Aloma 3 - UPANGANO UPYA

Unsano wa aYudea nu kutailwa kwi Leesa

¹ Leelo mYudea alusishe anji chani? Nu kuchitwa ichibalu kusipile chani?

² Kusipile nkani kuli chila nsila; intangulo kuno a Yudea yapiwa amaswi yi Leesa.

³ Ichani fwandi ngi yamwi pali yeneyo yatasumile? Chene! ukunta-sumila kwao kungalesha Leesa ukusumilwa?

⁴ Mwiko ta! Leesa aloleka fino uwa chumi na chila ntu uwa ufi; ndi fino chaandikwe: “Kuti chimanyike fino wewe uli wa chumi um-maswi yako, ukapote umu uputusi wa milandu.”

⁵ Leelo, ngu uipe witu ulumanyisha ichumi chi Leesa, tulufwanga chani? Chene! Leesa asi wa chumi fino aluleta ukali? Ndufwangila uku ntu.

⁶ Mwiko ta! kuno ngi fiyo Leesa angaputula uli imilandu kuno ukunsi?

⁷ Leelo, ndi chumi chi Leesa chalusha nkani ku utensho waakwe uku nnandu wa ufi wane, ku chani nchili nduputwilwa ndi fino nene wa maifyo?

⁸ Chisi fiyo ndi fino yamwi yatuyifikisha, ukuti twasambilizya fiyo: tuchite fiipe ukuti fisipe fifume. Uputusi uwa chumi kuli yao.

Antu yoshi a amaifyo

⁹ Ichani fwandi? Tulusile anji? Mwiko ta! Nanti uche. Kuno twati tuyataka aYudea na aGliki, ukuti yoshi kwene yawa um-maifyo.

¹⁰ Ndi wino chaandikwe, ukuti: “Kusi uwa chumi nanti wenga.

¹¹ Kusi wa mano. Kusi wino alusita Leesa.

¹² Yoshi yaleuka, yatasipile yoshi kwene. Kusi aluchita ifisipe, awe! Nanti wenga.

¹³ Milongomilo yao ilindi lino lili chasi. Indumi shao sikuvwanga inkai. Usungwe wi chipili uli um-milomo yao.

¹⁴ Imilomo yao yashula intipu nu kuwawasha.

¹⁵ Amulu yao yali nu lwilo ukuswisha uwasi.

¹⁶ Uononi na malanda fili un-nsila shao.

¹⁷ Nanti insila ya utekano yataimanyile.

¹⁸ Ichopo kuli Leesa chisipo apa maaso yao.”

¹⁹ Ichino twamanya fino ifintu fyoshi fino iNtambi ilulanda, ilulanda yano yali apisika ya Ntambi, ukuti imilomo yoshi itushe, ni nsi yoshi iwe um-uputusi wi Leesa.

²⁰ Kuno kusi umwi wino alwalilwa ichumi apa maaso yaakwe uku kulema Ntambi, kuno Ntambi ikulumanyisha maifyo.

Chumi chikusanwa muli Yesu

²¹ Leelo kasalaka, ichumi chi Leesa chamanyika kwaula Ntambi, chilwimikilwa ni Ntambi na malau,

²² fino ichumi chi Leesa uku nsila ya kusumila muli Yesu Klisto kuli yoshi yano yazumila; kuno chitaleunkine.

²³ Kuno yoshi yachita maifyo nu kuchepelwa ukulu wi Leesa,

²⁴ yalwalilwa ichumi sile, uku nkumbu shaakwe, uku nsila ya ukuluzi uno uli muli Klisto Yesu.

²⁵ Wino Leesa watamwika awe ikapulikanya, uku nsila ya usumilo, um-wazi wakwe, ukuti alangizye ichumi chakwe, kuno wasulikanya uku chelelezi chi Leesa amaifyo yoshi yano yachisilwe inkolelo.

²⁶ Kuti alangizye ichumi chakwe na li kwene, kuti awe uwa chumi, nawe wino alwalila ichumi wino azumile Yesu.

²⁷ Ali leelo ukuitensya kuli kwi? Kutachiliko! Uku ntambi ya uli? Uku ntambi ya milimo? Mwiko ta! leelo uku ntambi ya usumilo!

²⁸ Ichino twalola fino untu akulwalilwa ichumi uku usumilo, kusi ku kulema Ntambi.

²⁹ Nanti, Chene! Leesa i Leesa wa aYudea mpela, asi Leesa wa yantu yakulukuwa kwene? Endita! i Leesa wa yakulukuwa kwene.

³⁰ Ndu mwenemo kwene Leesa ali wenga, wino alwalila ichumi yalye yano yachitwa ichibalu um-usumilo, nayo yalye yano yatachisilwe ichibalu aluyalila ichumi uku nzila ya usumilo kwene.

³¹ Nga Chene! Tululovyanya Ntambi uku usumilo? Mwiko ta! leelo tuluipa amaka iNtambi.