Luka 18 - UPANGANO UPYA

Umwanachi unsimbe nu Nkombe

¹ Ayanena unnumbe fino yapepe Leesa manda yoshi nanti kutonta.

² Ati: “Kwali umunsi umwi unkombe atakopa Leesa nanti ukumanya antu, awe.

³ Umunsi uo kwene mwali umwanachi umwi unsimbe, wino wayanga kunali, wati: ‘Unputwile unnandu na wino tululemanila nawe.’

⁴ Nawe walile akana, nga ichisila um-mweso waakwe wati: ‘Nanti fino ntachindike Leesa nanti ukumanya antu;

⁵ leelo fino unsimbe wi atala nsuntila, namputwila unnandu wakwe, atanngasha kuno atala wisa kunondi.’ ”

⁶ Mwene wati “Pulikini fino alulanda unkombe njipe wiyo.

⁷ Nga Leesa, Chene! ataluvwangila yao yano wasolola, yano yalunnilila usiku nu nsanya, nanti ukuyatekelela?

⁸ Ndumunena, aluyafwangila suwa. Leelo pano Mwana-ntu wacha wisa, alusana usumilo kuno ukushi?”

Unfaliseo na kalifya wikodi

⁹ Nga wayenena unndumbe u antu yano yautenshanga fino aya chumi, nu kusula anji yoshi, ati:

¹⁰ “Antu yaili yapisile ukuya un-ng'anda-nkulu-iyi-Leesa ukuyusalika; wenga unFaliseo nu wa uwili kalifya wikodi.

¹¹ UnFaliseo wiwi awimilila nu kusalika um-mweso waakwe fi: ‘We Leesa, nakusamalisha, kuno nemwi ntakosile anji, yakapoka-fya-antu, aipe, apundu, nanti wiwi kalifya wikodi.

¹² Nemwi nkuishilisha amaila yaili uku juma, nkulufima isempu likumi um-ifintu fyane fyoshi fino ndupata.’

¹³ Leelo kalifya wikodi wiyo wene wimilila lwa patali, atachili akatusha nanti amaso yaakwe umwiyulu, leelo auma apa chifuwa, wati: ‘We Leesa, undolele inkumbo, nene wa maifyo.’

¹⁴ Ndumunena, wiyo waile uku ng'anda ukwakwe atalilwa ichumi, ukuluta unji. Kuno wensi wino waikusha, yalumchefya, na wino wauchefya, yalumkusha.”

Yesu wapepelela anche anono

¹⁵ Yannetela ana anono, kuti ayemye; leelo alondeshi pano yalola, yayakalipila.

¹⁶ Leelo wene Yesu aita yize kunali, ati: “Lekini anche yanono yize kunondi; mutachi yalesye, kuno antu ndi yao uwene wi Leesa uwao.

¹⁷ Umwenemo ndumunena, untu wensi wino ataupokelile uwene-wi-Leesa wa mwana unnono, atalwingila mwenemo nanti uche.”

Unsafi umwi watondosha Yesu

¹⁸ Kaili untu wikolo umwi amtondosha, wati: “Kasambilisha nsipe, nchite uli, kuti mpyane upuma wa manda ti?”

¹⁹ Yesu wannena, waati: “Uku chani ulungita ne nsipe? Kushi unsipe, leelo wenga, nawe uli Leesa.

²⁰ Umanyile ifilangaso: Utachita ifya upundu; utumola untu; utachiya; utashutila ufi; uchindike so na nyoko.”

²¹ Wene wati: “Yonsi yao nayalema fuma uwanche wane.”

²² Yesu pano wapulika fiyo, annena wati: “Waulilwa ichintu chonga, kakashe fyoshi fino uli nafyo, uwankanya apina; newe uluwa wawika umwiyulu, apano uwise undondele.”

²³ Leelo pano wapulika ifintu fi, awa ni chikonko nkani, kuno walu nsafi nkani.

²⁴ Nga Yesu pano walola fiyo, wati: “Lolini, fino chatala asafi yano yataila ifyuma, ukwingila um-wene-wi-Leesa.

²⁵ Kuno changupala ntwanga-mwendo ukufuminkana umwilina lya sindani, ukuluta apakuti unsafi angingila um-wene-wi-Leesa.”

²⁶ Na yano yapulika, yaati: “Uwini wino angafyuka ngi fiyo?”

²⁷ Leelo wene wati: “Fintu fino fitangi fiombeke uku antu, fingaombeka kuli Leesa.”

²⁸ Nga Petlo annena, wati: “Lola, swemwi twasha ifintu fitu fyoshi nu kukulondela.”

²⁹ Ayanena, wati: “Umwenemo ndumunena, kushi untu wino washa ing'anda yaakwe, nanti unchi, nanti anina, nanti afyasi, nanti ana yaakwe, ku nnandu wa wene-wi-Leesa,

³⁰ wino atapokelela nkani amaila tupu um-manda ya, nu m-manda yano yalwisa upuma wa manda ti.”

Yesu walanda ilya utatu apa nfwa nu kututuluka kwakwe

³¹ Nga atola yaya ikumi na yaili, ayanena, wati: “Lolini, twapita ukuya uku Yelusalemu, ni ifintu fyoshi fino uMwana-ntu waandikilwe na malau, filuombeka.

³² Kuno alufimwa um-makasa ya antu yakulukuwa, yalumsoweka nu kumsewanya, yalumswila na mati.

³³ Yalumuma ni mikowa ni chisila yalumumola; nu wanda wa utatu alututuluka.”

³⁴ Leelo yatamanyile chimwi nanti uche apa maswi yao, ni chintu chi chafisime kuno yali, yatamanyile chino alufwanga.

Yesu waposha umpofu wa ku Yeliko

³⁵ Walangi pano wapalamila uku Yeliko, untu wenga nawe umpofu watensi umbali ya nsila, walombanga uwila.

³⁶ Nga pano wapulika amaumba yalupita, watondosha, waati: “Kwawa chani?”

³⁷ Yannena, yaati: “Yesu wa ku Nazaleti alupita.”

³⁸ Nga uma ichongo angaluti: “Yesu, mwana wi Daudi, unkumbukile!”

³⁹ Nga yano yalu ku nkolelo, yamchenzela, kuti atushe. Leelo wene alusha nkani ukukusha iswi, wati: “We mwana wi Daudi, unkumbukile!”

⁴⁰ Nga Yesu wimilila, walanda yannete kunali; na pano wampalamila, amtondosya, ati:

⁴¹ “Ulushita nkuchitila chani?” Nawe ati: “Mwene, umpe ukulola.”

⁴² Nga Yesu annena, ati: Pokelela ukulola; usumilo wako wakuposha.”

⁴³ Liyo kwene apiwa ukulola, annondela, na kuno alutensha Leesa. Na antu yoshi pano yalola ichintu chiyo, yatensha Leesa.