Luka 10 - UPANGANO UPYA

Yesu watuma alondeshi amakumi saba na yaili

¹ Nga apa chisila cha ifintu fi, Mwene wasolwile anji amakumi saba na yaili, wayatuma yaili yaili uku nkolelela ukuya chila shi na poshi pano nkola wakasime ukuya.

² Wayanena, wati: “Kuli mboto inkulu, leelo alimi yali yache; ichino pepini Mwene wa mboto atwale alimi uku mboto yaakwe.

³ Pitangini, lolini, namutuma wa ana ya nfwele apa miishi.

⁴ Mutachisenda imbeti, nanti kwende, nanti nfwato; mutachilaula antu un-nsila.

⁵ Ni ng'anda yoshi yino mwingila mwenemo, mutangula ukulaula vi: ‘Kuwe chele-chele un-ng'anda yi.’

⁶ Nga ngi alimo umwana wa uchele-chele, uchele-chele wino ulumwikalila; nga si mo, uchele-chele wino ulumuwelela.

⁷ Ichino wikalangini un-ng'anda iyo kwene, angi mululya nu kungwa kuno yali, chino yamupa, kuno umbofi asipile ukupiwa ichiombelo chakwe. Mutachipitana um-mang'anda.

⁸ Nunsi woshi uno mwaya ndi yamupokelela, lyangini ifyakulya fino yateka pano muli.

⁹ Poshi alwale yano yali mwenemo, muyanena fino uwene-wi-Leesa uupalamila.

¹⁰ Leelo unsi woshi uno mwaya mwenemo, na muno yatamupokelile, fumini mwenemo, na pano mulupita um-misolo yaakwe, mulande muti:

¹¹ ‘Ni nkungu ya mu-nsi wuno, ino itilemantila uku mulu yitu, twaikung'utila kuno muli; leelo mumanye fino uwene-wi-Leesa uupalamila.’

¹² Namunena fino chilwangupala uku Sodoma uwanda uo, ukuluta un-nsi uo.

¹³ “Akalanda kunali Kolasini, akalanda kunali, Betsaida, kuno ndi ifipesha-mano fino fyaombike uku mwino, fyali viombeke uku Tilo na Sidoni, ngali apano yafipeshile nu kuswala masaka ni itwi nu kwikala fiyo.

¹⁴ Leelo uwanda wa uputushi chiluwa changupala uku Tilo na Sidoni ukuluta mwemwe.

¹⁵ Nawe Kapenaumu, Chene! ulukula nu mwiyulu kwene? Ulusumbwa ukushimu.

¹⁶ “Wino alumpulika mwemwe, alumpulika nene, na wino wamukana mwemwe, alunkana nene; na wino wankana nene, watamkana wino wantumile.”

¹⁷ Apano yaya amakumi saba na yaili yawela yaluchimba, yaati: “Mwene, ni fiwa kwene vilutupulika ukwishina lyako.”

¹⁸ Wene wayanena, wati: “Nawine Shetani wapona ukufuma mwiyulu wa lukosho.

¹⁹ Lolini, namupa amaka ya kulyata insoka ni kalela, na maka yoshi ayi siluembu; kusi nanti chimwi chino chilumuchisa.

²⁰ Leelo mutachichimba kuno ifiwa filumupulika, leelo chimbai kuno amashina yino yaandikwa umwiyulu.”

Yesu wachimba

²¹ Pao kwene wachimba uku Mweso Nswefu, wati: “Nakusamalisha Tata, Mwene wa mwiyulu na pansi, kuno ifintu fi wayafisa ayamano na akumanya, wayulila utunya, Endi, Tata, kuno ifino chikusipile.

²² Napiwa ifintu fyoshi na Tata, kushi wino amanyile uMwana uwini shiko Isi, na kushi wino amanyile Isi, shiko Mwana na wensi wino Mwana akasime ukunjulila.”

²³ Nga wasenuka uku walondeshi, wayanena ukumbali, wati: “Yali ninkata amaso yano yalulola ifintu fino mululola mwemwe.

²⁴ Kuno namunena, fino amalau ainji na ene yakasime ukulola ifintu fino mululola mwemwe, yatafiwine; nu kupulika ifintu fino mulupulika mwemwe, yatafipulike.”

Unsamalia nsipe

²⁵ Nga lolini, Kamanya-wa-ntambi umwi awimilila ukumwesha, afwanga, wati: “Kasambilisha, nchite uli kuti mpyane upuma wa manda ti?”

²⁶ Nawe wannena waati: “Chaandikwe uli un-Ntambi? Ulusoma uli?”

²⁷ Nawe waati: “Ukunde uMwene Leesa wako uku mweso wako woshi, nu ku upuma wako woshi, nu ku maka yako yoshi, nu ku mano yako yoshi; nu nnyonko ndi fino wuikunda wenkola.”

²⁸ Wannena, waati: “Walanda ningo, kachite fiyo kwene, newe ukuwa nupuma.”

²⁹ Leelo wene wakasime ukuumanyisha fino uwa chumi, atondosha Yesu, ati: “Nu wa chane nawe uwini?”

³⁰ Nga Yesu wannena, waati: “Untu wenga wapisile ukufuma uku Yelusalemu, wayanga uku Yeliko; aponela apa yakulupoka-fya-antu; yansula imyenda, yamuma uluma, yampita, yansha alusamba.

³¹ Nga kapela umwi wapitanga un-nsila iyo kwene; pano wanndola wapambata uku mbali.

³² Nu unLevi ifiyo kwene, walangi wafika penepo anndola, apambata uku mbali.

³³ Leelo unSamalia wenga undwendo lwakwe, walangi lino wafika pano ali, pano wanndola, wanndolela inkumbu.

³⁴ Wapalamila, wanyepela ifilonda fyaakwe, ampaka mafuta na mansi ya mizabibu; amkwesha pa nyama yaakwe, amtwala uku ng'anda ya eni nu kumsunga.

³⁵ Uwanda wa uwili afima impia shiili, apa unkola-ng'anda ya eni, wati: ‘Nsungae wi, na choshi chino wasumba ukuluta, pano nawela ndwisa nkulipe.’

³⁶ Walola uli pali yao yatatu, uwini wino wali uwa chakwe pali wiyo wino waponile pali yakulupoka-fya-yantu?”

³⁷ Nawe waati: “Uwiyo wino wanndolile inkumbo.” Nga Yesu annena, wati: “Pitanga, newe kachite fiyo kwene.”

Yesu un-ng'anda mwi Malita na Malia

³⁸ Nga lino yalupita, awingila umunsi umwi. Umwanachiumwi ishina lyaakwe Malita, amsenda uku ng'anda ukwakwe.

³⁹ Nawe wali nunnina, ishina lyaakwe i Malia, wino watesi pali Yesu, angi alupulikisha amaswi yaakwe.

⁴⁰ Leelo Malita wachunchumbikanga ni milimo tupu; waya kunali, wati: “Mwene, utawine fino chaipa uwachane atansha nduomba nenga? Nnene angazwe.”

⁴¹ Leelo Mwene wannena, waati: “Malita, Malita; ulwamala nu kuchulila ifintu finji.

⁴² Leelo chilusitiwa ichintu chonga sile, na Malia watasolola ichintu chino chasipa, chino chitalutishiwa kunali.”