Luka 15 - UPANGANO UPYA

Nfwele ino yalowa

¹ Nga yakalifya yikodi yoshi na yamaifyo yayanga kunali, kuti yampulikishe.

² Nga aFaliseo na yakaandika yamsumbikila, yaati: “Untu wi alupokelela ayamaifyo na kaili alulya nayo.”

³ Ayanena unndumbe u, ati:

⁴ “Uwini pali mwemwe ngali ni nfwele umwanda, ngi yonga yalowa, atangi ashe shilye amakumi tisa na tisa uku chundu, apita ukuyusita yino itilowa, kufika na lino ailole?

⁵ Nawe pano wailola aisenda apa luto, apita aluchimba.

⁶ Na pano wafika uku ng'anda ukwakwe, awita yakatakwe na mwipamba lya pipi, ayanena, ati: ‘Chimbini ponga nene, kuno ntilola infwele yane yino yalowile.’

⁷ Ndumunena, fiyo kwene ifino kuluwa ukuchimba umwiyulu uku ntu wenga uwa maifyo, wino wavipela, ukuluta na pa antu amakumi tisa na tisa a chumi, yano yatalusita ukuvipela.

⁸ “Nanti umwanachi chi, wino ali ni mpia ikumi, ndi yonga yalowa, atalukozya koloboi nu kupyila ng'anda nu kusita nkani kufika na lino ailole?

⁹ Na pano wailola, awita yakatakwe na mwipamba lya pipi, ayanena, ati: ‘Chimbini ponga nene, kuno ntilulola kaili ulupia luno lwalowile.’

¹⁰ Ndumunena, ifino yamalaika yi Leesa yaluchimba umwiyulu, uku ntu wenga uwa maifyo wino wafipela.”

Mwana walowela

¹¹ Wafwanga, ati: “Untu wenga wali na ana yaili.

¹² Uwachanche wanena isi, waati: ‘Tata, umpe ifyuma fino findungime.’ Nga wayankanya ifintu fyaakwe.

¹³ Na manda nanti kufula, uwa chanche wiyo wakonganika ifintu fyoshi, ampita um-masi, wayasesha ifyuma fyaakwe kuo um-ifintu chakachaka.

¹⁴ Nga pano wamala fyoshi, insala inkulu ipona un-nsi iyo, nawe kwene atampa ukuulilwa.

¹⁵ Nga aya alemana nu ntu umwi unkola-isi yiyo, nawe wamtwite uku chalo ukuchema kapoli.

¹⁶ Nawe wakumbukanga ukulya amapapa yano yakapoli yalyanga, leelo kusi umwi wino wampile chimwi.

¹⁷ Pano amano yamzana, avwanga, ati: ‘Tata ali na omvi yavula, yano yalulya ichakulya chisyala. Nene ndi pa ndufwa ninzala.

¹⁸ Nampita nje kuli tata, nkannene, nti: Tata, nonona umwiyulu na pali wewe.

¹⁹ Ntasipile kaili ukwitwa mwanako, unchite wa momvi wako umwi.’

²⁰ Nga wakatuka wapita ukuya kuli isi. Pano achili alu kutali, isi wannola, wannolela inkumbu; wituka ulwilo, waya wamchindila, wamtunga-tunga.

²¹ “Umwana wiyo anena isi, ati: ‘Tata, nonona umwiyulu na pali wewe; ntaile ukwitwa mwanako kaili.’

²² Leelo isi wanenile umuofi yaakwe, ati: ‘Letini suwa umwenda uno uli ningo, mnswike; mnswike mbalaminwe apa nwe wakwe, ninfwato nswikini.

²³ Letini indama ii ino yatelepe, muikome; neswe tulye nu kuchimba.

²⁴ Kuno umwanane walile wafwa, nawe fwandi umpuma; walile walowa, leelo wataloleka.’ Nga yatampa ukuchimbila.

²⁵ “Sileshi wali uku chalo, nga pano alupita ukwisa uku ng'anda, apulika ingoma angi yaluchina.

²⁶ Wita umuofi wenga, wamtondosha, waati: ‘Ifintu fi ichani?’

²⁷ Nawe annena, ati: ‘Unnyonko atisa, na so atamfyulila indama yino yatelepa; kuno watannola umpuma.’

²⁸ Leelo walakalika, wakana nu kwingila mwenemo. Nga isi wafuma pansi, waya wapapata.

²⁹ Leelo wene wanena isi, waati: ‘Lola, nene nakuombela imyaka yinga i; ntachili nsule ichilangaso chako nanti limwi; leelo nemwi utachili umpe nanti unsesi wa mpwata, inchite ukuchimba ponga na yakatane.

³⁰ Leelo pano wiza umwanako wiyo, wino walya ifintu ifyako ponga na yachiselele, wene wamkomela indama yino yatelepa.’

³¹ Nawe wannena, waati: ‘Mwanane, uwewe uli ponga nene manda yoshi, na fyoshi fino ndi nafyo ifyako.

³² Na kaili ukuchimba nu kuchina chisifile, kuno unnyonko wi walile wafwa, nawe fwandi umpuma, walile walowa, leelo wataloleka.’ ”