyafisime uku yakola, yatalimanya; yopa ukumtondosha ngi chili chani iswi liyo.

Uwikolo uwini um-wene-wa-mwiyulu

⁴⁶ Yatampa ukutondoshana wino aluwa uwikolo apa yanina.

⁴⁷ Leelo Yesu wamanya amelenguzi ya myenso yao, watosile umwanche unnono, wamwika apipi nawe.

⁴⁸ Wayanena, waati: “Wensi wino wacha wapokelela umwanche wi ukwishina lyane, aluwa watampokelela nene; na wensi wino wampokelela nene, alumpokelela wino wantumile. Kuno wino unnono pali mwemwe mwensi, wiyo ali unkulu.”

⁴⁹ Yoane wannena, waati: “Mwene nkulu, twawine untu alufumya iviwa ukwishina lyako; twannesha, kuno asi ponga neswe.”

⁵⁰ Leelo Yesu wannena, waati: “Mutachinnesha, kuno wino atamukanile ali ponga nemwe.”

Asamalia yakana ukupokelela Yesu

⁵¹ Walangi pano amanda ya kukwela kwakwe umwiyulu yapalamila, alungama ukuya uku Yelusalemu,

⁵² atuma antu yakuti yankolelele. Nayo yapita, yaya yingila umunzi wa aSamalia, kuti yanteyanyishe.

⁵³ Leelo akola yatampokelile, kuno amaso yaakwe yalungime ukuya uku Yelusalemu.

⁵⁴ Yakobo na Yoane, alondeshi yaakwe, pano yalola fiyo, yaati: “Mwene, ulusita tunene umoto wike ukufuma umwiyulu uyoche? (ndi fino Elia wachisile?)”

⁵⁵ Leelo wene, ayalesha. (Afwanga, ati: “Mutamanyile ngi umweso wa uli uno muli nao.)

⁵⁶ Kuno Mwana-ntu atisilu umola imyenso ya antu, leelo ukuyifyusha.” Yakatuka ukupita yaya uku nsi unji.

Kulondela Yesu

⁵⁷ Nga pano yapitanga un-nsila, untu wenga wannenile, waati: “Nankulondela konsi kuno ungaya.”

⁵⁸ Yesu wannena, waati: “Yankusa yali na machele, ni fyuni fya mwiyulu vili ni fisanso, leelo Mwana-ntu atakwite nanti apa kulalika untwe.”

⁵⁹ Nga wanena unji, wati: “Ndondela.” Leelo wene wati “Mwene, ntane mpite nkashike tata.”

⁶⁰ Wannena, waati: “Leka afwi yashikane akola; leelo wemwi yanga ukume imbila ya wene-wi-Leesa.”

⁶¹ Kaili untu unji wannena, waati: “Mwene, nankulondela, leelo ntane nkalambalike antu ya ng'anda umwane.”

⁶² Leelo Yesu annena, ati: “Untu wino alemile nkolo nu kulima, na kuno alulolekesha uku chisila, atasipile um-wene-wi-Leesa.”