Aloma 13 - UPANGANO UPYA

Kuchindika a yamaka

¹ Chila ntu atontele amaka ya ukulu. Kuno kusi amaka yano yatafumile kuli Leesa, na yalye yano yali-po, yimikwe na Leesa.

² Ichino fiyo wensi wino alusula amaka, alusula chino Leesa wawika, na yano yalusula yaluutalila unnandu.

³ Kuno yakalâsa yatalofya antu yano yaluchita ivizipe, leelo yano yaluchita iviipe. Chene! Ulusita kuti utachopa uwa maka? Chita ivizipe, nawe angakutensya.

⁴ Kuno wene umuofi wi Leesa, uku vizipe vyako. Leelo pano wachita iviipe, opa! Kuno atakusenda ulupanga sile; kuno umuofi wi Leesa, akuluwezya ichilanduzi ku ukali kuli kachita wa viipe.

⁵ Ichino chiine ukuyatontela, asi uku ukali uo sile, leelo uku nnandu wiswi-lya-mweso kwene.

⁶ Ichino mululipa ikodi kwene; kuno wene aomvi yi Leesa, um-milimo ino yakuomba.

⁷ Yapini yoshi kwene akai kao; untu wi kodi, ipini kodi; wino alusangisya, nsangilini; uwakopeka, mopini; uwa kuchindikwa, mchindikini.

Lukundo lwa ku yanji

⁸ Mutachiwa nimpa ya chintu chonsi uku ntu, siku ukukundana; kuno wino wakunda unnina, wafikilizya Intambi.

⁹ Kuno masunde ya: utachichita ivya upundu, uta-chumola, utachiiya, utachikumbuka, nanti kwawa isunde limwi lyonsi, lyuminkine umwiswi li, fino: Ukunde unnyo-nko ndi fino waikunda wenkola.

¹⁰ Ulukundo lutakuchitila unji iviipe; ichino ulukundo lukulufikilizya iNtambi.

¹¹ Na kuno angi mumanyile fino amanda iyiza akuti tulanke un-tulo. Kuno ufyusi uutupalamila ukuluta ukufuma pano twatalike ukuzumila.

¹² Usiku uuchepa, kwasya kuche. Tuzule milimo ya chanda nu kuzwala vyanzo vya nsanya.

¹³ Tuwe ni miele ya nchinzi, ndi fino chiile kupita unsanya, asi ku mvimbi nukolesi, asi ku nyamvi nupundu, nanti ku mpanzyela nuzuwa.

¹⁴ Leelo Mwene Yesu Klisto awe umwenda wino wa kuzwala, nga mutachisoma ivya mwili nu kukatusya ivisitwa fyaakwe-o.