Aloma 14 - UPANGANO UPYA

Mwazwe asi na maka um-usumilo

¹ Mupokelelini wino asi na maka um-usumilo, nanti kumpingula uku melenguzi yaakwe.

² Untu wenga ali nu zumilo wa kulya vyonsi, leelo wino asi na maka um-usumilo alulya ivisapwa.

³ Wino alulya atachisula wino atalulya, nanti wino atalulya atachipingula wino alulya; kuno Leesa wampokelela.

⁴ Wewe wini ulupingula umuofi wa unji? Uku mwene waakwe unkola wiyo nda akulwimilila nanti ndukupona. Endita, leelo angimikwa, kuno Mwene ali na maka ukumwimika.

⁵ Untu wenga alusolola uwanda onga kuluta na manda yanji, nunji alulola amanda yoshi yaine. Chila ntu achite ndi fino alwelengula uku mano yaakwe unkola.

⁶ Wino alulema uwanda umwi aluulema uku Mwene, na wino alulya, alulya uku Mwene, kuno alusamalizya Leesa; na wino atalulya, atalulya uku Mwene, kuno nawe kwene alusamalizya Leesa.

⁷ Kuno kusi ntu umwi pali sweswe, alwikala apa lwakwe, nanti wino alufwila apa lwakwe.

⁸ Kuno ndi tutenzi, twikazile uku Mwene, nanti tunga-fwa, tufwilile uMwene. Ichino ngi swe yapuma nanti ngi twafwa, swe ya Mwene.

⁹ Kuno Klisto wafwile wawa umpuma kaili uku nnandu uu, alâse yano yafwa napuma kwene.

¹⁰ Nga newe uli? Nga fino ulupingula uwa chako? Nanti wemwi ulusula uli uwa chako? Kuno sweswe swensi tulwimilila apa chisumbi-cha-uputuzi chi Leesa.

¹¹ Kuno chaandikwe: “Ndi finondi”, ifino uMwene avwanzile, “Amakokola yoshi yalunfukamila, na chila ntu alutaka Leesa.”

¹² Ichino fiyo chila ntu pali sweswe aluuvwangila amaswi yaakwe unkola pali Leesa.

Utaifya unnyonko

¹³ Ichino tutachiputwilana, leelo fumyai uputuzi uu: utachichitila unji chintu cha kukumika nanti cha kuponya.

¹⁴ Manyile, na kaili namanyikisya nkani um-Mwene Yesu, fino kusi ichintu chino chingalikizya untu fuma uku kafumo kakwe-cho, leelo kuli wiyo wino alulola chintu fino ichakulikizya, ichintu chiyo chingannikizya.

¹⁵ Kuno wachako ngi wingila un-chikonko uku nnandu wa chulya chino walya, ali kuti utalondile lukundo. Uku chakulya chako utamonona ntu wiyo, wino Klisto wafwilile.

¹⁶ Ichino, uzipe wino utachitakilwa iviipe.

¹⁷ Kuno wene wi Leesa asi ukulya nanti ukunwa, leelo ichumi nutekano nu kuchi-mba muli Mweso Nswefu.

¹⁸ Kuno wino aluombela Klisto muli fiyo, aluzipila Leesa nu kuzumilwa na antu.

¹⁹ Ichino tulondele ifintu vya utekano ni ifintu fino viile ukukuzyana.

²⁰ Uku nnandu wa chakulya utonona unnimo wi Leesa; umwenemo, vyonsi vizipe, leelo iviipe uku ntu wino alulya nu kukumika.

²¹ Chizifile ukuntalya inyama nanti ukunwa isute nanti kuchita chonsi chimwi chino chiluku-misya unnyonko.

²² Usumilo uno uli nao, uwe nao um-mweso wako apa maaso yi Leesa. Inkatakwe untu wilye wino ataluuputwila apa lwakwe ukwiswi lino azumile.

²³ Leelo wino alutentenganya ngi walya, wataputwilwa fino umononi kuno atalile uku zumilo. Nu nnimo onsi uno utafumile um-usumilo, iifyo.