Aloma 15 - UPANGANO UPYA

Utonte na amaka

¹ Ichino chitulungime sweswe yano tuli na maka, ukusenda utonte wi yano yasi na maka, chitatuile ukuizifizya swe yakola.

² Chila ntu pali sweswe azifizye uwachakwe, azane uzipe nu kukuziwa.

³ Kuno na Klisto kwene atauzifizyanga unkola, leelo ndi fino chaandikwe: “Maswi ya kuzewanya yi yano yakuzewanyizye yali pa ntwe Wane.”

⁴ Kuno vyonsi fino vyatangwile kwandikwa, vyandikwe ukuti sweswe tusambilile, ukuti ukunte nu kukuteka myenzo um-Maandiko, tuleme utailo.

⁵ Na Leesa wa unte nu tekezyo, amupemweeso uli onga uku kukolana na Klisto Yesu.

⁶ Ukuti ukumweeso onga nu ku nnomo onga mumtensye Leesa, Isi wa Mwene witu Yesu Klisto.

⁷ Ichino mpokelelane mwe yakola ndi fino na Klisto kwene watupokelela, ukuti Leesa atensiwe.

⁸ Kuno ndutaka ukuti, Klisto wali umuofi wa kuchitwa ichibalu, ku nnandu wa chumi chi Leesa, ukuti akomye ulanyo uno walainye yatata itu.

⁹ Na kaili kuti akulukuwa yatensye Leesa ku nnandu wi kumbukila lyakwe, ndi fino chaandikwe: “Ichino ndukutensya apa yakulukuwa. Nankulundila Izina lyako.”

¹⁰ Na kaili atile: “Chimbaini, yakulukuwa, ponga na antu yaakwe.”

¹¹ Na kaili: “Mwe yakulukuwa mwensi, tensyini uMwene, mwe yantu yoshi lumbanyini.”

¹² Na kaili Isaya atile: “Aluloleka untu ukufuma unduko lwi Yese na uwino alukatuka ukulâsa akulukuwa. Ali wino akulukuwa yalutaila.”

¹³ Na Leesa wa utailo amuzuzye mwemwe ukuchimba konsi nutekano um-kuzumila, kuti mulusye nkani ukuwa nutailo, uku maka yi Mweso Nswefu.

Unnimoi w Paulo

¹⁴ Yachane, namanyikisya nenkola, uku maswi yino fino nemwe kwene mwavuzya uzipe, mwazyula mano yoshi, na kaili mungasokezyana.

¹⁵ Leelo namwandikila uku chiposye nkani, mumwi um-mbaluwa ii, kuti mwizukile, uku nkumbu zilye zino napilwe na Leesa,

¹⁶ kuti imbwe umuofi wi Klisto Yesu apa yantu yakulukuwa, uomvi wi kapela wiswi-zipe lyi Leesa, ukuti akulukuwa yawe chipelo chino chazumilwa (na Leesa), chaswefiwa nu Mweso Nswefu.

¹⁷ Ichino fiyo nkwite cha kuutensezya muli Klisto Yesu pa manso yi Leesa.

¹⁸ Kuno ntaingezye ukutaka ifintu fino atachili achite Klisto, uku nnimo wane, kuti akulukuwa yachindike, ukwiswi nu ku milimo,

¹⁹ uku maka ya vilangizyo ni vipezya-mano, uku maka yi Mweso Nswefu. Vino ukufuma uku Yelusalemu nu mbali mbali kwene nu ku Ilulika, nati nsunda nu kufikilizya iswi-zipe lyi Klisto.

²⁰ Na fiyo kwene nasitanga ukusunda iswi-zipe, leelo ntachisunda pano Izina lyi Klisto lyati litakwa, ntize nkule apa chiimbili cha ntu unji.

²¹ Leelo ndi fino chaandikwe: “Yano yatalusundwa amaswi yakwe, ayano yalulola: na yalye yano yatachili yapulike, yalumanya.”

Paulo wasita ukuya uku Loma

²² Ichino nalesenkanyiwa maila tupu, ukuti ntiza ukumwino.

²³ Leelo apa kasalaka, kuno ntakwite uwasa kaili un-nsansa zi, na kaili ukufuma imyaka tupu nasitanga nkani kwiza kumwino,

²⁴ pano nacha napita uku Spania, ndwiza nu ku mwino, kuno ndwelengula ukulolana nemwe undwendo lwane nu kusindikilwa nemwe, na kuwa ni nsânsa ndi lino nalolana nemwe.

²⁵ Leelo kasalaka naya ku Yelusalemu, kuti nkaombele aswefiwa.

²⁶ Kuno chizipile antu ya ku Masedonia nu ku Akaya ukusangila apina apa aswefiwa ya ku Yelusalemu.

²⁷ Endita, chiyazipile na kaili yawa ni mpa kuno yali. Kuno nga yakulukuwa yuminkana ni ifintu vyao ivyamweeso, chiyaile ukuyaombela uku ifintu vyao ivya mwili.

²⁸ Ichino ngi namalila unnimo uo, nu kutela aka-manyililo chisêke chiyo kuno yali, ndupitila ukumwino apa kuya uku Spania.

²⁹ Nene manyile fino ngi niza ukumwino, ndwiza nu upepelelo ukulu wi Klisto.

³⁰ Yachane ndumupapata uku Mwene witu Yesu Klisto nu ku lukundo lwi Mweso, mulemasye ponga nene uku kupepa kwino, uku nnandu wane apa manso yi Leesa.

³¹ Ukuti nfyuke pali yalye yano yatanduka um-aYudea, na kaili unnimo wane uno ndi nao, uku Yelusalemu uya-zipile aswefiwa.

³² Kuti ingize kuno muli ni nsânsa, ndi fino Leesa akasi, nu kupuza ponga nemwe.

³³ Leesa wa utekezyo awe ponga nemwe mwensi. Chiwe fiyo kwene!