Aloma 5 - UPANGANO UPYA

Kwalilwa chumi pali Leesa

¹ Chaleka kuno twalilwa ichumi uku nzila ya um-usumilo, apano tuli nutekano kuli Leesa, ku nzila ya Mwene witu Yesu Klisto.

² Muli wiyo twapiwa ukwingila ku nzila ya usumilo, uku nkumbu zi zino twimilile mwenemo, nu kuchimba um-utailo wa ukulu wi Leesa.

³ Leelo visi fiyo sile, leelo tunchimba um-machulo kwene, angi tumanyile fino machulo yakuleta unte.

⁴ Nunte ukuleta lukomyo lwamweeso, nu lukomyo lwamweeso lukuleta utailo.

⁵ Nutailo utakusekelisya, kuno ulukundo lwi Leesa lwitililwa um-myenzo itu nu Mweso Nswefu, wino twapilwe sweswe;

⁶ kuno lilye lino tutali na maka, manda pano yafikilila, Klisto wafwile uku nnandu wa yantu yaipe.

⁷ Kuno chatala untu ukufwa uku nnandu wa ntu wa chumi; leelo nalimwi ntu angaposya ukufwa uku nnandu wa ntu nzipe;

⁸ leelo Leesa alulangizya ulukundo lwakwe kuli sweswe, kuno Klisto wafwile uku nnandu witu, pano twalile tuchili swe yamaifyo.

⁹ Kuluta nkani, ndi li kwene twalilwa ichumi um-wazi wakwe, kuluta nkani tulufyusiwa ni chilakali uku nkola.

¹⁰ Kuno ndi pano twali yasiluembu, twapulika-nyiwe na Leesa ku nfwa ya mwanakwe, kuluta nkani fino twapulikanywa, tulufyusiwa um-upuma wakwe.

¹¹ Leelo asi fiyo mpela, leelo tuluchimba kwene muli Leesa uku Mwene witu Yesu Klisto, muli wenewe kwene twapokelela kasalaka upulikanywe uo.

Adamu na Klisto

¹² Ichino fiyo ndi uku ntu wenga ifyo lingile ukunzi, nu kwiifyo liyo infwa, na fiyo infwa yizila antu yoshi, kuno yoshi yachita amaifyo.

¹³ Kuno lino pachili pawe iNtambi ifyo lyaliko ukunzi; leelo iifyo litakwalwa ndi pasi intambi.

¹⁴ Leelo ulufu lwalâsile ukufuma pali Adamu fika na Mose, na kuli yao kwene yano yataluchita iifyo lilingine ni ifyo li Adamu, wino ali chilangizyo chi wino alwiza.

¹⁵ Leelo uwila ulye utali ndi wiifyo lilye; kuno ndi chili ukukuifya kwakwe wilye wenga ayinji yafwile, kuluta nkani inkumbu zi Leesa nu wila wa nkumbu zya ntu wenga, Yesu Klisto, zyalusya kuli yalye ayinji.

¹⁶ Leelo kwifya kwa ntu wilye wenga, kutalingine nu wila ulye; kuno uputuzi wi ifyo lyonga walesile malipilo, leelo wila onga wa nkumbu walesile ichumi um-maifyo tupu.

¹⁷ Kuno ndi uku kuifya kwa ntu wenga infwa yalâsile uku nnandu wi wilye wenga, ukuluta nkani yao yano yalupokelela uwinji wa nkumbu nu wila wa chumi, yaluwa nupuma nu kulâsa kuli wilye wenga, Yesu Klisto.

¹⁸ Ichino kaili, ndi ukwi ifyo lyonga antu yoshi yaputwilwa malipilo ya uchuzi, na fiyo kwene uku nnimo wonga uwa chumi, antu yoshi yalilwe ichumi cha upuma.

¹⁹ Kuno ndi uku kutanduka kwakwe untu wenga, antu tupu yachisilwe a maifyo, na fiyo kwene kuyela kwakwe wenga antu tupu yachisilwe a chumi.

²⁰ Leelo iNtambi ingile, ukuti iifyo likule nkani; leelo maifyo pano yavula, inkumbu zivulisya kuluta.

²¹ Ukuti ndi fino iifyo lyalâsile un-nfwa, ifino nu ku nzila ya chumi inkumbu zilâse fika nupuma wa manda ti kuli Yesu Klisto Mwene witu.