Luka 1 - UPANGANO UPYA

¹ Kuno yantu ainji yaandika amaswi ya ifintu fino fyaombike pano tuli.

² Ndi fino yatulandile yashuta yano yawine, naomvi yiswi liyo, ukufuma intangulo.

³ Nalola chili ningo nene kuno nafipilila ningo ifintu fiyo fyooshi ukufuma intangulo, uku kwandikila ningo, Teofilo nsipe.

⁴ Ukuti umanye ningo uku ifintu fino wasambilishiwa.

Kufyalwa kwi Yoane Kabatisha kwalandwa

⁵ Apa manda yi Helodi umwene wa aYudea, kwali kapela umwi, ishina lyaakwe i Zakalia, uwa luti lwi Abiya, nunchi wali wa ku yana yi Aloni, ishina lyaakwe i Luzabeti.

⁶ Na yoshi yaili yali aya chumi apa maaso yi Leesa, yali ni filangaso fyooshi ifya Mwene ni ntambi yaakwe, nanti kulowa

⁷ Nayo yatakwite umwana, kuno Luzabeti wali umumba, nayo yoshi yaili yalile yakota.

⁸ Nga walangi pano aluomba milimo yi kapela unnduti lwakwe pali Leesa,

⁹ ukuyana ni ntambi shi kapela, wasolwilwe ukwingila nu kuombela un-ng'anda-nkulu-iya-Mwene, ukuti asukilishe ubani.

¹⁰ Na maumba yoshi aya antu yanosalikanga apansi, pano chafika ukusukilisha ubani.

¹¹ Malaika wa Mwene waloleka kunali, angi awimilile isansa lya kwilunji ilya altale ya kusukilizya ubani.

¹² Zakalia wasima, pano wanndola, ingofi shanndema.

¹³ Leelo malaika wiyo wannena, waati: “Utachopa Zakalia, kuno ipepo lyako ilipulikikwa, nu wapako Luzabeti alukufyalila umwana umonsi, nishina lyaakwe uluntema i Yoane.

¹⁴ Newe uluseka nu kuchimba, na antu tupu yaluchimbila ukufyalwa kwakwe.

¹⁵ Kuno aluwa unkulu apa maso ya Mwene, atalunwa amasi ya mizabibu nanti ivya kukoleka; alushula uMweso Nswefu ukufuma unda yi nyina.

¹⁶ Na ainji umu Islaeli aluyawesha uku Mwene, Leesa wao.

¹⁷ Nawe alukolela inkolelo yaakwe uku mweso wi Elia na maka yaakwe, ukuti asenule imyenso yi yaisi iwelelu ku yana, kutelela akanyi amano ya chumi nu kuwikila uMwene antu yano yachitwa ningo.”

¹⁸ Nga Zakalia wanena malaika, waati: “Nammanya uli iswi li? Kuno ne nkombe nu wapane unkolechi wa manda tupu.”

¹⁹ Malaika wannena, waati: “Nene Gablieli nkulwimilila apa maaso yi Leesa, nene ntumilwe ukufwanga newe nu kukumanyisha ifintu fisipe fi.

²⁰ Lola, wambwa ichinunu, usufwangaa nu kufika lino ifintu fi filuloleka, kuno utasumile amaswi yane, nayo yaluloleka apa makati yaakwe.”

²¹ Na antu yano yalolelanga Zakalia, yazunguka kuno washimba un-ng'anda-nkulu-iyi-Leesa.

²² Pano wafuma champota ukufwanga nayo, yamanya fino watalola malele un-ng'anda-nkulu-iyi-Leesa. Nawe wayasinisha, washala ichinunu fifi kwene.

²³ Nga chali pano amanda ya kuwomba kwakwe yashila, wapita uku ng'anda ukwakwe.

²⁴ Nga apa chisila cha manda yao, Luzabeti unchi wasenda inda, nga wafisama imyeshi yisano, ati:

²⁵ “Alafi ifino uMwene wanchitile um-manda yano wandolanga, kuti antisishe insoni shane apa antu.”

Kufyalwa kwi Yesu kwalandwa

²⁶ Um-mwezi wa sita malaika Gablieli watumilwe na Leesa, ukuti aye ukuunsi wa Galilea, ishina lyaakwe Nasaleti.

²⁷ Uku nsungu wino walile wimalwa na untu ishina lyaakwe i Yosefu, uwa luko lwi Daudi; ishina lya nsungu wiyo i Malia.

²⁸ Wingila un-ng'anda umwakwe, waati: “Ndukulaula, we wino wapiwa ifizipe, uMwene ali ponga newe.”

²⁹ Nawe washima nkani apa maswi yaakwe, welengula um-mweso waati: “Unndau u, wawa uli?”

³⁰ Malaika wannena, waati: “Utachopa, Malia; kuno ukupiwa ifizipe kuli Leesa.

³¹ Nga lola, wansenda inda, nu ukuleta ukupapa umwana monsi, nishina lyaakwe ulauntema i Yesu.

³² Wene aluwa unkulu, alwitwa umwana waakwe Wa-Mwiyulu, nu Mwene Leesa alumpa ichisumbi-cha-wene ichi Daudi, isi wakwe.

³³ Alulâsa ing'anda yi Yakobo manda ti, nu wene waakwe utalusila.”

³⁴ Nga Malia wanena malaika, waati: “Lyambwa uli iswi li, fino nene ntamanyile umoshi?”

³⁵ Nga malaika wannena, waati: “uMweso Nswefu ulukwikila panuli, na maka yaakwe wino ali Wa-Mwiyulu yalukukuwa wa chisau; ichino fiyo chino chiluvyalwa chilwiitwa ichiswefu, Mwana wi Leesa.

³⁶ Nga kaili lola, uwa luko lwako, Luzabeti nawe wasenda inda ya mwana monsi um-ukolechi wakwe; nu mwezi u uwa sita kuli wenewe wino yatangi umumba.

³⁷ Kuno kusi chino chitangi chiombeke kuli Leesa.”

³⁸ Nga Malia afwanga ukuti: “Lolini, nemwi ne umuofi wa Mwene; chiwe ndi fino ufwangile.” Nga malaika watina wapita.

Malia wapita kulaula Luzabeti

³⁹ Nga Malia wakatuka um'manda yalye kwene, wapita suwa uku nsi ya myamba afika nu ku nsi umwi uwi Yuda.

⁴⁰ Awingila un-ng'anda mwi Zakalia, alaula Luzabeti.

⁴¹ Nga pano Luzabeti wapulika ukulaula kwi Malia, umwana walunduka un-nda yaakwe; Luzabeti awikilwa nu Mweso Nswefu.

⁴² Afwanga ukwiswi ikulu, ati: “Wapepelelwa wewe apa yanachi yooshi, na wino alufyalwa unda yako, wapepelelwa.

⁴³ Lyangisila uli iswi li, lino nyina wa Mwene wane awise kunondi?

⁴⁴ Kuno iswi lya kulaula kwako pano lingila um-makutwi yane, umwana wachinda uku kuchimba un-nda yane.

⁴⁵ Ali ni nkata wino waumila, kuno ifintu fino wanenilwe nu Mwene filuombeka.”

Mwimbo wi Malia

⁴⁶ Nga Malia avwanga ukuti: “Upuma wane ulutensha uMwene.

⁴⁷ Nu mweso wane uluchimba kuli Leesa, Kafyusha wane.

⁴⁸ Kuno wataulola upina wa mombofi wakwe. Kuno lola, ukufuma kasalaka, inko shoshi zilungita ne wa nkata.

⁴⁹ Kuno Wa-Maka watanchitila ifintu ifikulu, Nishina lyaakwe iswepe.

⁵⁰ Nu kukumbukila kwakwe kulipo uku mipanda ni mipanda, kuli yano yanchindika.

⁵¹ Watachita amaka ukwikasa lyaakwe; waponya aya chilumba um-melenguzi ya myenso yao.

⁵² Waponya ayikolo apa fisumbi fyao ifya wene; wateka apina.

⁵³ Aya nsala wataikusha ifisipe, na asavi wayawinga minwe.

⁵⁴ Waswilisha Islaeli, umbofi wakwe, kuti alushe kukumbukila kwakwe.

⁵⁵ Ndi fino wanenile yatatayitu— Ablahamu ni imipanda waakwe amanda ti.”

⁵⁶ Malia watensi nawe ndikuti imyesi yitatu, ngawela ukwakwe.

Yoane Kubatisha wafyalwa

⁵⁷ Nga amanda ya kuti Luzabeti apape yafika, afyala umwana umoshi.

⁵⁸ Nga aya mwipamba na aluko lwakwe yapulika fino Mwene wamwingilisisha ifintu fisipe, nga yachimba ponga nawe.

⁵⁹ Nga chali apa wanda wa nnane, yiza ukuchita umwana ichibalu, yakana ukumpa ishina lyi isi Zakalia.

⁶⁰ Leelo nyina waati: “Linyo awe, leelo tumteme ilyi Yoane.”

⁶¹ Nayo yannena, yaati: “Pasi umwi unduko lwako uwishina li.”

⁶² Nga yashinisha isi, kuti yamanye fino akasime ukumtemela.

⁶³ Nga washita ichibao, awandika ukuti: “Ishina lyaakwe i Yoane.” Nayo yasunguka yoshi.

⁶⁴ Liyo kwene unndomo waakwe usapuka ponga nu lulumi lwakwe kwene, atampa ukufwanga, ukutesha Leesa.

⁶⁵ Ingofi shayalema yoshi, yano yatensi apipi nayo, ni ifintu fi fyoshi vilumbuka un-nsi yoshi iya myamba ya Yudea.

⁶⁶ Nga yoshi yano yafipulika, yafiwika ummyenso yao, yaati: “Umwana wi aluwa uwa uli?” Kuno ikasa lya Mwene lyali ponga nawe.

Mwimbo wi Zakalia

⁶⁷ Na Zakalia isi washula uMweso Nswefu, walausha, ati:

⁶⁸ “Utensho uku Mwene, Leesa wa Islaeli; kuno waatikisa antu yaakwe nu kuyakulula.

⁶⁹ Watwimikila ulupembe lwa ufyusi, apa nndyango wi Daudi, umuofi wakwe.

⁷⁰ Ndi fino wafwangile kufuma kali uku milomo ya malau yaakwe aswepe.

⁷¹ Tufyuke na yasiluwembu yitu, num-makasa yi yoshi yano yatutuwa.

⁷² Ukuti akumbukile yatata yitu nu kwielengasha Upangano waakwe uswepe.

⁷³ Ichilapo chino walapile tata witu Ablahamu.

⁷⁴ Ukuti alutupa sweswe ukutukulula um-masasa yi yasiluwembu yitu, kumbombela nanti ngofi,

⁷⁵ um-uswepe ni chumi, apa maaso yaakwe, amanda yitu yoshi,

⁷⁶ Newe mwana, ulwitwa wewi lau lyi Wa-Mwiyulu. Kuno ulukolela inkolelo apa maaso ya Mwene, ukuteyanya insila shaakwe.

⁷⁷ Ukuyapa antu yaakwe umanyisho wa ufyusi, uku kwelelwa amaifyo yao.

⁷⁸ Uku nsila ya kukumbukilwa na Leesa witu, kuno ukuswepa kuno kufumile umwiyulu, ukutwisila.

⁷⁹ Ukuyaswefesha yano yatensi un-chanda nu un-chisau cha nfwa. Nu kukolelela amulu yitu un-nsila ya kuwelela.”

⁸⁰ Ngu mwana wiyo wakusile, aungilisika amaka um-Mweso; awikala unnusanga fika na lino walolike uku yaIslaeli.