Filemoni 1 - UPANGANO UPYA

¹ Nene Paulo nanyepwa uku nnandu wi Klisto Yesu, nu wachitu Timoteo, kuli Filemoni unkundikwa witu, umuofi ponga neswe.

² Na kuli Afia, uwachitu kachi, na kuli Alkipo unsalifi ponga neswe, nu kwikongani lino lili un-ng'anda yako:

³ Inkumbu ziwe nemwe nu welesho fino vifumile kuli Leesa Tata witu nu ku Mwene Yesu Klisto.

Ulukundo nusumilo wi Filemoni

⁴ Ndusamalizya Leesa wane amanda yoshi, pano nakwe lengula um-mapepo yane.

⁵ Kuno napulika ulukundo lwako nu sumilo uno uli nao uku Mwene Yesu nu ku yaswefiwa yoshi.

⁶ Ukuti ukuminkana kwa usumilo wako uombe unnimo wakwe, un-kumanya kwa ifintu fyonsi ifisipe, fino fili kuno tuli, muli Klisto.

⁷ Kuno nachimvile nu kutekana ku lukundo lwako, kuno we wachane, imyenzo ya yaswefiwa yatekana kunuli.

Oneshimo

⁸ Ichino, nanti fino ndi ni chiposye muli Klisto uku kutuma lino liyine kuli wewe,

⁹ leelo uku nnandu wa lukundo ndukulomba. Ndi fino ndi, nene Paulo mkombe, na li kwene ne unnyepwa wi Klisto Yesu.

¹⁰ Ndukulomba uku nnandu wa mwanane, wino navile un-kunyepwa kwane, uli Onesimo.

¹¹ Wino kali atakuzipile, leelo li kwene akuzipile nkani, wewe nene kwene.

¹² Wiyo namwesha kuno uli, unkola kwene; nawe alimweeso wane kwene.

¹³ Wino nemwi nakasime inneme awikale kunondi, kuti angaswilizye, pano usipo, un-kunyepwa kwane kwiswi-sipe.

¹⁴ Leelo ntakasi ukuomba chimwi siku uku kukasama kwako, ukuti ukutonta kwako kutawa uti ukwa maka, leelo uku kukunda kwako.

¹⁵ Kuno, kunde ichino wakupalwike amanda yamwi, kuti uwe nawe kaili manda ti.

¹⁶ Ukufuma li kwene chisi ndi fino unzya, leelo ukuluta nu-nzya, wachitu unkundikwa; kunondi nemwi, na kuli wewe ukuluta, uku mwili nu ku Mwene.

¹⁷ Ichino, ngi wandola fino ne nyonko, umpokelele wi nene kwene.

¹⁸ Na ndi wakuyifya chimwi, nanti ukuwa nimpa kunuli, undole nene.

¹⁹ Ngaandike ukwikasa lyane nenkola ne Paulo, nene ndulipa. Leelo ntaluti fino uli nimpa kunondi: impa yakomweeso wako!

²⁰ Endi, wachane, ndusita ukupata chimwi kunuli uku Mwene; unteke umweso wane muli Klisto.

²¹ Ichino nkwandikile kuno ntaile fino wanpulika; manyile fino wanchita ukuluta na fino nkunenile.

²² Na kaili unteyanyizye nu uwikalo kwene, kuno ntaile fino uku kupepa kwino mulundola.

Amaswi ya kumalila

²³ Epafla, wino wanyepwa ponga nene muli Klisto Yesu, alukulaula.

²⁴ Na Malko na Alistako na Dema na Luka, aomvi ponga nene.

²⁵ Inkumbu fya Mwene Yesu Klisto sikale ponga ni myenso yino.