Luka 17 - UPANGANO UPYA

Ifya kukumika

¹ Anena alondeshi yaakwe, wati: “Chitangawa siku vya kupona filwisa, leelo akalanda kuli wino afileshile.

² Chingasipila nkani untu wiyo anyepelelwe ifinga lya kushila un-ngalo yaakwe, nu kusumbilwa muli yemba, kuti atononisha umwi apa yanono ya.

³ Chenjelini. Ngu nnyonko wakonona, msunde, ngi wafipela, mwelele.

⁴ Ngi wakonona maila saba uku wanda onga, nu kwisa kunuli amaila saba, wati: ‘Nafipela!’ Mwelele.”

⁵ Mitume yanena uMwene, yaati: “Tongeleseshe usumilo.”

⁶ Ngu Mwene wati: “Ngangi mukwite usumilo nanti wa lupeche lwa Aladadi, munganena unsamfu u, muti: Wipuka ukapelwe muli yemba, nao ungamupulika.

⁷ “Lelo uwini pali mwemwe ndi ali nu unnimi nanti kachema wa ng'ombe, angannena lino wapiluka ukufuma uku chalo, ati: ‘Nguna zuwa, wikala ulye ichakulya?’

⁸ Chene! atangi annena, wati: ‘Ntekela ichakulya, ndye, unyepe umbombele, fika na lino nalya nu kunwa, apano newe ulya nu kung'wa?’

⁹ Chene! angasamalisha umuofi wiyo, kuno waomba fino wanenilwe?

¹⁰ Ifino nemwe, lino mwachita ifintu fyoshi fino munenilwe, muti: ‘Sweswe yaomfi tutasifile, tuomfile imilimo yitu ino ituile.’ ”

Yesu waposha antu ikumi aya ntana

¹¹ Walangi pano yali un-nsila yalupita ukuya uku Yelusalemu, wapisile apakasi ya Samalia ni Galilea.

¹² Nga pano waya umunsi umwi, akomengana nantu ikumi aya ntana, yimilile lwa patali.

¹³ Yakusha amaswi yao, yaati: “We Yesu, Mwene nkulu, utukumbukile!”

¹⁴ Pano wayalola ayanena, ati: “Pitangi mukaulangishe kuli yakapela.” Walangi pano yalupita yaswepa.

¹⁵ Wenga pano walola fino atapola, apiluka, na kuno alutesha Leesa ukwiswi kulu.

¹⁶ Nga apona afukime apa mulu yaakwe, asamalisha kunali. Nawe wali unSamalia.

¹⁷ Nga Yesu afwanga, ati: “Yataswefile yoshi ikumi? Tisa yali kwi?

¹⁸ Chene! yatalolike yano yapiluka ukwisu tesha Leesa, siku mweni wi?”

¹⁹ Nga annena, wati: “Katuka, pitanga, usumilo wako wakuposha.”

Kwisa kwa wene-wi-Leesa

²⁰ Nga pano aFaliseo yamtondosha, yaati: “Uwene-wi-Leesa ulwisa li?” Ayanena, wati: “Uwene-wi-Leesa utalwisa uku kulolwa ningo.

²¹ Nanti yataluti: Lolini, uli pa, nanti, ukuku; kuno lolini, uwene-wi-Leesa uli unkasi yino.”

²² Nga anena alondeshi yaakwe, wati: “Amanda yalwisa yano mulukunda ukulola uwanda umwi apa manda ya Mwana-ntu, mutaulola.

²³ Na kaili yalumunena, yaati: ‘Lolini kuku, lolini ku!’ Mutachitina pano muli, nanti ukuyalondela.

²⁴ Kuno fino ulukosha lwa semba lukukosha ukufuma ulusansa mbalinga, nu kufika uku lusansa lunina ulwa mwiyulu, ifino Mwana-ntu aluwa apa wanda wakwe.

²⁵ Leelo alutana asanwe na machulo tupu, nu kukanwa nu mpanda u.

²⁶ Ndi fino chali um-manda yi Noa, ifino chiluwa apa manda ya Mwana-ntu.

²⁷ Yalyanga nu kunwa, yapindulanga nu kupindukwa, kufika na lino Noa wingile um-safina, unnamba wisa wayumola yoshi.

²⁸ Chiluwa ndi fino chali um-manda yi Loti, yalyanga nu kunwa, yakalanga nu kukasha, yapelanga nu kukula.

²⁹ Leelo uwanda uno Loti waatinile uku Sodoma, kwatonyile moto ni sanku ukufuma umwiyulu, vyayumola yoshi.

³⁰ Fiyo kwene ifino chiluwa uwanda uno wacha waloleka uMwana-ntu.

³¹ “Apa wanda uo, wino ali apidali, ni fifya fyaakwe fili un-ng'anda, atalwika ukutola; na wino ali uku fyalo, ifino ataluwela.

³² Mwisukile pali nka Loti!

³³ Untu wensi wino alusita ukufyusha upuma wakwe, aluulofya, na wino waulofya, aluufyusha.

³⁴ Ndumunena, usiku uo antu yaili yaluwanga yawisi apa chitala chonga, wenga alutolwa, na wenga alushala.

³⁵ Anachi yaili yalushanga apaliponga; wenga alutolwa, wenga alushala.”

³⁶ [Antu yaili yaluwa un-chalo, wenga alutolwa; wenga alushala.]

³⁷ Yamtondosha, yaati: “Ukwi Mwene?” Ayanena, ati “Kuno ichala chili, akuno amakosi yalukongana.”