Aloma 6 - UPANGANO UPYA

Kufwa nu kututuluka ponga na Klisto

¹ Tuvwange chani leelo, tuwanga um-maifyo, ukuti inkumbu zivulisye nkani?

² Mwiko ta! Sweswe yano twafwa uku maifyo, tungawa nupuma uli um-maifyo?

³ Mutamanyile fino sweswe swensi yano twabatiziwa muli Klisto Yesu, twabatiziwa un-nfwa yaakwe?

⁴ Ichino twazyisilwe ponga nawe uku nzila ya lubatizyo un-nfwa yaakwe, ukuti ndi fino Klisto watutulwike uku yafwi uku ukulu wi Tata, ifino neswe kwene tupite um-upuma upya.

⁵ Kuno ndi fino twalemana nawe uku-kukolenkana kwa nfwa yaakwe, ifino tululemana nu ku-kukolenkana kwa ututuluko waakwe kwene.

⁶ Angi tumanyile iswi li, wino uuntu witu uwa kali umozilwe ponga nawe, kuti umwili wa maifyo wononeke, tutasyala um-uzya wa maifyo.

⁷ Kuno wene wino wafwile, watulwa um-maka ya maifyo.

⁸ Leelo ndi twafwile ponga na Klisto, tutaile fino tulwikala ponga nawe kwene;

⁹ kuno tumanyile fino Klisto pano watutulwike uku yafwi, atalufwa kaili: nanti nfwa italumulâsa kaili.

¹⁰ Kuno kulye ukufwa kwakwe, wafwilile limwi apa maifyo; leelo kulye ukwikala kwakwe, awikalile Leesa.

¹¹ Ifino nemwe kwene uwa lini fino mwe yafwi uku maifyo, leelo mwe ya upuma kuli Leesa muli Klisto Yesu.

¹² Ichino mutaleka iifyo lilâse um-myili ino iya nfwa, apalinji muzumile tama zyaakwe.

¹³ Nanti mutachifima ivyai fino ku maifyo, viwe ivyanzo vya viipe, leelo ifimini mwe akola kuli Leesa, wi yano yafwile leelo apuma li kwene, ni vyai fino viwe ivyanzo vya chumi kuli Leesa.

¹⁴ Kuno iifyo litalumulâsa mwemwe, kuno musi un-Ntambi, leelo muli un-nkumbu.

Tuchite uli?

¹⁵ Ichani leelo? Tuchite amaifyo kuno tusi un-Ntambi, leelo tuli un-nkumbu? Mwiko ta!

¹⁶ Mutamanyile fino kuli wi wino muluufima ukuwa azya yaakwe ukumwombela, mwawa yazya yaakwe wino muluombela, nanti uomvi wa maifyo uno ululeta infwa, nanti uomvi uno ululeta ichumi.

¹⁷ Leelo Leesa asamaliziwe, kuno mwali yazya ya maifyo, leelo mwayezile uku myenzo yino, mwalema amasambilizyo yalye yano mwapokelile.

¹⁸ Nga pano mwakululwa um-uzya wa maifyo, mwawa yazya yachumi.

¹⁹ Nduvwanga ichiuntu uku nnandu wa utonte wa myili ino. Kuno ndi fino mwafimile ivyai fino viombelwe nu utakati nutanduke, kuti mutanduke, ifino na li kwene fimini ivyai fino viombelwe ni chumi, kuti mu-swefiwe.

²⁰ Kuno pano mwali yazya ya maifyo mwawikalile kwaula ichumi.

²¹ Mwali nu nzano chi amanda yalye? Ifintu fino na li kwene vilumukulisya imitwe. Kuno ukusila kwa ifintu fiyo infwa.

²² Leelo li kwene mwakululwa um-maifyo, mwawa yazya yi Leesa, muli nunzano ali kuswefiwa, ni chisila chakwe upuma wa manda ti.

²³ Kuno chilambu cha maifyo infwa, leelo uwila-wa-nkumbu wi Leesa upuma wa manda ti muli Klisto MYesu wene witu.